ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ប្រទេស​និង​អង្គការ​ផ្តល់​ជំនួយ​រៃ​អង្គាស​ថវិកា​បាន​ជិត ៦០០ លាន​ដុល្លារ​សម្រាប់​ជួយ​ជាតិ​សាសន៍​រ៉ូហ៊ីងយ៉ា


រូបឯកសារ៖ ជនជាតិ​រ៉ូហ៊ីងយ៉ា​កាន់​សាសនា​ឥស្លាមលីស្បៀងអាហារពីជំរំជនភៀសខ្លួន Kutupalong ទៅកាន់ជំរំ Ukhia នៅតំបន់ Cox's Bazar នៃប្រទេសបង់ក្លាដេស កាលពីថ្ងៃទី២៤ ខែសីហា ឆ្នាំ២០២០។
រូបឯកសារ៖ ជនជាតិ​រ៉ូហ៊ីងយ៉ា​កាន់​សាសនា​ឥស្លាមលីស្បៀងអាហារពីជំរំជនភៀសខ្លួន Kutupalong ទៅកាន់ជំរំ Ukhia នៅតំបន់ Cox's Bazar នៃប្រទេសបង់ក្លាដេស កាលពីថ្ងៃទី២៤ ខែសីហា ឆ្នាំ២០២០។

ប្រទេស​និង​អង្គការ​អន្តរជាតិ​ផ្ដល់​ជំនួយ​អន្តរជាតិ​នានា​ បាន​រៃ​អង្គាស​ថវិកា​បាន​ជិត ៦០០ លាន​ដុល្លារ​កាល​ពី​ថ្ងៃ​ទី ២២ ខែ​តុលា​កន្លង​ទៅ​នេះ ដើម្បី​ជួយ​សម្រាល​ទុក្ខ​វេទនា​របស់​ជាតិសាសន៍​រ៉ូហ៊ីងយ៉ា​កាន់​សាសនា​ឥស្លាម​ប្រមាណ ៨ សែន ៦ ម៉ឺន​នាក់ ដែល​បាន​រត់​គេច​ពី​ប្រទេស​មីយ៉ាន់ម៉ា​ កាល​ពី ៣ ឆ្នាំ​មុន ទៅ​កាន់​ប្រទេស​បង់ក្លាដេស ស្របពេល​ដែល​រដ្ឋាភិបាល​បង់ក្លាដេស​ ព្រមាន​ថា ខ្លួន​មិន​អាច​ទទួល​ជាតិ​សាសន៍​ទាំង​នេះ​ឱ្យ​រស់នៅ​ក្នុង​ប្រទេស​របស់​ពួកគេ​ ជា​រៀង​រហូត​បាន​ទេ។

លោក Shahriar Alam អនុ​រដ្ឋមន្ត្រី​ក្រសួង​ការបរទេស​នៃ​ប្រទេស​បង់ក្លាដេស បាន​បញ្ជាក់​នៅ​ក្នុង​សន្និសីទ​តាម​អនឡាញ​នៃ​ក្រុម​ប្រទេស​និង​អង្គការ​ផ្ដល់​ជំនួយ​អន្តរជាតិ កាល​ពី​ថ្ងៃ​ទី ២២ ខែ​តុលា​ថា៖

«ប្រទេស​មីយ៉ាន់ម៉ា​បាន​បង្កើត​បញ្ហា​នេះ​ឡើង ហើយ​ប្រទេស​នេះ​ត្រូវតែ​រក​ដំណោះ​ស្រាយ​ចំពោះ​បញ្ហា​នេះ។ ប្រទេស​បង់ក្លាដេស​មិន​មាន​តួនាទី​នៅ​ក្នុង​ការ​បន្ត​ទទួល​បន្ទុក​លើ​បញ្ហា​នេះ​ត​ទៅ​ទៀត​ទេ។ ជាតិ​សាសន៍​រ៉ូហ៊ីងយ៉ា​ត្រូវតែ​វិល​ត្រឡប់​ទៅកាន់​ប្រទេស​ដើម​របស់​ពួកគេ​វិញ​ឲ្យ​បាន​ឆាប់​តាម​ដែល​អាច​ធ្វើ​ទៅ​បាន»។

