លោកប្រធានាធិបតីសហរដ្ឋអាមេរិក បារ៉ាក់ អូបាម៉ា ជាវាគ្មិនដ៏សំខាន់ម្នាក់នៅថ្ងៃទី៣នៃសន្និបាតជាតិរបស់គណបក្សប្រជាធិបតេយ្យដែលនៅទីនោះលោកប្រធានាធិបតី នឹងប្រាប់ពលរដ្ឋអាមេរិកាំងថាតើហេតុអ្វីបានជាលោក គិតថា លោកស្រីគ្លីនតុនដែលជាអតីតរដ្ឋមន្រ្តីការបរទេសរបស់លោក ត្រូវជំនួសលោកនៅសេតវិមាននៅពេលដែលលោកចាកចេញពីតំណែងនៅខែមករាឆ្នាំក្រោយ។
លោក Joe Biden អនុប្រធានាធិបតីសហរដ្ឋអាមេរិក លោក Tim Kaine សមាជិកព្រឹទ្ធសភារដ្ឋ Virginia និងជាបេក្ខជនអនុប្រធានាធិបតីរបស់លោកស្រីគ្លីនតុន និងលោក Michael Bloomberg អតីតអភិបាលក្រុងញូវយ៉ក ក៏មានគម្រោងថ្លែងសុន្ទរកថាគាំទ្រលោកស្រីគ្លីនតុន មួយថ្ងៃបន្ទាប់ប្រតិភូ បានអបអរសាទរលោកស្រីជាអ្នកបានទទួលការតែងតាំងជាជាបេក្ខជនប្រធានាធិបតីខាងគណបក្សប្រជាធិបតេយ្យសម្រាប់ឆ្នាំ២០១៦នេះ។ លោកស្រីជាស្រ្តីទីមួយដែលបានកាន់តំណែងរបស់គណបក្សនយោបាយដ៏សំខាន់មួយរបស់សហរដ្ឋអាមេរិក។
លោកប្រធានាធិបតី អូបាម៉ា បានបង្ហាញខ្លួនដោយធ្វើយុទ្ធនាការបោះឆ្នោតរួមគ្នាមួយជាមួយលោកស្រីគ្លីនតុន។ លោកប្រធានាធិបតី មានផែនការចំណាយពេលយ៉ាងច្រើននៅខែតុលាដើម្បីប្រមូលអ្នកបោះឆ្នោតឲ្យគាំទ្រលោកស្រីនៅក្នុងរយៈពេលប៉ុន្មានសប្តាហ៍មុនពេលការប្រកួតប្រជែងនៅថ្ងៃទី៨ ខែវិច្ឆិកាដើម្បីតទល់លោក Donald Trump បេក្ខជនប្រធានាធិបតីខាងគណបក្សសាធារណរដ្ឋ ដែលជាមហាសេដ្ឋីអចលនទ្រព្យដែលស្វះស្វែងកាន់តំណែងលោកទីមួយតាមការបោះឆ្នោតនេះ។
វាជាការផ្លាស់ប្តូរចាប់តាំងពីឆ្នាំ២០០៨មកនៅពេលដែលលោកអូបាម៉ា បានផ្តួលលោកស្រីគ្លីនតុននៅក្នុងការប្រកួតប្រជែងដែលមានរយៈពេលមួយខែដើម្បីឲ្យបានទទួលការតែងតាំងជាបេក្ខជនប្រធានាធិបតីខាងគណបក្សប្រជាធិបតេយ្យ ហើយនៅ ឆ្នាំនោះដែរ លោកប្រធានាធិបតី បានតែងតាំងលោកស្រីជាអ្នកការទូតរបស់សហរដ្ឋអាមេរិក បន្ទាប់ពីលោកបានឈ្នះការបោះឆ្នោតប្រធានាធិបតី៕
