ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

​គណបក្ស​ប្រជា​ធិបតេយ្យ វាយ​ប្រហារ​លើ​ប្រធានា​ធិបតី​ត្រាំ​នៅ​ក្នុងការ​ជជែក​ដេញ​ដោល​នៅពេល​ថ្មី​ៗ​នេះ


បេក្ខជន​ប្រធានាធិបតី​ខាងគណបក្សប្រជាធិបតេយ្យ Elizabeth Warren ថ្លែង​នៅ Polk County Democrats Steak Fry កាលពី​ថ្ងៃសៅរ៍ទី​២១ កញ្ញា ឆ្នាំ២០១៩។

​ប្រជែង​ឲ្យ​បាន​ទទួល​ជាបេក្ខជន​ប្រធានា​ធិបតី​របស់​គណ បក្ស​ប្រជាធិប​តេយ្យ​ទាំង​១២​នាក់ ​បាន​ចូលរួម​នៅ​ក្នុង​អ្វី​ជាពេល​វេលា​នៃ​ការជជែក​​ដេញ​ដោល​​ប្រកប​ដោយ​ការ​ឈ្លោះ​ប្រកែកគ្នា​កាល​ពី​ថ្ងៃ​អង្គារ​នៅ​ក្នុង​រដ្ឋ​អូហៃយ៉ូ។​ ​

គណ​បក្ស​ប្រជា​ធិបតេយ្យ បានធ្វើ​ការ​រិះគន់​យ៉ាង​ខ្លាំង​លើ​ប្រធានា​ធិបតី​សហរដ្ឋ​អាមេ​រិក​លោកដូណាល់ ​ត្រាំ ​ក៏ប៉ុន្តែ ​ពួកគេ ក៏​មិន​បាន​ស្ទាក់​ស្ទើរ​វាយ​ប្រ​ហារ​គ្នា​ទៅ​វិញ​ទៅ មក​លើ​បញ្ហា​នានា​ដូចជា​ការថែទាំសុខភាព ​ប្រាក់​ចំណូល​មិន​ស្មើ​គ្នា​ហើយ​នឹង​លារ​ដក​កងទ័ព​សហរដ្ឋ​អាមេរិក​ចេញ​ពី​ប្រទេស​ស៊ីរី។

រឿងសំខាន់​ជាងគេនៅ​ក្នុងការ​ជជែក​ដេញ​ដោល​កាល​ពី​ថ្ងៃ​អង្គារ គឺ​ការ​ស៊ើប​អង្កេត​ការ​ប្តឹង​ទម្លាក់​ប្រធានា​ធិបតី​ចេញ​ពី​តំណែង​ដែល​ទាក់​ទិន​និង​លោក​ប្រធា​នា​ធិបតី​ត្រាំ​និងការ​ខំ​ប្រឹងប្រែង​របស់​លោក​ដើម្បី​ធ្វើ​ឲ្យ​ប្រទេស​អ៊ុយក្រែនស៊ើប​អង្កេត​លោក Joe Biden ​ខាង​គណបក្ស​ប្រជាធិបតេយ្យ។

លោក Biden បាន​ធ្វើការ​ឆ្លើយតប​ថា៖ «លោក Rudy Giuliani ប្រធានា​ធិបតី​ត្រាំ​និងជន​ដែល​ប្រព្រឹត្ត​បទ​ឧក្រិដ្ឋ​របស់​លោក​ប្រធានា​ធិបតី ​បាន​បង្ហាញ​រួច​ហើយ​ថា ពួក​គេ​កំពុង​ភូតកុហក។ ​អ្វី​ដែល​យើងត្រូវ​ធ្វើ​នៅពេលឥឡូវនេះ គឺ​ផ្តោត​លើប្រធានា​ធិបតី​ដូណាល់ ​ត្រាំ។​ លោក​ត្រាំ ​មិន​ចង់​ឲ្យ​ខ្ញុំ​ក្លាយ​ជាបេក្ខជន​ប្រធានា​ធិបតី​ទេ។ លោក​ កំពុង​តាម​រករឿង​ខ្ញុំ ​ពីព្រោះ​តែ​លោក​ត្រាំដឹងថា ​ប្រសិនបើ ​ខ្ញុំបាន​ទទួល​ការតែងតាំង ​ខ្ញុំ ​នឹងយក​ឈ្នះ​យ៉ាង​ងាយស្រួល​បំផុត»។

