ភ្ជាប់​ទៅ​គេហទំព័រ​ទាក់ទង

ក្រុម​​ប្រជាធិបតេយ្យ​អបអរ​សាទរ​ចំណែក​ក្រុម​សាធារណៈ​រដ្ឋ​រិះគន់​សុន្ទរកថា​លោក​ស្រី​ Clinton


លោក​ស្រី Clinton ​ពេល​ទៅ​ដល់​ពិធី​ទទួល​បេក្ខភាព​​នៅ​យប់​ទី​៤​និង​ចុងក្រោយ​នៃ​សន្និបាត​គណបក្ស​ប្រជាធិតេយ្យ​ នៅ​ទីក្រុង Philadelphia រដ្ឋ Pennsylvania កាល​ពី​ថ្ងៃទី២៨ ខែ​កក្កដា។

នៅ​ពេល​ដែល​លោក​ស្រី​ Hillary Clinton​ ​ថ្លែង​សុន្ទរកថា​កាល​ពី​ថ្ងៃ​ព្រហស្បតិ៍​ដើម្បី​ទទួល​ការ​តែងតាំង​បេក្ខភាព​សម្រាប់​តំណែង​ប្រធានាធិបតី​ស.រ.អា. មាន​ប្រតិកម្ម​ដូចគេ​បាន​គិត​ទុក​ជាមុ​ន​ គឺ​ថា​ពួក​ប្រជា​ធិបតេយ្យពេញ​ចិត្ត​នឹង​សុន្ទរកថា​នោះ​ ចំណែក​ពួក​សាធារណរដ្ឋ​សំខាន់ៗ​មិន​ចូល​ចិត្ត​ទេ។​

លោកស្រី ​Michelle Obama ស្ត្រី​ទី​មួយ​របស់​ស.រ.អា.​បាន​មាន​ប្រសាសន៍​ថា៖ «ខ្ញុំ​មាន​ការ​រំភើប​ចិត្ត​និង​មាន​ការ​ជំរុញ​ទឹក​ចិត្តដោយ​សុន្ទរកថា​ដែល​មាន​អំណាច​នេះដែល​ថ្លែង​ដោយ​អនាគត​ប្រធានាធិបតីរបស់​យើង!»។

លោក​ប្រធានាធិបតី បារ៉ាក់​ អូបាម៉ា​ បាន​សរសើរ​នៅ​ក្នុង​ Twitter ថា៖ «នេះ​ជា​សុន្ទរកថា​ល្អ​អស្ចារ្យ។​ លោកស្រី​បាន​ត្រូវ​ពិសោធ​ហើយ។​ លោក​ស្រី​ប្រុង​ប្រៀប​ស្រេច​ហើយ។ ​លោក​ស្រី​មិន​ដក​ថយ​ទេ»។ ព្រោះ​ហេតុនេះ​ហើយ​បាន​ជា​លោក​ស្រី ​Clinton ​គួរ​កាន់​កាប់​កិច្ចការ​នៅ​ពេល​លោក​ចាក​ចេញពី​សេតវិមាន​ក្នុង​ខែ​មករា​ខាង​មុខ​នេះ។

អ្នកស្រី​ Silda Wall Spitzer ​ប្រតិភូ​រដ្ឋ​ New York ​បាន​និយាយ​ប្រាប់​វីអូអេ​ថា៖ «នេះ​ជា​យប់​មួយ​ដ៏​អស្ចារ្យ។ ខ្ញុំ​យល់ថា​ប្រសិន​បើពិភពលោក​មិនដឹង​ថា​លោក​ស្រី​ Hillary​ Clinton ​ជា​នរណា​ នៅ​ពេល​នេះ​ពួក​គេ​មាន​គំនិត​ខ្លះៗ​ហើយ​ ថា​តើ​លោកស្រី​ជា​មនុស្ស​ប្រសើរ​បែប​ណា​ និង​ដឹង​អំពី​អំពើ​ល្អ​គ្រប់​បែប​ដែល​លោកស្រី​អាច​ធ្វើ​ឱ្យ​មាន​បាន​ក្នុង​ឋានៈ​លោក​ស្រី​ជា​មេដឹកនាំ​នៃ​ប្រទេស​នេះ​ ហើយ​ពួក​គេ​នឹង​ដឹង​ថា​ នៅ​ពេល​នេះលោក​ស្រី​ជា​មនុស្ស​ស័ក្តិ​សម​នឹង​ដឹក​នាំ​យើង​ទៅមុខ»។

គូ​ប្រជែង​របស់​លោក​ស្រី​គឺ​លោក ​Donald Trump​ បេក្ខជន​ប្រធានាធិបតី​ស.រ.អា.​ខាង​គណបក្ស​សាធារណរដ្ឋ​ បាន​ឆ្លើយតប​តាម ​Twitter ​ដោយ​ចោទ​ប្រកាន់​លោក​ស្រី​ថា​ មិន​អើពើ​ដល់​បញ្ហា​របស់​ប្រទេស​ហើយ​បាន​ស្នើ​នូវ​ដំណោះ​ស្រាយ​ដែល​ធ្វើ​ឱ្យ​ប្រជា​រាស្ត្រ​អាមេរិកាំង​មាន​ជីវភាព​យ៉ាប់​យ៉ឺន​ជាង​មុន។

លោក ​Trump ​បាន​សរសេរ​ថា៖ «របៀប​រស់​នៅ​របស់​យើង​កំពុង​ឋិត​នៅ​ក្រោម​ការ​គំរាម​កំហែង​នៃ​សាសនា​ឥស្លាម​ជ្រុល​និយម​ ហើយ​លោកស្រី​ Hillary Clinton មិន​អាច​និយាយ​ពាក្យ​ទាំង​នេះ​បាន​ទេ។ ទស្សនៈ​វិស័យ​របស់ ​Hillary ​គឺ​ពិភព​លោក​មួយ​គ្មាន​ព្រំដែន​ដែល​នៅ​ទីនោះ​ក្រុម​មនុស្ស​អ្នក​ធ្វើ​ការងារ​គ្មាន​អំណាច គ្មាន​ការងារ​ធ្វើ​និង​គ្មាន​សុវត្ថិភាព»៕

XS
SM
MD
LG