ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

សកម្មជន​ប្រជាធិបតេយ្យ​ដែល​ត្រូវ​បាន​ដោះលែង​ពី​ពន្ធនាគារ​ចិន​មក​ជាប់​ក្នុង​មន្ទីរ​ឃុំឃាំង​នៅ​ហុងកុង


សកម្មជន​ហុងកុង​ម្នាក់​ក្នុង​ចំណោម​ ១២ នាក់ ដែល​ត្រូវ​បាន​ចាប់​ឃុំខ្លួន​កាល​ពី​ឆ្នាំ​មុន​នៅ​​ប្រទេស​ចិនពី​បទ​ឆ្លង​ព្រំដែន​ខុសច្បាប់ បាន​ត្រឡប់​មក​ដល់​ទីក្រុង​ហុងកុង​វិញ ហើយ​ត្រូវ​បាន​ចាប់​ឃុំ​ខ្លួន ថ្ងៃទី២២ ខែមីនា ឆ្នាំ២០២១។
សកម្មជន​ហុងកុង​ម្នាក់​ក្នុង​ចំណោម​ ១២ នាក់ ដែល​ត្រូវ​បាន​ចាប់​ឃុំខ្លួន​កាល​ពី​ឆ្នាំ​មុន​នៅ​​ប្រទេស​ចិនពី​បទ​ឆ្លង​ព្រំដែន​ខុសច្បាប់ បាន​ត្រឡប់​មក​ដល់​ទីក្រុង​ហុងកុង​វិញ ហើយ​ត្រូវ​បាន​ចាប់​ឃុំ​ខ្លួន ថ្ងៃទី២២ ខែមីនា ឆ្នាំ២០២១។

សកម្មជន​ប្រជា​ធិបតេយ្យ​ហុងកុង​ចំនួន​ ៨​ នាក់​ដែល​បាន​ជាប់​ពន្ធនាគារ​នៅ​ក្នុង​ប្រទេស​ចិន​កាលពី​ឆ្នាំ​មុន​បន្ទាប់ពី​ត្រូវ​បាន​ចាប់ខ្លួន​នៅ​ឯ​សមុទ្រ​នោះ​ បាន​មកដល់​ទីក្រុង​ហុងកុង​វិញ​ហើយ​ ហើយ​ត្រូវបាន​ឃុំខ្លួន​ភ្លាមៗ​នៅ​ថ្ងៃ​ច័ន្ទ​ដែល​បាន​ធ្វើឱ្យមាន​ការយក​ចិត្ត​ទុកដាក់​ និងព្រួយ​បារម្ភ​ពី​សហគមន៍​អន្តរជាតិចំពោះ​ពួក​គេ។ ​

ពួកគេ​ស្ថិត​ក្នុង​ចំណោម​សកម្មជន ​១២​ នាក់​ដែល​ប្រឈម​នឹង​ការ​ចោទ​ប្រកាន់​នៅ​ទីក្រុងហុងកុង​ជុំវិញ​ការ​តវ៉ា​គាំទ្រ​លទ្ធិ​ប្រជា​ធិបតេយ្យ​ដែល​ត្រូវបាន​អាជ្ញាធរ​ចិន​ដីគោក​ស្ទាក់ចាប់​កាលពី​ខែ​សីហា​ឆ្នាំ​២០២០​ នៅលើ​ទូកមួយ​ដែល​ធ្វើ​ដំណើរ​ទៅ​កោះ​តៃវ៉ាន់។​

ពួកគេ​ត្រូវ​បាន​បញ្ជូន​ទៅ​ទីក្រុង​ហុងកុង​កាលពី​ថ្ងៃច័ន្ទ​បន្ទាប់ពី​ជាប់​ពន្ធនាគារ​នៅ​ប្រទេស​ចិន​ពី​បទ​ឆ្លង​ព្រំដែន​ខុសច្បាប់ ហើយ​ត្រូវបាន​ឃុំខ្លួន​ពីបទ​ចោទ​ប្រកាន់កាលពី​មុន​នៅ​ពេល​ទៅ​ដល់ទីក្រុង​ហុងកុង។​

​ថ្លែង​ក្នុង​នាម​ក្រុម​មួយតំណាង​ឲ្យជនជាប់​ចោទ​ លោកស្រី​ Chow Hang-tung ​ដែល​ជា​សកម្មជន​និង​ជា​មេធាវី​បាន​និយាយ​ថា​ លោកស្រី​មិន​សប្បាយ​ចិត្ត​ចំពោះ​ទម្រង់​ប្រគល់​ខ្លួន​ពួក​គេ​នេះ​ទេ។​