បេក្ខជន​ទាំង​១២​នាក់​នោះដែល​ស្ថិត​នៅ​វេទិកាគាំទ្រ​ការស៊ើប​អង្កេត​ការ​ប្តឹង​ទម្លាក់​ប្រ ធានា​ធិបតី​ចេញពី​តំណែង ​រួមទាំង​លោកស្រី Elizabeth Warren សមា​ជិក​ព្រឹទ្ធ​សភា រដ្ឋ Massachusetts ដែល​ឥឡូវនេះការ​ស្ទង់​មតិ​ការ​បោះឆ្នោត​កំពុង​ឡើង​ជិត​ស្មើលោក Biden។​ សមាជិក​ព្រឹទ្ធ​សភា Elizabeth Warren បេក្ខជន​ប្រធា​នា​ធិបតី​ខាង​គណបក្ស​ប្រជាធិបតេយ្យ​បាន​និយាយ​ថា៖ «ការប្តឹង​ទម្លាក់​ប្រធានា​ធិបតី​ចេញពី​តំណែង ជា​ មធ្យោបាយ​មួយ​ដែល​យើង ​ធ្វើ​នេះបុរសនេះនឹង​មិនត្រូវអនុញ្ញាត​ឲ្យ​រំលោភច្បាប់ម្តង​ហើយ​ម្តងទៀត​ដោយ​មិន​មាន​ការទទួលខុស​ត្រូវនោះ​ទេ»។

ការជជែក​ដេញដោល​ក៏​បាន​លើកឡើង​ពីការ​វិលត្រឡប់​របស់​សមាជិក​ព្រឹទ្ធសភាBernie Sander មក​កាន់​យុទ្ធនាការ​ឃោសនា​បោះឆ្នោត​បន្ទាប់​ពីមាន​ជំងឺ​បេះ​ដូង​កាល​ពី​ពេល​ថ្មី​ៗ​នេះ ​ហើយ​លោក Sanders បាន​ព្រមាន​ពី​បញ្ហា​នៃ​ការ​ប្តឹង​ទម្លាក់​ប្រធានា​ធិបតី​ចេញ​ពី​តំណែង​នេះ។​ លោកសមាជិក​ព្រឹទ្ធសភា Bernie Sanders បាន​ថ្លែងថា៖

«ក៏ប៉ុន្តែ ​ខ្ញុំ​គិតពី​អ្វី​ដែលនឹងក្លាយ​ជា​មហន្តរាយ​មួយ ​ប្រសិនបើ ​ពលរដ្ឋ​អាមេរិកាំង ​ជឿ​ថា ​យើងទាំងអស់​គ្នា​កំពុងតែគិតអំពី​ប្រកួតប្រជែងជាមួយ​ប្រធានា​ធិបតី​ត្រាំ​ហើយ​យើង ​កំពុង​បំភ្លេច​ថា ពលរដ្ឋ​អាមេរិកាំង​៨៧​លាននាក់ ​មិន​មាន​ការ​ថែទាំ​សុខភាព​នោះ»។

លោក Cory Booker សមាជិក​ព្រឹទ្ធសភា​មក​ពីរដ្ឋ New Jersey ព្រួយ​បារម្ភ​ថា ពួក​អ្នក​បោះឆ្នោត អាចយល់​ថាការ​ខំ​ប្រឹង​ប្រែង​ការ​ប្តឹង​ទម្លាក់ប្រធានា​ធិបតី​ចេញ​ពី​តំណែង​របស់គណបក្ស​ប្រជាធិបតេយ្យ​ជាការ​ប្រកាន់​បក្សពួក​ខ្លាំង​ពេក។ សមាជិក​ព្រឹទ្ធសភា Cory Booker ​ជា​បេក្ខជន​ប្រធានា​ធិបតី​ខាង​គណ​បក្ស​ប្រជា​ធិបតេយ្យ​ថ្លែងថា៖ «ខ្ញុំ​បាន​យល់​ពីការ​ខឹងសម្បារ​ដែលយើងទាំងអស់​គ្នាមាន ​ក៏ប៉ុន្តែ យើងត្រូវ​តែ​អនុវត្ត​ដំណើរ​ការនៃការ​ប្តឹង​ទម្លាក់​ប្រធានា​ធិបតី​ចេញ​ពី​តំណែង​នេះ​ក្នុង​របៀប​ដែល​សុចរិត​ទៀង​ត្រង់​និង​បង្រួប​បង្រួម​ប្រទេស​របស់​យើង​និងមិន​បំបែក​ប្រទេស​របស់​យើង»។

