ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ក្រុមការពារក្តី​មិន​ទាន់​សម្រេច​ថា​ត្រូវ​ឱ្យ​លោក​កឹម សុខា​ឡើង​តុលាការ​ដោយ​ផ្ទាល់​នៅ​ខែ​មករា


រូបឯកសារ៖ លោកកឹម សុខា ប្រធាន​គណបក្ស​សង្គ្រោះជាតិ ជួប​ជាមួយ​ឯកអគ្គរដ្ឋទូត​សហភាព​អឺរ៉ុប​ប្រចាំកម្ពុជា ​លោកស្រី​ Carmen Moreno នៅគេហដ្ឋាន​របស់​លោក នៅ​រាជធានី​ភ្នំពេញ​ ថ្ងៃ​ទី​១៣ ខែ​វិច្ឆិកា ឆ្នាំ​២០១៩។ (ទុំ ម្លិះ/VOA)

ក្រុម​មេធាវី​ការពារ​ក្តី​ឱ្យ​មេ​បក្ស​ប្រឆាំង​នៅ​មិន​ទាន់​សម្រេច​ចិត្ត​ថា ​តើ​កូនក្តី​របស់​ពួកគេនឹង​ត្រូវ​ឡើង​តុលាការដោយ​ផ្ទាល់​នៅ​ខែ​មករា​ ដើម្បី​ការពារ​ខ្លួន​ទល់នឹង​ការ​ចោទ​ប្រកាន់​ពី​បទ​ក្បត់ជាតិ​ដោយ​ឃុបឃិត​ជាមួយ​នឹង​សហរដ្ឋ​អាមេរិក។​

លោក​ ចាន់ ចេន ​មេធាវី​មួយ​រូប​ក្នុង​ចំណោម​មេធាវី​បួន​រូប​ដែល​ការពារ​ក្តី​ឲ្យ​លោក កឹម សុខា លើក​ឡើង​ថា​ ក្រុម​មេធាវី​មិន​ទាន់​បាន​ពិភាក្សា​ជាមួយលោក កឹម សុខា ថា​តើ​កូនក្តី​របស់​លោក​គួរ​ចូល​រួម​សវនាការ​ ឬ​ក៏​អត់​នៅឡើយ។ យ៉ាង​ណា​ក្តី ​លោក​ថា ក្រុម​មេធាវី​បាន​ត្រៀម​ខ្លួន​រួច​រាល់​ហើយ​សម្រាប់​ការ​តតាំង​ក្នុង​សវនាការ​នៅខែ​ក្រោយ។

«ទោះបីជា​សាធារណជន​ជាតិ និង​អន្តរជាតិ ក៏​ដូចជា​ខ្លួន​ខ្ញុំ​ជា​មេធាវី ​ដឹង​ថា​លទ្ធផល​យ៉ាង​ណា​នោះ ក៏​ប៉ុន្តែយើង​អត់មាន​ជម្រើស​ទេ បើសិនជា​ដើម​ចោទ​គាត់​នៅ​តែ​រុញ​តាម​ផ្លូវ​តុលាការ ឬ​ក៏​តុលាការ​ពន្លឿន​នីតិវិធី​តាម​បែប​ហ្នឹង គឺ​យើង​អត់​មាន​ជម្រើស ដោយ​សារ​យើង​ជា​អ្នក​គោរព​ច្បាប់ យើង​មាន​តែ​តស៊ូ​មតិ​តាម​ផ្លូវ​តុលាការ»។

លោក ចាន់ ចេន មេធាវីមួយរូបក្នុងចំណោមបួនរូបដែលការពារក្តីឲ្យលោក កឹម សុខា ថ្លែងទៅកាន់អ្នកសារព័ត៌មាន នៅថ្ងៃទី១៧ ខែធ្នូ ឆ្នាំ២០១៩។ (កាន់ វិច្ឆិកា/VOA)
លោក ចាន់ ចេន មេធាវីមួយរូបក្នុងចំណោមបួនរូបដែលការពារក្តីឲ្យលោក កឹម សុខា ថ្លែងទៅកាន់អ្នកសារព័ត៌មាន នៅថ្ងៃទី១៧ ខែធ្នូ ឆ្នាំ២០១៩។ (កាន់ វិច្ឆិកា/VOA)

លោក​មេធាវី ចាន់ ចេន បន្ថែម​ថា សំណុំ​រឿង​របស់​លោក កឹម សុខា គួរ​តែ​ត្រូវ​បាន​ដោះ​ស្រាយ​ដោយ​ការ​ចរចា​នយោបាយ ជាជាង​ការ​ប្រើ​ប្រព័ន្ធ​តុលាការ។

អ្នកនាំពាក្យ​របស់​លោក កឹម សុខា មេដឹកនាំ​គណបក្ស​ប្រឆាំង​ដែល​កំពុង​ស្ថិត​ក្រោម​ការ​ត្រួត​ពិនិត្យ​របស់​តុលា​ក្រោម​បទ​ចោទ​សន្និដ្ឋិភាព​ជាមួយ​បរទេស និយាយ​ថា លោកកឹម សុខា នឹង​គោរព​តាម​នីតិវិធីរបស់​តុលាការ។

