ប្រទេសចិននៅថ្ងៃអង្គារនេះ បានរិះគន់ប្រធានាធិបតីទើបជាប់ឆ្នោតថ្មីរបស់សាធារណរដ្ឋឆែក លោក Petr Pavel ដែលបាននិយាយតាមទូរស័ព្ទជាមួយប្រធានាធិបតីកោះតៃវ៉ាន់ និងរដ្ឋមន្ត្រីការបរទេសរបស់ប្រទេសនេះកាលពីថ្ងៃចន្ទម្សិលមិញ។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន AFP។
ចិនបានអះអាងថាកោះតៃវ៉ាន់ដែលគ្រប់គ្រងតាមបែបលទ្ធិប្រជាធិបតេយ្យដោយខ្លួនឯងនោះ ជាផ្នែកមួយនៃទឹកដីរបស់ខ្លួន ដែលនឹងត្រូវយកមកគ្រប់គ្រងនៅក្រោមចិនដីគោកវិញនៅថ្ងៃណាមួយ បើទោះបីជាចាំបាច់ត្រូវប្រើកម្លាំងក៏ដោយ។
អ្នកនាំពាក្យក្រសួងការបរទេសចិនលោកស្រី Mao Ning បាននិយាយថា៖ «លោក Pavel បានរំលោភឆ្លងហួសបន្ទាត់ក្រហមរបស់ចិន។ ទង្វើនេះបានរំលោភយ៉ាងធ្ងន់ធ្ងរលើកិច្ចការផ្ទៃក្នុងរបស់ចិន ហើយក៏បានប៉ះពាល់ដល់អារម្មណ៍របស់ប្រជាជនចិនផងដែរ»។
អ្នកនាំពាក្យក្រសួងការបរទេសចិនរូបនេះបន្តទៀតថា រដ្ឋាភិបាលក្រុងប៉េកាំងបានទទូចដល់រដ្ឋាភិបាលក្រុងប្រាក ឱ្យចាត់វិធានការជាបន្ទាន់ ដើម្បីលុបបំបាត់នូវការប៉ះពាល់ជាអវិជ្ជមានដែលកើតឡើងដោយការនិយាយទូរស័ព្ទនេះ និងជៀសវាងការខូចខាតមួយដែលមិនអាចជួសជុលបាន លើទំនាក់ទំនងចិននិងសាធារណរដ្ឋឆែក»។
លោក Pavel ដែលបានឈ្នះការបោះឆ្នោតប្រធានាធិបតីថ្មីរបស់សាធារណរដ្ឋឆែក កាលពីថ្ងៃសៅរ៍កន្លងទៅ នឹងចូលកាន់តំណែងជំនួសប្រធានាធិបតីឆែកបច្ចុប្បន្នលោក Milos Zeman ដែលគាំទ្រចិន នៅថ្ងៃទី៩ ខែមីនាខាងមុខនេះ។
កាលពីកន្លងទៅក្នុងខែមករានេះ លោក Zeman បាននិយាយតាមទូរស័ព្ទរយៈពេល៥៤នាទីជាមួយប្រធានាធិបតីចិនលោក Xi Jinping និងបានហៅលោក Xi ថាជាមិត្តរបស់លោក និងបានសរសើរលើទំនាក់ទំនងមិត្តភាពរវាងប្រទេសទាំង២ផងដែរ។
បន្ទាប់មក លោក Pavel ដែលទើបជាប់ឆ្នោតជាប្រធានាធិបតីថ្មីរបស់ប្រទេសឆែកនោះ ក៏បាននិយាយតាមទូរស័ព្ទជាមួយប្រធានាធិបតីតៃវ៉ាន់លោកស្រី Tsai Ing-wen ដែលបានអបអរលោកដែលបានឈ្នះការបោះឆ្នោត។
ខុទ្ទកាល័យប្រធានាធិបតីតៃវ៉ាន់និយាយថា ការសន្ទនាគ្នាតាមទូរស័ព្ទនោះ ក៏មានរដ្ឋមន្ត្រីការបរទេសតៃវ៉ាន់លោក Joseph Wu ចូលរួមផងដែរ ហើយដែលការនិយាយគ្នានោះ មានរយៈពេលជិត១៥នាទី៕