មាន​ការជជែក​ដេញដោល​ប្រកប​ដោយ​ភាពក្លៀវក្លាស្តីពីការ​ថែទាំ​សុខភាព ​ការ​ត្រួត​ត្រា​អាវុធ​ហើយ​នឹងសម្រេចការ​ដក​កងទ័ព​សហរដ្ឋ​អាមេរិកប្រកប​ដោយ​ការ​ទាន់​ហន់​របស់ប្រធានា​ធិបតី​ត្រាំ​ចេញ​ពី​ប្រទេស​ស៊ីរី។

ការសម្រេច​ដកទ័ព​នេះ ​បាន​ធ្វើ​ឲ្យ​មានរិះគន់​ប្រកប​ដោយ​ការ​ខឹង​សម្បារ​ពីលោក Pete Buttigieg បេក្ខជន​ប្រធា​នាធិបតី​ខាង​គណបក្ស​ប្រជាធិបតេយ្យ។ លោកButtigieg បេក្ខជន​ប្រធានាធិបតី​ខាង​គណបក្ស​ប្រជាធិបតេយ្យ បាន​ថ្លែង​ថា៖«ការ​សម្លាប់​ដែល​កំពុង​បន្ត​មាន​ឡើង​នៅ​ក្នុង​ប្រទេស​ស៊ីរី មិនមែន​ដោយសារ​នៃ​វត្តមាន​របស់​អាមេរិកាំង​ទេ។ វាជាផល​វិបាក​នៃ​ការ​ដក​កងទ័ពនិងការ​ក្បត់​សម្ព័ន្ធមិត្ត​និង​សេចក្តី​ថ្លៃថ្នូរ​របស់​អាមេរិ​កាំងដែល​ធ្វើ​ឡើង​ដោយ​ប្រធានា​ធិបតី​អាមេរិ​កាំង»។

លោកស្រី Amy Klobucharសមាជិក​ព្រឹទ្ធសភា​មក​ពី​រដ្ឋ Minnesota ក៏ជា​អ្នក​រិះគន់ការ​សម្រេច​របស់​ប្រធានា​ធិបតី​ត្រាំ​ដែរ។ សមាជិក​ព្រឹទ្ធសភា Amy Klobuchar ​បាន​ថ្លែង​ថា៖ «ខ្ញុំចង់​ឮ​ពី​លោក​ប្រធានា​ធិបតី​អំពី​ការទុក​ឲ្យ​ជន​ជាតិ Kurds ដែល​ជា​សម្ព័ន្ធ​មិត្ត​របស់​យើង​ឲ្យ​គេ​សម្លាប់ ​ហើយ​បន្ទាប់​មក ​រុស្ស៊ី​ចូល​មក​ជំនួស​ដើម្បី​ការ​ពារ​ពួក​គេ តើ​ការណ៍​នេះ ​ធ្វើ​ឲ្យ​អាមេរិក​អស្ចារ្ស​ម្តងទៀត​យ៉ាង​ដូចម្តេច។ ការណ៍​នេះ ​មិន​ធ្វើ​ឲ្យ​អាមេរិក​អស្ចារ្ស​ម្តងទៀត​ទេ។ វា​ធ្វើ​ឲ្យ​ប្រទេស​រុស្ស៊ី​អស្ចារ្យ​ម្តងទៀត​វិញ»។

ពួក​គណបក្ស​ប្រជាធិបតេយ្យ ​នឹង​ធ្វើការ​ជជែក​ដេញ​ដោលលើក​ក្រោយ​នៅ​ថ្ងៃ​ទី​២០ ​ខែ​វិច្ឆិកា​នៅ​ក្នុង​រដ្ឋ Georgia៕

ប្រែសម្រួល​ដោយជឹង ប៉ូជីន

XS
SM
MD
LG