ពួកសមាជិកសភាខាងគណបក្សប្រជាធិបតេយ្យរបស់អាមេរិក បានដាក់បង្ហាញរឿងក្តីរបស់ខ្លួនកាលពីថ្ងៃសុក្រស្តីពីការរារាំងនៃការចោទប្រកាន់របស់សភាប្រឆាំងនឹងលោកប្រធានាធិបតី ដូណាល់ ត្រាំ នៅថ្ងៃចុងក្រោយនៃការជជែកដេញដោលនៅក្នុងការជំនុំជម្រះជាប្រវត្តិសាស្រ្តរបស់ព្រឹទ្ធសភា។
លោកប្រធានាធិបតី ត្រាំ កំពុងប្រឈមការចោទប្រកាន់ដកហូតចេញពីដំណែង២ដែលចោទប្រកាន់លោកពីការរំលោភអំណាចនៃការកាន់ដំណែងជាប្រធានាធិបតីហើយនឹងការរារាំងការខំប្រឹងប្រែងរបស់សភាដើម្បីស៊ើបអង្កេតសកម្មភាពរបស់លោកដែលទាក់ទិននិងប្រទេសអ៊ុយក្រែន។
លោក Hakeem Jeffries ជាសមាជិកសភាខាងគណបក្សប្រជាធិបតេយ្យម្នាក់ក្នុងចំណោម៧នាក់ដែលធ្វើជាអ្នកចាត់ចែងការជំនុំជម្រះនោះបាននិយាយថា៖ «លោកប្រធានាធិបតីត្រាំ បានព្យាយាមបោកប្រាស់ លោក ត្រូវបានគេចាប់ ហើយបន្ទាប់មក លោកបានខិតខំធ្វើការបិទបាំង»។
លោក Jeffries បាននិយាយបន្តទៀតថា ពួកមន្រ្តីរបស់រដ្ឋបាលត្រាំ បានដឹងពីការប្រព្រឹត្តិមិនត្រឹមត្រូវរបស់លោកប្រធានាធិបតីកាលពីឆ្នាំទៅ។
លោកប្រធានាធិបតីត្រាំ បានរងការចោទប្រកាន់ពីការដាក់ការគាបសង្កត់លើប្រទេសអ៊ុយក្រែនឲ្យបើកការស៊ើបអង្កេតរឿងពុករលួយរបស់លោក Joe Biden អតីតអនុប្រធានាធិបតីដែលជាគូប្រជែងដ៏សំខាន់ម្នាក់ខាងគណបក្សប្រជាធិបតេយ្យនៅក្នុងការបោះឆ្នោតប្រធានាធិបតីឆ្នាំ២០២០២៕