ប្រទេស​បង់ក្លាដេស​បាន​ទទួល​ជាតិ​សាសន៍​រ៉ូហ៊ីងយ៉ា​ឱ្យ​ស្នាក់​អាស្រ័យ ចាប់​តាំង​ពី​ពួកគេ​បាន​រត់​គេច​ខ្លួន​ចេញ​ពី​រដ្ឋ Rakhine នៅ​ភាគ​ខាង​ជើង​នៃ​ប្រទេស​មីយ៉ាន់ម៉ា ​កាល​ពី​ខែ​សីហា​ និង​ខែ​កញ្ញា ឆ្នាំ ២០១៧ មក បន្ទាប់ពី​មាន​ការ​វាយ​ប្រហារ​ដោយ​ពួក​សកម្ម​ប្រយុទ្ធ​រ៉ូហ៊ីងយ៉ា​ ប្រឆាំង​នឹង​កង​កម្លាំង​សន្តិសុខ​រដ្ឋាភិបាល ដែល​បណ្ដាល​ឲ្យ​យោធា​មីយ៉ាន់ម៉ា​ធ្វើ «ប្រតិបត្តិការ​បោស​សម្អាត» តបត​វិញ យ៉ាង​ឃោរឃៅ ដែល​អង្គការ​សហប្រជាជាតិ​បាន​បញ្ជាក់​ថា ប្រតិបត្តិការ​នេះ​ដូច​ទៅ​នឹង «ការលុបបំបាត់​ជាតិ​សាសន៍» ដូច្នេះ​ដែរ។

លោក Filippo Grandi ដែល​ជា​ប្រធាន​ទីភ្នាក់ងារ​ជន​ភៀសខ្លួន​អង្គការ​សហប្រជាជាតិ បាន​និយាយ​ជា​ថ្មី​ម្ដង​ទៀត​ថា គោលដៅ​ចុងក្រោយ​បំផុត​ គឺ​ធ្វើ​យ៉ាង​ណា​ឲ្យ​ជាតិ​សាសន៍​រ៉ូហ៊ីងយ៉ា​វិល​ត្រឡប់​ទៅកាន់​ប្រទេស​មីយ៉ាន់ម៉ា​វិញ ប៉ុន្តែ​នៅ​ក្រោម​ស្ថានការណ៍​ត្រឹមត្រូវ។

លោក Grandi បាន​មាន​ប្រសាសន៍​ថា៖ «យើង​មិន​ត្រូវ​ឈប់​រក​ដំណោះស្រាយ​នោះ​ទេ ហើយ​ដំណោះស្រាយ​សំខាន់​បំផុត ​គឺ​ការ​វិល​ត្រឡប់​ទៅកាន់​ប្រទេស​កំណើត​វិញ [របស់​ជាតិ​សាសន៍​រ៉ូហ៊ីងយ៉ា​ទាំង​នេះ]។ នេះ​គឺ​ជា​ការ​ទទួល​ខុស​ត្រូវ​ទាំង​ស្រុង​របស់​ប្រទេស​មីយ៉ាន់ម៉ា»។

ទីភ្នាក់ងារ​ជន​ភៀសខ្លួន​អង្គការ​សហប្រជាជាតិ UNHCR បាន​បញ្ជាក់​ថា ស្ថានការណ៍​នៅ​នឹង​កន្លែង​នៅ​មិន​ទាន់​អំណាយ​ផល​នៅ​ឡើយ​ទេ សម្រាប់​ជាតិ​សាសន៍​រ៉ូហ៊ីងយ៉ា​ក្នុង​ការ​វិល​ត្រឡប់​ទៅកាន់​ប្រទេស​មីយ៉ាន់ម៉ា​វិញ​ ប្រកប​ដោយ​សេចក្តី​ថ្លៃថ្នូរ សុវត្ថិភាព និង​តាម​ការ​ស្ម័គ្រ​ចិត្ត។

រដ្ឋាភិបាល​មីយ៉ាន់ម៉ា​មិន​ទាន់​ដោះស្រាយ​មូលហេតុ​ជា​ឬសគល់​ ដែល​បណ្ដាល​ឲ្យ​ជាតិ​សាសន៍​រ៉ូហ៊ីងយ៉ា​រាប់​សែន​នាក់​រត់​គេច​ពី​ផ្ទះ​សម្បែង​របស់​ពួកគេ ដែល​ក្នុង​នោះ​មាន​ទាំង​ការ​រើសអើង​និង​អំពើ​ហិង្សា​ប្រឆាំង​នឹង​ជាតិ​សាសន៍​ទាំង​នេះ​ផង​ដែរ ឬ​ក៏​អនុញ្ញាត​ឱ្យ​ពួកគេ​អាច​ដើរ​ហើរ​ដោយ​សេរី​ក្នុង​ប្រទេស​មីយ៉ាន់ម៉ា​នោះ​ទេ។ ក្រៅពី​នេះ ក៏​គ្មាន​ការ​ទទួល​ខុស​ត្រូវ​ចំពោះ​ឧក្រិដ្ឋកម្ម​ឃោរឃៅ​ដែល​បាន​ធ្វើ​ឡើង​ចំពោះ​ជាតិ​សាសន៍​ទាំង​នេះ​ផង​ដែរ។

រូបឯកសារ៖ ស្ត្រីជនជាតិភាគតិចរ៉ូហ៊ីងយ៉ាម្នាក់កំពុងស្នាក់នៅក្នុងជំរំជនភៀសខ្លួន នៅទីក្រុងញូវដេលី ប្រទេសឥណ្ឌា កាលពីថ្ងៃទី៣០ ខែមេសា ឆ្នាំ២០២០។
រូបឯកសារ៖ ស្ត្រីជនជាតិភាគតិចរ៉ូហ៊ីងយ៉ាម្នាក់កំពុងស្នាក់នៅក្នុងជំរំជនភៀសខ្លួន នៅទីក្រុងញូវដេលី ប្រទេសឥណ្ឌា កាលពីថ្ងៃទី៣០ ខែមេសា ឆ្នាំ២០២០។

