ក្រសួងការពារប្រទេសសហរដ្ឋអាមេរិកគាំទ្រទាំងស្រុងដល់ការខឹងប្រឹងប្រែងរបស់ក្រសួងការបរទេសសហរដ្ឋអាមេរិកដើម្បីស្វែងរកដំណោះស្រាយខាងការទូតជាមួយកូរ៉េខាងជើង នេះតាមការបញ្ជាក់របស់លោក Jim Mattis រដ្ឋមន្ត្រីការពារសហរដ្ឋអាមេរិក។
ទោះជាយ៉ាងណាក៏ដោយ លោករដ្ឋមន្ត្រីការពារប្រទេសអាមេរិក Mattis បាននិយាយបន្ថែមទៀតថា សកម្មភាពនានារបស់ក្រសួងការបរទេសមិនមែនជាការផ្ទុយទៅនឹងអត្ថាធិប្បាយរបស់ប្រធានាធិបតីដូណាល់ ត្រាំថា ការចរចាខាងការទូតជាមួយរដ្ឋាភិបាលក្រុងព្យុងយ៉ាងគឺជាការខ្ជះខ្ជាយពេលវេលា។
លោករដ្ឋមន្ត្រីការពារប្រទេស Mattis បានប្រាប់គណៈកម្មាធិការសេវាកម្មសព្វាវុធរបស់ព្រឹទ្ធសភាថា «អ្វីដែលយើងកំពុងធ្វើគឺស៊ើបអង្កេត យើងមិនមែនចរចាជាមួយពួកកូរ៉េខាងជើងដូចការស្រងាកចិត្តរបស់ប្រធានាធិបតីអំពីការមិនចរចាជាមួយកូរ៉េខាងជើងមុនពេលវេលាសមស្របនោះ។ ដូច្នេះ ខ្ញុំមិនមើលឃើញភាពខុសគ្នាខ្លាំងដូចដែលមនុស្សខ្លះបានបកស្រាយនោះទេ»។
កាលពីថ្ងៃសៅរ៍ លោករដ្ឋមន្ត្រីការបរទេសសហរដ្ឋអាមេរិក Rex Tillerson បានទទួលស្គាល់ថា សហរដ្ឋអាមេរិកមានបណ្តាញគមនាគមន៍ការទូតដោយផ្ទាល់ដើម្បីព្យាយាមចរចាជាមួយរដ្ឋាភិបាលក្រុងព្យុងយ៉ាងអំពីការបន្តសាកល្បងអាវុធនុយក្លេអ៊ែរ និងកាំជ្រួចមីស៊ីលរបស់កូរ៉េខាងជើង។
លោកប្រធានាធិបតីត្រាំហាក់ដូចជាធ្វើផ្ទុយពីអ្នកការទូតកំពូលរបស់លោកនៅថ្ងៃបន្ទាប់ដោយនិយាយថា លោករដ្ឋមន្ត្រីការបរទេស Tillerson កំពុងខ្ជះខ្ជាយពេលវេលាដើម្បីព្យាយាមចរចាជាមួយមេដឹកនាំកូរ៉េខាងជើងនោះ៕
