ភ្ជាប់​ទៅ​គេហទំព័រ​ទាក់ទង

មនុស្ស​រាប់​សិប​នាក់​បាន​ស្លាប់​​ក្នុង​ការបំផ្ទុះ​គ្រាប់​បែកនៅសួន​សាធារណៈ​មួយ​នៅ​ប៉ាគីស្ថាន


បុគ្គលិក​សង្គ្រោះ​លើ​ក​ជន​រង​គ្រោះ​ពី​ការបំផ្ទុះ​គ្រាប់​បែក​ នៅ ឯ​កន្លែង​កើត​ហេតុ​ នៅ​ក្នុង​ក្រុង​ Lahore កាល​ពី​ថ្ងៃ​ទី​២៧ ខែ​មិនា​ ឆ្នាំ​២០១៦។​

ក្រុម​មន្ត្រី​ប៉ាគីស្ថាន​បាន​និយាយ​ថា​ ការ​បំផ្ទុះ​គ្រាប់បែក​អត្តឃាត​មួយ​នៅ​ក្នុង​ឧទ្យាន​សាធារណៈ​មួយ​មាន​មនុស្ស​កុះករ​នៅ​ក្នុង​ក្រុង​ Lahore នៅ​ប៉ែក​ខាង​កើត​ប្រទេស​កាល​ពី​ល្ងាច​ថ្ងៃ​អាទិត្យ បាន​បណ្តាល​ឱ្យ​មនុស្ស​យ៉ាង​តិច​ណាស់​៦៥​នាក់​ស្លាប់ ​និង​បាន​ធ្វើ​ឱ្យ​មនុស្ស​យ៉ាង​ហោច​ណាស់​៣០០​នាក់​ទៀត​ត្រូវ​របួស។

លោក Salman Rafiq ទីប្រឹក្សា​ខាង​សុខាភិបាល​ម្នាក់​របស់​រដ្ឋាភិបាល​ខេត្ត Punjab បាន​និយាយ​ថា​ មាន​ស្ត្រី​និង​កុមារស្ថិត​នៅ​ក្នុង​ចំណោម​ក្រុម​ជន​រងគ្រោះ។​ លោក​បាន​ថ្លែង​ថា​មាន​មនុស្ស​ត្រូវ​របួស​ធ្ងន់​ក្នុង​ចំណោម​ក្រុមនោះ​ ហើយ​ត្រូវ​បាន​ដឹក​ទៅ​កាន់មន្ទីរពេទ្យ​ក្នុង​មូលដ្ឋាន។​

អ្នក​ឃើញ​ហេតុការណ៍​ដោយ​ផ្ទាល់​បាន​និយាយ​ថា​ មាន​គ្រួសារ​ក្រុម​អ្នកកាន់​គ្រិស្តសាសនា​ច្រើន​នាក់​ដែល​ប្រារព្ធ​ពិធី​បុណ្យ​ប៉ាក​ (Easter) ក៏​មាន​វត្តមាន​នៅ​ក្នុង​ឧទ្យាន​ Gulshan Iqbal នៅ​ពេល​មាន​ការផ្ទុះ​គ្រាប់បែក​នោះ​ ក៏​ប៉ុន្តែ​គេ​ដឹង​មិន​ច្បាស់លាស់​ទេ​ថា ​តើ​អ្នក​បំផ្ទុះ​គ្រាប់​បែក​នោះ​បាន​យក​សហគមន៍​ជនភាគតិច​នេះ​ជា​ទី​ដៅ​នៃ​ការវាយ​ប្រហារ​ឬ​បែបណា​ទេ។​

គ្មាន​នរណា​ម្នាក់​ទាមទារ​ការទទួល​ខុស​ត្រូវ​ដល់​ការ​បំផ្ទុះ​គ្រាប់​បែក​នេះ​នៅ​ឡើយ​ទេ​ ក៏​ប៉ុន្តែ​គេ​បាន​សង្ស័យ​ជា​បន្ទាន់​ទៅ​លើ​ក្រុម​ជ្រុល​និយម​តាលីបង់​ប៉ាគីស្ថាន។

ក្រុម​នេះ​បាន​ធ្វើការ​បះបោរ​ប្រឆាំង​នឹង​រដ្ឋ​ជាង​មួយ​ទសវត្សរ៍​មក​ហើយ ​ដោយ​បាន​សម្លាប់​មនុស្ស​រាប់​ម៉ឺន​នាក់​នៅ​ក្នុង​ការបំផ្ទុះ​គ្រាប់បែក​អត្តឃាត​និង​ការ​វាយ​ប្រហារ​ភេរវកម្ម​ឯ​ទៀតៗ។​

សេចក្រី​ថ្លែងការណ៍​មួយ​របស់​លោក​ Ned Price អ្នក​នាំ​ពាក្យ​នៃ​ក្រុម​ប្រឹក្សា​សន្តិសុខ​ជាតិ​ស.រ.អា.និយាយ​ថា​ ស.រ.អា.ថ្កោលទោស​«យ៉ាង​ខ្លាំង»ដល់​ការ​វាយ​ប្រហារ​នេះ​ នៅ​ក្នុង​ក្រុង Lahore ដោយ​ហៅ​វា​ថា​ជា​«សកម្មភាព​កំសាក​មួយ​នៅ​ក្នុង​អ្វី​ដែល​ជា​ឧទ្យាន​មួយ​មាន​ទស្សនីយភាព​ល្អ​និង​មាន​ភាព​ស្ងប់ស្ងៀម​ជា​យូរ​មក​ហើយ»។​

នៅ​ពេល​ជាមួយ​គ្នា​នេះ​ នៅ​ក្នុង​ក្រុង​ Islamabad ប្រជារាស្ត្រ​ប៉ាគីស្ថាន​ច្រើន​ពាន់​នាក់​បាន​ដើរ​ធ្វើ​បាតុកម្ម​នៅ​តាម​ផ្លូវ​នៃ​រដ្ឋធានី​កាល​ពី​ថ្ងៃ​អាទិត្យ ​ដើម្បី​តវ៉ា​ប្រឆាំង​នឹង​ការប្រហារ​ជីវិត​ដោយ​ព្យួរ​ក​កាល​ពី​ខែ​មុន​ ចំពោះ​បុរស​ម្នាក់​ដែល​ត្រូវ​បាន​ចោទ​ប្រកាន់​ថា​បាន​ធ្វើ​ឃាត​អភិបាល​ខេត្ត​ម្នាក់។​

ក្រុម​បាតុករ​ដែល​ភាគ​ច្រើន​បំផុត​ជា​ក្រុម​សកម្មជន​នៃ​គណបក្ស​ឥស្លាម​និយមបាន​ធ្វើការ​ប្រជុំ​ប្រឆាំង​នឹង​ការប្រហារ​ជីវិត​ឈ្មោះ​ Mumtaz Qadri ដែល​បាន​បាញ់​សម្លាប់​លោក SalmanTaseer អភិបាល​ខេត្ត​ Punjab កាល​ពី​ឆ្នាំ​២០១១​ព្រោះ​អ្នកនយោបាយ​ដែលត្រូវ​បាន​ធ្វើឃាត​នេះ​បាន​អំពាវនាវ​ឱ្យ​មាន​ការកែ​ទម្រង់​ច្បាប់​ឥស្លាម​របស់​ប្រទេស ​ប្រឆាំង​នឹង​ការ​ប្រមាថ​មើលងាយ​សាសនា៕

XS
SM
MD
LG