សហរដ្ឋអាមេរិកបានបើកបណ្តាញទំនាក់ទំនងដោយផ្ទាល់ជាមួយប្រទេសកូរ៉េខាងជើង ហើយនឹងស៊ើបអង្កេតថាតើរដ្ឋាភិបាល គីម ជុងអ៊ុន យកចិត្តទុកដាក់ក្នុងការចរចាដើម្បីបោះបង់ចោលអាវុធនុយក្លេអ៊ែរបស់ខ្លួនដែរឬទេ។
នេះបើយោងតាមលោករដ្ឋមន្រ្តីការបរទេសសហរដ្ឋអាមេរិក Rex Tillerson ដែលបានស្ថិតនៅក្នុងរដ្ឋធានីប៉េកាំងកាលពីថ្ងៃសៅរ៍ដើម្បីស្វះស្វែងរកកិច្ចសហប្រតិបត្តិការរបស់ចិនស្តីពីយុទ្ធនាការនៃការដាក់សម្ពាធអតិបរមាប្រឆាំងនឹងសាធារណប្រជាធិបតេយ្យប្រជាមានិតុកូរ៉េ។
លោករដ្ឋមន្រ្តីការបរទេសអាមេរិក Tillerson បានមានប្រសាសន៍ថា រដ្ឋាភិបាលក្រុងវ៉ាស៊ីនតោនកំពុងស៊ើបអង្កេតថាតើរដ្ឋាភិបាលក្រុងព្យុងយ៉ាងចាប់អារម្មណ៍ការសន្ទនាហើយបានលាតត្រដាងថា ប្រទេសទាំង២នឹងចរចាគ្នា។
ថ្លែងជាមួយក្រុមអ្នកកាសែតដ៏តូចមួយកាលពីថ្ងៃសៅរ៍នៅក្នុងទីក្រុងប៉េកាំងបន្ទាប់ពីជំនួបជាមួយប្រធានាធិបតីចិន ស៊ី ជីងពីង ហើយនិងពួកមន្រ្តីផ្សេងទៀត លោករដ្ឋមន្រ្តីការបរទេសអាមេរិកបានមានប្រសាសន៍ថា សហរដ្ឋអាមេរិក ដឹងថា រដ្ឋាភិបាក្រុងវ៉ាស៊ីនតោនមានបណ្តាញគមនាគមន៍ដោយផ្ទាល់របស់ខ្លួនជាមួយរដ្ឋាភិបាលក្រុងព្យុងយ៉ាង។
លោករដ្ឋមន្រ្តីការអាមេរិកនិយាយថា៖ «យើងនឹងស៊ើបអង្កេត ដូច្នេះសូមរង់ចាំទទួលព័ត៌មាន។ យើងនឹងពិភាក្សាជាមួយពួកគេដោយផ្ទាល់តាមរយៈបណ្តាញរបស់យើងផ្ទាល់»។
នៅពេលដែលពួកអ្នកកាសែតសួរថា តើបណ្តាញទាំងនោះពិភាក្សាគ្នាអំពីអ្វី លោករដ្ឋមន្រ្តីការបរទេសអាមេរិក Tillerson បាននិយាយថា យើងសួរថា តើអ្នកឯងចង់ចរចាទេ?»។
សហរដ្ឋអាមេរិកនិងកូរ៉េខាងជើងបាននិយាយគ្នាតាមរយៈរដ្ឋាភិបាលផ្សេងទៀតឬអតីតមន្រ្តី៕
