ក្រសួងសុខាភិបាលឥណ្ឌានៅថ្ងៃច័ន្ទនេះបានរាយការណ៍ពីការឆ្លងជំងឺកូវីដ១៩ថ្មីចំនួន ១០០.៦៣៦ករណីជាចំនួនឆ្លងសរុបតិចបំផុតក្នុងរយ:ពេល៦១ថ្ងៃនិងករណីស្លាប់ចំនួន ២.៤២៧ នាក់ ក្នុងអំឡុងពេល ២៤ម៉ោងចុងក្រោយនេះ។
កាលពីថ្ងៃអាទិត្យរដ្ឋមន្ត្រីសុខាភិបាលអង់គ្លេសលោក Matt Hancock បានឲ្យដឹងថា វីរុសជំងឺកូវីដ១៩បំប្លែងថ្មីដែលតា (Delta) អាចឆ្លង៤០%ច្រើនជាងវីរុសបំប្លែងថ្មីអាល់ហ្វា (Alpha)។
លោក Hancock បានប្រាប់អ្នកសារព័ត៌មានថាវីរុសជំងឺកូវីដ១៩ប្រភេទដែលតាបានក្លាយជាភ្នាក់ងារចម្លងចម្បងនៅក្នុងចក្រភពអង់គ្លេសជំនួសឲ្យវីរុសអាល់ហ្វាដែលបានរកឃើញដំបូងបំផុតនៅក្នុងទីក្រុង Kent។ វីរុសប្រភេទដែលតានេះអាចគំរាមកំហែងដល់ការដកចេញនូវបម្រាមការធ្វើដំណើរត្រឹមថ្ងៃទី២១ ខែមិថុនានេះ។
លោក Hancock បានក្រើនរំឭកពីភាពចាំបាច់ដែលពលរដ្ឋអង់គ្លេសត្រូវចាក់វ៉ាក់សំាង។ ទិន្នន័យបឋមបង្ហាញថាវ៉ាក់សំាងមានប្រសិទ្ធភាពប្រឆាំងវីរុសប្រភេទដែលតាក្រោយពេលពលរដ្ឋចាក់បានពីរដូស។
ទិន្នន័យពីសាកលវិទ្យាល័យ Johns Hopkins ឲ្យដឹងថាបច្ចុប្បន្ននេះ ៤០%នៃប្រជាជននៅចក្រភពអង់គ្លេសទំាងអស់បានចាក់វ៉ាក់សំាងបានពេញលេញ។ ករណីឆ្លងថ្មីនៃជំងឺកូវីដ១៩បានថយចុះយ៉ាងខ្លាំងចាប់តាំងពីចក្រភពអង់គ្លេសបើកយុទ្ធនាការចាក់វ៉ាក់សំាងមក។
ទិន្នន័យពីសាកលវិទ្យាល័យ Johns Hopkins ក៏បានបង្ហាញថាជំងឺកូវីដ១៩សរុបទូទំាងពិភពលោកបានកើនឡើងដល់ ១៧៣,៣ លានករណីនៅព្រឹកថ្ងៃច័ន្ទនេះ។
សហរដ្ឋអាមេរិកមានការឆ្លងជំងឺកូវីដ១៩ច្រើនជាងគេបំផុតសរុបប្រមាណ៣៣លានករណីបន្ទាប់មកគឺឥណ្ឌាដែលមានចំនួន ២៩លានករណី និងប្រទេសប្រេស៊ីលមាន ១៧លានករណី៕