លោកស្រី​ Chow បាន​និយាយ​នៅក្នុង​សន្និសីទ​សារព័ត៌មាន​មួយនៅខាង​ក្រៅប៉ុស្តិ៍​ប៉ូលិស​ហុងកុង​ដែល​នៅជិត​ព្រំដែន​ប្រទេស​ចិន​ដីគោក​ថា៖ ​«អាជ្ញាធរ​មិន​ដែល​ទាក់ទង​ជាមួយ​គ្រួសាររបស់​ពួកគេ​អំពីការ​ចាប់​ខ្លួន​នេះ​ទេ ​ដូច្នេះ​សមាជិក​គ្រួសារទាំង​នោះ​ត្រូវបាន​បង្ខំ​ឱ្យ​មក​ទីនេះ ​ហើយ​រង់ចាំ​ពេញ​មួយ​ថ្ងៃ​រហូត​ដល់​ពេល​នេះ»។

លោកស្រី​បាន​ថ្លែង​ទៀត​ថា៖ «សូម្បី​តែ​ក្តី​សង្ឃឹម​តិចតួច​ដូច​ជា​ ការចង់ឃើញ​ក្រុម​គ្រួសារ​របស់​ពួកគេ​ គ្រវីដៃ​ទៅពួក​គេ​ ស្រែក​ហៅ​ពួកគេ ​ក៏​ពួកគេ​នៅ​តែ​មិន​មាន​ឱកាស​ឃើញ​កូនប្រុស​របស់ពួក​គេ​ដែរ​រហូត​មកដល់​ពេល​នេះ​»។

លោក​ Johnny Patterson ប្រធាន​ផ្នែក​គោល​នយោបាយ​របស់​ក្រុម​ឃ្លាំមើល​សិទ្ធិមនុស្ស​ទីក្រុង​ហុងកុង​បាន​និយាយ​ថា​៖ «ភាព​តក់ស្លុត​គួរ​ឱ្យ​ស្អប់ខ្ពើម» ​ដែល​ក្រុម​នេះ​ប្រឈម​មុខ​ បង្ហាញ​អំពី​ស្ថានភាព​អាក្រក់​ថ្មី​នៅ​ហុងកុង។​ វា​ជា​បញ្ហា​រាល​ដាល​ហួសហេតុ»។​

ក្នុង​ចំណោម​អ្នក​ទាំង​៨​នាក់​នោះ​មាន​លោក ​Andy Li​ ដែល​ត្រូវបាន​ចាប់ខ្លួន​ក្រោម​ច្បាប់​សន្តិសុខ​ជាតិ​ទូលំ​ទូលាយ​ដែល​រដ្ឋាភិបាល​ក្រុង​ប៉េកាំង​បាន​ប្រើ​លើ​មជ្ឈមណ្ឌល​ហិរញ្ញ​វត្ថុ​អាស៊ី​កាលពី​ខែ​មិថុនា​ ឆ្នាំ២០២០ ​ដែល​ក្រុម​អ្នក​រិះគន់​និយាយ​ថា​ មាន​គោល​បំណង​កម្ចាត់​អ្នក​ប្រឆាំង។​

កាល​ពី​ខែ​ធ្នូ​ តុលាការ​ចិន​បានកាត់​ទោស​មនុស្ស​១០​នាក់​ក្នុង​ចំណោម​១២​នាក់​ឱ្យជាប់​ពន្ធនាគារ​ពី​៧ ​ខែ​ទៅ ​៣ ​ឆ្នាំ។ ​ជនជាប់ចោទ​ឈ្មោះ​ Tang Kai-yin ដែល​ត្រូវបាន​ផ្តន្ទាទោស​ឲ្យជាប់​ពន្ធនាគារ​រយៈពេល ​៣​ឆ្នាំ​ និង​ Quinn Moon ដែល​ត្រូវបាន​ផ្តន្ទាទោស​ឲ្យជាប់​ពន្ធនាគារ​រយៈពេល​២​ឆ្នាំ​ កំពុង​ជាប់នៅក្នុង​ខេត្ត​ក្វាងទុង​ភាគខាង​ត្បូង​នៅ​ឡើយ។​

អនីតិជន​ពីរ​នាក់​ដែល​ស្ថិតក្នុង​ចំណោម​មនុស្ស​១២​នាក់​នោះ​បាន​សារភាព​ថា​ មាន​កំហុស​ក្នុងការ​ឆ្លងដែន​ខុសច្បាប់​ និងត្រូវ​បាន​បញ្ជូន​ត្រឡប់​ទៅទីក្រុង​ហុងកុង​វិញ​កាល​ពី​ខែ​ធ្នូ៕

XS
SM
MD
LG