ភ្ជាប់​ទៅ​គេហទំព័រ​ទាក់ទង

សុនខ​ចិញ្ចឹម​យក​សាច់​នៅ​កូរ៉េខាងត្បូង​ស្វែង​រក​ទ្រនំ​ថ្មី​​នៅ​ស.រ.អា​


សុនខ​មួយក្បាល​នៅក្នុងចំណោម​​សុនខ​២៣ក្បាល​ដែលត្រូវ​បាន​សង្រ្គោះ​ដោយ​អង្គការ​ Humane Society International ពីកសិដ្ឋាន​ចិញ្ចឹម​សុនខ​យក​សាច់​មួយ​នៅ​កូរ៉េខាងត្បូង​។

សុនខ​ ឬ ឆ្កែ​ចំនួន២៣ក្បាលនៅ​កសិដ្ឋាន​ចិញ្ចឹម​ឆ្កែធ្វើម្ហូប​នៅ​ប្រទេស​កូរ៉េខាងត្បូង​ត្រូវ​បាន​បញ្ជូនទៅ​មណ្ឌល​គាំពារ​សត្វនៅស.រ.អា.​នៅទីក្រុង អាឡិចសាន់ទ្រីយ៉ា (Alexandria) រដ្ឋ វឺជីនៀ (Virginia) ​ជិត​រដ្ឋធានី​វ៉ាស៊ីនតោន​(Washington) ហើយសុនខ​ទាំង​នោះ​កំពុងរង់​ចាំ​អ្នក​យកទៅ​ចិញ្ចឹម​ជាសត្វ​សំណព្វ។​

​វីអូអេភាសា​ចិនកុកងឺបាន​រាយការណ៍​ថា ​សុនខទាំង​នោះ​ពី​ដើម​ឡើយ​ត្រូវគេគ្រោង​យកទៅ​សម្លាប់​ធ្វើម្ហូប ​តែ​ជា​កុសល​ត្រូវបាន​សង្គ្រោះ​ជីវិត។​ សុនខ​ទាំងនោះភាគច្រើន​អាយុទើប​តែបាន​ប៉ុន្មានខែ​ប៉ុណ្ណោះ​ ហើយ​បាន​កើតនៅ​កសិដ្ឋានចិញ្ចឹម​សុនខ​សម្រាប់​ធ្វើម្ហូប។ កសិដ្ឋាននោះ​ស្ថិត​នៅជាយ​ក្រុងសេអ៊ូល ​ប្រទេសកូរ៉េ​ខាងត្បូង។

​ជនជាតិ​កូរ៉េចាត់ទុកសាច់សុនខ​ថា​មាន​រសជាតិ​ឆ្ងាញ់​ ហើយ​ប្រទេស​នេះ​បរិភោគ​សុនខរវាង​ពី១២ម៉ឺន​ទៅ២០​ម៉ឺនក្បាល​ក្នុង​មួយឆ្នាំ នេះបើយោង​តាម​របាយការណ៍​នានា។​តែកសិដ្ឋាន​ចិញ្ចឹម​សុនខ​សម្លាប់​យកសាច់​មួយ​នេះ បាន​សម្រេច​ចិត្តឈប់រក​ស៊ីមុខ​របរនេះ​ ដែលជា​ឱកាស​សម្រាប់សុនខ​ទាំងនោះ​រួច​ជីវិតតាម​រយៈការ​ជួយ​សង្គ្រោះរបស់​ក្រុម​គាំពារ​សិទ្ធិ​សត្វឈ្មោះ​ Humane Society International​៕​

XS
SM
MD
LG