បន្ទាប់ពីការជជែកដេញដោលគ្នាពេញមួយថ្ងៃអំពីវិន័យនានាសម្រាប់សវនាការលើបទចោទដកតំណែងប្រធានាធិបតីសហរដ្ឋអាមេរិកលោក Donald Trump ព្រឹទ្ធសភា សហរដ្ឋអាមេរិកនឹងកោះប្រជុំនៅថ្ងៃពុធនេះ ដើម្បីស្តាប់ការវែកញែកពីក្រុមសមាជិករដ្ឋសភានៅថ្ងៃទីមួយនេះ ដែលនឹងធ្វើការអះអាងបញ្ជាក់ថាលោក Trump គួរតែត្រូវដកចេញពីតំណែង។
ព្រឹទ្ធសភាបានបោះឆ្នោតតាមខ្សែបន្ទាត់របស់គណបក្សគឺ៥៣ទល់នឹង៤៧សំឡេងដើម្បីសម្រេចទៅលើវិន័យនានាដែលបានស្នើឡើងដោយលោក Mitch McConnell មេដឹកនាំសំឡេងភាគច្រើននៅក្នុងព្រឹទ្ធសភា។
ការបោះឆ្នោតនេះធ្វើឡើងបន្ទាប់ពីមានការជជែកដេញដោលគ្នាច្រើនអំពីវិសោធនកម្មនានាដែលបានស្នើឡើងដោយក្រុមសំឡេងភាគតិចខាងគណបក្សប្រជាធិបតេយ្យពាក់ព័ន្ធទៅនឹងការទទួលបានឯកសារនិងសក្ខីកម្មពីក្រុមមន្រ្តីរដ្ឋបាលលោក Trump ដែលធ្លាប់ត្រូវបានស្នើឲ្យធ្វើសក្ខីកម្មនៅចំពោះមុខគណៈកម្មាធិការសភា នៅអំឡុងពេលការស៊ើបអង្កេតលើបទចោទប្រកាន់ប្រធានាធិបតី ដែលត្រូវបានរារាំងដោយសេតវិមានដែលបានលើកឡើងថាធ្វើឲ្យប៉ះពាល់ដល់សិទ្ធិអំណាចរបស់ប្រធានាធិបតីគណបក្សសាធារណរដ្ឋបានប្រើប្រាស់សំឡេងភាគច្រើនរបស់ពួកគេដើម្បីច្រានចោលរាល់វិសោធនកម្មទាំងអស់អនុលោមតាមខ្សែបន្ទាត់របស់គណបក្សគឺ៥៣ទល់នឹង៤៧សំឡេង លើកលែងតែវិសោធនកម្មមួយតែប៉ុណ្ណោះដែលទទួលបានសំឡេង៥២ទល់នឹង៤៨សំឡេង។
លោក Trump ដែលឥឡូវនេះកំពុងចូលរួមវេទិកាសេដ្ឋកិច្ចពិភពលោកនៅប្រទេស្វីសបានថ្លែងថា ក្រុមមេធាវីរបស់លោកនៅថ្ងៃពុធនេះនឹងទទួលបានលទ្ធផលល្អនៅក្នុងសវនាការនេះ៕
