ភ្ជាប់​ទៅ​គេហទំព័រ​ទាក់ទង

logo-print
ព័ត៌មាន​​ថ្មី

សមាជិក​គណបក្ស​ប្រជាធិបតេយ្យ​នៅតែ​ខ្វែង​គំនិត​គ្នា​រឿង​ចោទ​ប្រកាន់​ទម្លាក់​លោក​ប្រធានាធិបតីTrump ពី​តំណែង


Democrats Remain Split Over Impeaching Trump
សូម​រង់ចាំ

No media source currently available

0:00 0:02:48 0:00
ទាញ​យក​ពី​តំណភ្ជាប់​ដើម

សមាជិក​គណបក្ស​ប្រជាធិបតេយ្យ​នៅតែ​ខ្វែង​គំនិត​គ្នា​រឿង​ចោទ​ប្រកាន់​ទម្លាក់​លោក​ប្រធានាធិបតីTrump ពី​តំណែង

«ខ្ញុំ​គិត​ថា សភា​ត្រូវតែ​ធ្វើ​ការ​សម្រេច​ចិត្ត​លើ​រឿង​នេះ ហើយ​លោក Trump សម​នឹង​ត្រូវ​សភា​ចោទ​ប្រកាន់​ទម្លាក់»។

បន្ទាប់ពី​របាយការណ៍​កែ​សម្រួល​ហើយ​របស់​រដ្ឋអាជ្ញា​ពិសេស​សហរដ្ឋ​អាមេរិក​លោកRobert Mueller ស្ដី​អំពី​ការ​ជ្រៀតជ្រែក​របស់​ប្រទេស​រុស្ស៊ី​នៅ​ក្នុង​ការ​បោះ​ឆ្នោត​ប្រធានាធិបតី​អាមេរិក​ឆ្នាំ ២០១៦ ត្រូវ​បាន​ផ្សព្វផ្សាយ​ជា​សាធារណៈ​កាល​ពី​សប្ដាហ៍​មុន​មក សមាជិក​គណបក្ស​ប្រជាធិបតេយ្យ​មួយ​ចំនួន ដែល​ក្នុង​នោះ​មាន​សមាជិក​ពីរ​បី​នាក់​ដែល​ឈរ​ឈ្មោះ​ជា​ប្រធានាធិបតី​នៅ​ឆ្នាំ​ក្រោយ​ផង​ដែរ បាន​បង្កើន​ការ​អំពាវនាវ​ឲ្យ​មាន​ការ​ចោទ​ប្រកាន់​ទម្លាក់​លោក​ប្រធានាធិបតី Donald Trump ពី​តំណែង។

ទោះបីជា​យ៉ាង​ណា​ក៏​ដោយ ជា​ទូទៅ សមាជិក​ខាង​គណបក្ស​ប្រជាធិបតេយ្យ​ទំនងជា​មាន​ការ​ខ្វែង​គំនិត​គ្នា​ពាក់ព័ន្ធ​នឹង​បញ្ហា​ថា​តើ​គួរ​បន្ត​ការ​ព្យាយាម​ដែល​ចំណាយ​ពេល​យូរ និង​មាន​ការ​ខ្វែង​គំនិត​គ្នា​ផ្នែក​នយោបាយ​នៅ​ក្នុង​ការ​ចោទ​ប្រកាន់​ទម្លាក់​លោក Trumpនេះ​ឬ​ក៏​យ៉ាង​ណា​នោះ។

នៅ​ពេល​កំពុង​ធ្វើ​យុទ្ធនាការ​ឃោសនា​បោះ​ឆ្នោត​នៅ​ក្នុង​រដ្ឋ New Hampshire និង​រដ្ឋ Massachusettsអ្នកស្រី Elizabeth Warren ដែល​ជា​សមាជិក​ព្រឹទ្ធសភា​ខាង​គណបក្ស​ប្រជាធិបតេយ្យ​ប្រចាំ​រដ្ឋMassachusetts និង​ជា​បេក្ខជន​ឈរ​ឈ្មោះ​ជា​ប្រធានាធិបតី កំពុង​ដឹកនាំ​ការ​ជំរុញ​ឲ្យ​មាន​ការ​ចោទ​ប្រកាន់​ដើម្បី​ទម្លាក់​លោក​ប្រធានាធិបតី Donald Trump ពី​តំណែង។

អ្នកស្រី Elizabeth Warren និយាយ​ដូច្នេះ​ថា៖ «សហរដ្ឋ​អាមេរិក​មិន​មែន​ជា​ប្រទេស​ដែល​ចាត់ទុក​ថា​ជា​រឿង​ត្រឹមត្រូវ​សម្រាប់​ករណី​ដែល​ប្រធានាធិបតី​ព្យាយាម​រារាំង​ការ​ស៊ើប​អង្កេត​អំពី​ការ​វាយ​ប្រហារ​របស់​បរទេស​លើ​ប្រទេស​ជាតិ ឬ​ក៏​ករណី​ដែល​ប្រធានាធិបតី​ព្យាយាម​រារាំង​ការ​ស៊ើប​អង្កេត​លើ​ទង្វើ​ខុស​ឆ្គង​ផ្ទាល់​ខ្លួន​នោះ»។

