មន្រ្តីជាន់ខ្ពស់ចិនមួយរូបបាននិយាយកាលពីថ្ងៃសុក្រ ទី០៥ ខែមីនាថា គណៈកម្មាធិការមួយដែលមានទំនោរគាំទ្ររដ្ឋាភិបាលក្រុងប៉េកាំង នឹងជ្រើសរើសសមាជិកក្រុមប្រឹក្សាច្បាប់សម្រាប់ទីក្រុងហុងកុង ដើម្បីជាផ្នែកមួយនៃយុទ្ធនាការពង្រឹងការគ្រប់គ្រងរបស់ចិនមកលើទីក្រុងមួយនេះ។
អនុប្រធានគណៈកម្មាធិការអចិន្ត្រៃយ៍នៃសភាប្រជាជនចិន លោក Wang Chen បានលើកឡើងថា នៅក្នុងទីក្រុងប៉េកាំង គណៈកម្មាធិការនេះនឹងចូលរួមនៅក្នុងការចាត់តាំងបេក្ខភាព និងជ្រើសរើសសមាជិកក្រុមប្រឹក្សាច្បាប់ «មួយភាគធំ» សម្រាប់ទីក្រុងហុងកុង។
ទោះជាយ៉ាងណាក្តី លោកមិនបានបញ្ជាក់ថា អ្នកតាក់តែងច្បាប់ប៉ុន្មាននាក់នោះទេដែលគណៈកម្មាធិការនេះនឹងជ្រើសរើស។ ប៉ុន្តែសារព័ត៌មាន South China Morning Post របស់ហុងកុង បានរាយការណ៍ថា ប្រភពមិនបញ្ចេញឈ្មោះបាននិយាយថា សមាជិកក្រុមប្រឹក្សាទាំងនោះនឹងបំពេញអាសនៈចំនួន ៣០ ដែលនេះនឹងធ្វើឲ្យអាសនៈសរុបសម្រាប់ក្រុមប្រឹក្សាច្បាប់ទីក្រុងហុងកុងកើនដល់ ៩០។
ចំណាត់ការខាងលើនេះត្រូវបានចាត់ទុកថាជាការប៉ះពាល់យ៉ាងធំមួយមកលើលទ្ធិប្រជាធិបតេយ្យ ដោយក្រុមអ្នកសង្កេតការណ៍ និងពលរដ្ឋមួយចំនួននៅទីក្រុងហុងកុង ដែលធ្លាប់តែទទួលបានសេរីភាពច្រើនជាងនៅចិនដីគោក ប៉ុន្តែសិទ្ធិរបស់ពួកគេថមថយយ៉ាងខ្លាំងកាលពីឆ្នាំមុននេះ។
ក្រុមអ្នកគាំទ្រលទ្ធិប្រជាធិបតេយ្យនិយាយថា ការពង្រឹងការគ្រប់គ្រងរបស់ចិនមកលើប្រព័ន្ធនយោបាយរបស់ទីក្រុងហុងកុងបំពាននូវការសន្យារបស់ខ្លួនដែលថា នឹងផ្តល់ស្វ័យភាពរយៈពេល ៥០ឆ្នាំមកដល់ទីក្រុងហុងកុងក្រោមរចនាសម្ព័ន្ធ «ប្រទេសមួយ ប្រព័ន្ធពីរ» ដែលរចនាសម្ព័ន្ធនេះត្រូវបានអនុវត្តឡើងកាលពីឆ្នាំ ១៩៩៧ នៅពេលដែលអង់គ្លេសបានផ្តល់ការគ្រប់គ្រងលើទីក្រុងហុងកុងទៅឲ្យចិន។
ប្រធានប្រតិបត្តិទីក្រុងហុងកុងជនជាតិអង់គ្លេសចុងក្រោយបង្អស់ លោក Chris Patten បាននិយាយថា ប្រព័ន្ធបោះឆ្នោតរបស់ក្រុងនេះ «បំផ្លាញទាំងស្រុងនូវការប្តេជ្ញាចំពោះរចនាសម្ព័ន្ធប្រទេសមួយ ប្រព័ន្ធពីរ»។
ការប្រកាសរបស់លោក Wang Chen អនុប្រធានគណៈកម្មាធិការអចិន្ត្រៃយ៍សភាប្រជាជនចិន ត្រូវបានធ្វើឡើង ក្នុងរយៈពេលមួយថ្ងៃបន្ទាប់ពីចៅក្រមទីក្រុងហុងកុងមួយរូបបានបញ្ជាឲ្យមានការបន្តឃុំខ្លួនសកម្មជនគាំទ្រលទ្ធិប្រជាធិបតេយ្យចំនួន ៤៧ នាក់៕
ប្រែសម្រួលដោយលោក ណឹម សុភ័ក្រ្តបញ្ញា