បន្ថែម​ពី​លើ​ជាតិ​សាសន៍​រ៉ូហ៊ីងយ៉ា ៨ សែន ៦ ម៉ឺន​នាក់ ដែល​កំពុង​ជ្រកកោន​នៅ​ក្នុង​ប្រទេស​បង់ក្លាដេស មាន​ជន​ភៀសខ្លួន​រ៉ូហ៊ីងយ៉ា ១ សែន ៥ ម៉ឺន​នាក់​ទៀត​កំពុង​ស្ថិត​នៅ​ក្នុង​ប្រទេស​ម៉ាឡេស៊ី ឥណ្ឌូណេស៊ី និង​ឥណ្ឌា។ ជាតិ​សាសន៍​រ៉ូហ៊ីងយ៉ា​ប្រមាណ ៦ សែន​នាក់​ទៀត នៅ​ស្ថិត​នៅ​ក្នុង​រដ្ឋ Rakhine នៃ​ប្រទេស​មីយ៉ាន់ម៉ា​ដដែល ដែល​ក្នុង​នោះ​ចំនួន ១ សែន ៤ ម៉ឺន​នាក់ ​គឺ​ជា​ជន​ខ្ចាត់ព្រាត់​ពី​ផ្ទះ​សម្បែង​នៅ​ក្នុង​ប្រទេស​មីយ៉ាន់ម៉ា​ផ្ទាល់។

សន្និសីទ​របស់​ប្រទេស​និង​អង្គការ​ផ្តល់​ជំនួយ​អន្តរជាតិ​កាល​ពី​ថ្ងៃ​ទី ២២ ខែ​តុលា​កន្លង​ទៅ​នេះ ត្រូវ​បាន​រៀបចំ​រួម​គ្នា​ដោយ​អង្គការ UNHCR សហរដ្ឋ​អាមេរិក សហភាព​អឺរ៉ុប និង​ចក្រភព​អង់គ្លេស។

សហរដ្ឋ​អាមេរិក​បាន​ធ្វើ​វិភាគទាន​ច្រើន​ជាង​គេ​បំផុត ដោយ​បាន​ប្រកាស​ថា ​នឹង​ផ្តល់​ជំនួយ​ថ្មី​ចំនួន​ជិត ២០០ លាន​ដុល្លារ ដោយ​នាំ​ឱ្យ​ការ​រួម​ចំណែក​សរុប​របស់​សហរដ្ឋ​អាមេរិក ​នៅ​ក្នុង​ឆ្នាំ ២០២០ នេះ មាន​ចំនួន​ជាង ៤៣៧ លាន​ដុល្លារ សម្រាប់​ជាតិ​សាសន៍​រ៉ូហ៊ីងយ៉ា និង​ការ​រួម​ចំណែក​សរុប​តាំង​ពី​ឆ្នាំ ២០១៧ មក មាន​ចំនួន​ជាង ១ ពាន់ ២ រយ​លាន​ដុល្លារ។

រដ្ឋាភិបាល​មួយ​ចំនួន​ទៀត​ក៏​បាន​ប្រកាស​អំពី​ការ​សន្យា​ថ្មីៗ ដោយ​ផ្តោត​ការ​យក​ចិត្ត​ទុកដាក់​លើ​ការ​សិក្សា​អប់រំ ការ​ឆ្លើយតប​និង​ការ​បង្ការ​ជំងឺ​កូវីដ១៩ ការ​ការពារ និង​ជំនួយ​ខាង​ម្ហូប​អាហារ​ និង​ខាង​សុខភាព។

វិភាគទាន​ទាំង​នេះ​ក៏​នឹង​ត្រូវ​ប្រើ​ប្រាស់​ដើម្បី​បង្កើន​សកម្មភាព​នានា​នៅ​ក្នុង​រដ្ឋ Rakhine ផង​ដែរ ដើម្បីបង្កើត​ស្ថានភាព​សម្រាប់​ការ​ធ្វើ​មាតុភូមិនិវត្ត​របស់​ជាតិ​សាសន៍​រ៉ូហ៊ីងយ៉ា និង​ដើម្បី​សម្រាល​សម្ពាធ​លើ​សហគមន៍​នានា​ នៅ​ក្នុង​ប្រទេស​បង់ក្លាដេស​ ដែល​បាន​ផ្ដល់​កន្លែង​ជ្រកកោន​ឲ្យ​ជាតិ​សាសន៍​រ៉ូហ៊ីងយ៉ា​ទាំង​នេះ៕

ប្រែ​សម្រួល​ដោយ ឈឹម សុមេធ

XS
SM
MD
LG