លោក Pete Buttigieg អភិបាល​ក្រុង South Bend រដ្ឋ Indiana ដែល​ជា​បេក្ខជន​ប្រធានាធិបតី​ម្នាក់​ទៀត មិន​បាន​បញ្ជាក់​ពី​ការ​ប្ដេជ្ញា​នៅ​ក្នុង​ការ​ចោទ​ប្រកាន់​ទម្លាក់​លោក Trumpនោះ​ទេ។

លោក Buttigiegនិយាយ​ថា៖ «ខ្ញុំ​គិត​ថា សភា​ត្រូវតែ​ធ្វើ​ការ​សម្រេច​ចិត្ត​លើ​រឿង​នេះ ហើយ​លោក Trump សម​នឹង​ត្រូវ​សភា​ចោទ​ប្រកាន់​ទម្លាក់។ ប៉ុន្តែ សម្រាប់​ខ្ញុំ ដោយសារតែ​ខ្ញុំ​មិន​មែន​ជា​សមាជិក​សភា និង​ដោយសារ​ខ្ញុំ​ជា​បេក្ខជន​ប្រធានាធិបតី ដូច្នេះ​ការ​ផ្ដោត​របស់​ខ្ញុំ​គឺ​ត្រូវ​ទម្លាក់​លោក Trump នៅ​ក្នុង​ការ​បោះ​ឆ្នោត​ឆ្នាំ ២០២០ ខាង​មុខ​នេះ»។

នៅ​ពេល​បច្ចុប្បន្ន​នេះ ប្រធាន​រដ្ឋសភា​អ្នកស្រី Nancy Pelosi បាន​ប្រឆាំង​នឹង​ការ​ចោទ​ប្រកាន់​ទម្លាក់​លោកTrump ពី​តំណែង​នេះ ប៉ុន្តែ​អ្នកស្រី​ចង់​ឲ្យ​លោក Trump និង​រដ្ឋបាល​របស់​លោក មាន​ការ​ទទួល​ខុស​ត្រូវ​ចំពោះ​មុខ​ច្បាប់​តាម​រយៈ​សវនាការ​របស់​គណៈកម្មាធិការ​សភា​ទទួល​បន្ទុក​កិច្ចការ​ត្រួត​ពិនិត្យ​រដ្ឋាភិបាល។

អ្នកស្រី Julie Pace ដែល​ជា​អ្នក​វិភាគ​របស់​កាសែត Associated Press បាន​និយាយ​ថា៖ «អ្នកស្រី Pelosi គិត​ថា ដើម្បី​ឲ្យ​ការ​ចោទ​ប្រកាន់​ទម្លាក់​លោក Trump ពី​តំណែង អាច​ដំណើរការ​ទៅ​មុខ​បាន យើង​មិន​ត្រឹមតែ​ត្រូវ​មាន​ភស្តុតាង​រឹងមាំ​ប៉ុណ្ណោះ​ទេ​ទាក់ទិន​នឹង​ការ​ចោទ​ប្រកាន់​ទម្លាក់​ពី​តំណែង​នេះ ប៉ុន្តែ​ថែម​ទាំង​ត្រូវ​មាន​លទ្ធភាព​កៀរគរ​ការ​គាំទ្រ​ពី​សមាជិក​សភា​ខាង​គណបក្ស​ប្រជាធិបតេយ្យ​ផង និង​ពី​សមាជិក​សភា​ខាង​គណបក្ស​សាធារណរដ្ឋ​ផង»។

សមាជិក​សភា​ខាង​គណបក្ស​ប្រជាធិបតេយ្យ​ភាគ​ច្រើន​នៅ​មាន​ការ​ខ្វែង​គំនិត​គ្នា។ នេះ​បើ​តាម​ការ​បញ្ជាក់​របស់​លោក Adam Schiff សមាជិក​រដ្ឋសភា​ខាង​គណបក្ស​ប្រជាធិបតេយ្យ​ប្រចាំ​រដ្ឋCalifornia។

លោក Adam Schiff និយាយ​ថា៖ «តើ​វា​ជា​ការ​ប្រសើរ​ទេ​សម្រាប់​សហរដ្ឋ​អាមេរិក​នៅ​ក្នុង​ការ​ចាប់ផ្ដើម​ដំណើរការ​ចោទ​ប្រកាន់​ទម្លាក់​ប្រធានាធិបតី​ពី​តំណែង ពីព្រោះ​បើ​មិន​ធ្វើ​ដូច្នេះ​ទេ យើង​នឹង​បញ្ជូន​សារ​មួយ​ថា ការ​ធ្វើ​ដូច្នេះ​នឹង​ស្រប​តាម​អំណាច​របស់​ប្រធានាធិបតី​នោះ? ឬ​ក៏​តើ​វា​ផ្ដល់​ប្រយោជន៍​ដល់​សហរដ្ឋ​អាមេរិក​បាន​ប្រសើរ​ប៉ុណ្ណា នៅ​ពេល​ដែល​មិន​ចាប់ផ្ដើម​ដំណើរការ​ចោទ​ប្រកាន់​ទម្លាក់​ប្រធានាធិបតី​ពី​តំណែង​នេះ ដោយសារ​យើង​ដឹង​រួច​ទៅ​ហើយ​ថា ព្រឹទ្ធសភា​នឹង​មិន​គាំទ្រ​ដំណើរការ​នេះ ដោយសារតែ​ព្រឹទ្ធសភា​ដឹកនាំ​ដោយ​គណបក្ស​សាធារណរដ្ឋ​នោះ?»។

សូម្បីតែ​សមាជិក​គណបក្ស​ប្រជាធិបតេយ្យ​ដែល​គាំទ្រ​ដំណើរការ​ចោទ​ប្រកាន់​ទម្លាក់​ប្រធានាធិបតី​ពី​តំណែង​នេះ​ក៏​ទទួល​ស្គាល់​ផង​ដែរ​ថា វា​ជា​ដំណើរការ​មួយ​ដែល​ចំណាយ​ពេល​វេលា​យូរ និង​មាន​ហានិភ័យ​នយោបាយ។ នេះ​បើ​តាម​ការ​បញ្ជាក់​របស់​លោក Matt Dallek អ្នក​វិភាគ​នៃ​សាកល​វិទ្យាល័យ George Washington។

លោក Matt Dallek បញ្ជាក់​ដូច្នេះ​ថា៖ «នៅ​ពេល​ដែល​នីតិ​វិធី​នៃ​ដំណើរការ​ចោទ​ប្រកាន់​ទម្លាក់​ប្រធានាធិបតី​ពី​តំណែង​នេះ​មាន​សន្ទុះ​ខ្លាំង​ទៅ​មុខ​នៅ​ប្រហែល​ជា​ចុង​ឆ្នាំ ២០១៩ នេះ ឬ​ក៏​ដើម​ឆ្នាំ ២០២០ ខាង​មុខ នោះ​វា​នឹង​ធ្វើ​ឲ្យ​ដំណើរការ​នេះ​កាន់តែ​ស្មុគស្មាញ ដោយសារតែ​មាន​មធ្យោបាយ​មួយ​ទៀត​នៅ​ក្នុង​ការ​ទម្លាក់​ប្រធានាធិបតី​ពី​តំណែង ដែល​នោះ​គឺ​ការ​បោះ​ឆ្នោត»។

លោក Trump បាន​ព្រលះ​នៅ​លើ Twitter ដាក់​គណបក្ស​ប្រជាធិបតេយ្យ និង​បាន​ប្រាប់​អ្នក​កាសែត​ថា លោក​គ្មាន​ការ​បារម្ភ​អ្វី​បន្តិច​សោះ​អំពី​ការ​ចោទ​ប្រកាន់​ទម្លាក់​លោក​ពី​តំណែង​នេះ។

លោក John Fortier អ្នក​ជំនាញ​នៃ​មជ្ឈមណ្ឌល​គោល​នយោបាយ​នៃ​គណបក្ស​ទាំង​ពីរ និយាយ​ថា ទាំង​អស់​នេះ​គឺ​ជា​ផ្នែក​នៃ​សមរភូមិ​នយោបាយ​ដែល​នឹង​កើត​ឡើង។

លោក John Fortier បញ្ជាក់​ដូច្នេះ​ថា៖ «ខ្ញុំ​គិត​ថា រឿង​នេះ​មិន​ទាន់​បញ្ចប់​ទេ ហើយ​យើង​នឹង​នៅតែ​និយាយ​អំពី​រឿង​នេះ។ ប៉ុន្តែ ខ្ញុំ​គិត​ថា ចំណុច​សំខាន់​បំផុត​គឺ​អ្វី​ដែល​លោក​ប្រធានាធិបតី​ចង់​ឮ​កន្លង​មក ដែល​នោះ​គឺ​ការណ៍​គ្មាន​ការ​ឃុបឃិត​ណា​មួយ​រវាង​យុទ្ធនាការ​ឃោសនា​បោះ​ឆ្នោត​របស់​លោកTrump និង​លោក Trumpផ្ទាល់ ជាមួយ​នឹង​រដ្ឋាភិបាល​រុស្ស៊ី»។

ទោះបីជា​គណបក្ស​ប្រជាធិបតេយ្យ​មិន​បន្ត​ការ​ចោទ​ប្រកាន់​ទម្លាក់​លោកTrump ពី​តំណែង​ក៏​ដោយ ក៏​របាយការណ៍​ស៊ើប​អង្កេត​របស់​លោក Mueller ទំនងជា​មាន​ការ​ចាប់​អារម្មណ៍​ច្រើន​ពី​បេក្ខជន​ប្រធានាធិបតី​ខាង​គណបក្ស​ប្រជាធិបតេយ្យ​ចាប់​ពី​ពេល​នេះ​រហូត​ដល់​ការ​បោះ​ឆ្នោត​ឆ្នាំ ២០២០ ខាង​មុខ៕

ប្រែ​សម្រួល​ដោយ ភី សុភាដា

XS
SM
MD
LG