លោក មុត​ ចន្ថា អ្នកនាំពាក្យ និង​ជា​ជំនួយ​ការ​ផ្ទាល់​របស់​លោក កឹម សុខា បាន​ប្រាប់​អ្នកសារ​ព័ត៌មាន​បន្ទាប់​ពី​មេបក្ស​ប្រឆាំង​រូបនេះ​ បញ្ចប់​ជំនួប​ជាមួយ​ឯកអគ្គ​រដ្ឋទូត​ប្រទេស​ញូវហ្សេលែន នៅ​ថ្ងៃ​អង្គារនេះ​ថា លោក កឹម សុខា នឹង​បន្ត​អនុវត្ត​ច្បាប់ និង​ការ​តម្រូវ​របស់​តុលាការ​ជុំ​វិញ​សវនាការ​នា​ពាក់កណ្តាល​ខែ​មករា​ខាង​មុខ។ ប៉ុន្តែ​លោក​ក៏​មិន​បាន​បញ្ជាក់​ឲ្យ​ចំ​ថា​ លោក កឹម សុខា នឹង​ចូល​បង្ហាញ​ខ្លួន​ក្នុង​សវនាការ​ ឬ​អត់​នោះ​ទេ។

លោក​មុត ចន្ថា ​បាន​បន្ថែម​ថា៖ «ចង់​បញ្ជាក់ថា​ជំហរ​របស់​គាត់​ជាអ្នក​គោរព​ច្បាប់ អញ្ចឹង​អ្វី​ដែល​ច្បាប់​បានកំណត់ គឺ​លោក​នឹង​បន្ត​គោរព ក្នុង​នាម​អ្នក​នយោបាយ​ដែល​រស់​នៅ​ក្នុង​ព្រះរាជាណាចក្រ​កម្ពុជា»។

ចៅ​ក្រម​សាលា​ដំបូង​រាជធានី​ភ្នំពេញ បាន​កំណត់​យក​ថ្ងៃ​ទី​១៥ ខែ​មករា ឆ្នាំ​២០២០ ​ដើម្បី​កាត់​ក្តី​ លោក​ កឹម​ សុខា ក្នុង​សំណុំ​រឿង​ក្បត់​ជាតិ​ បន្ទាប់​ពី​ការ​ស៊ើប​អង្កេត​ដែល​បាន​អូស​បន្លាយ​អស់​រយៈពេល​ជាង​ពីរ​ឆ្នាំមកហើយ​នោះ។

លោក​ កឹម សុខា ត្រូវ​បាន​អាជ្ញាធរ​កម្ពុជា​ចាប់​ខ្លួន​ពី​ផ្ទះ​ទាំង​កណ្តាល​យប់កាល​ពី​ដើម​ខែ​កញ្ញា ឆ្នាំ​ ២០១៧​ ​ហើយ​បាន​យក​ទៅ​ដាក់​ឃុំឃាំង​ក្នុង​ពន្ធនាគារ​អស់​រយៈពេល​ជាង​១​ឆ្នាំ និង​ឃុំឃាំង​ក្នុង​ផ្ទះ​អស់​រយៈពេល​ជាង​១​ឆ្នាំ មុន​នឹង​លោក​ត្រូវ​បាន​អាជ្ញាធរ​ដោះលែង​ឲ្យ​នៅ​ក្រៅ​ឃុំ​ដោយ​មាន​លក្ខខណ្ឌ ​កាលពី​ដើម​ខែ​វិច្ឆិកា​កន្លង​ទៅ។

លោក​ កឹម សុខា ​អតីត​អនុប្រធាន​ទីមួយ​នៃ​រដ្ឋសភា​ជាតិ​ រង​ការ​ចោទ​ប្រកាន់​ថា​ ​បាន​ប្រព្រឹត្ត​អំពើ​ក្បត់​ជាតិ ដោយរួម​គំនិត​ជាមួយ​សហរដ្ឋ​អាមេរិក​ក្នុងការ​ប៉ុនប៉ង​ផ្តួល​រំលំ​រដ្ឋាភិបាល​លោក​ហ៊ុន សែន។ ទាំង​លោក​កឹម សុខា​ និង​សហរដ្ឋ​អាមេរិក​បាន​ច្រាន​ចោល​ការ​ចោទ​ប្រកាន់​នេះ។

លោក មុត ចន្ថា អ្នកនាំពាក្យ និងជាជំនួយការផ្ទាល់របស់លោក កឹម សុខា ថ្លែងទៅកាន់អ្នកសារព័ត៌មាន នៅថ្ងៃទី១៧ ខែធ្នូ ឆ្នាំ២០១៩។ (កាន់ វិច្ឆិកា/VOA)
លោក មុត ចន្ថា អ្នកនាំពាក្យ និងជាជំនួយការផ្ទាល់របស់លោក កឹម សុខា ថ្លែងទៅកាន់អ្នកសារព័ត៌មាន នៅថ្ងៃទី១៧ ខែធ្នូ ឆ្នាំ២០១៩។ (កាន់ វិច្ឆិកា/VOA)

កាល​ពី​ខែ​វិច្ឆិកា ឆ្នាំ២០១៩​ លោក​ កឹម ​សុខា ​ត្រូវ​បាន​អនុញ្ញាត​ឲ្យ​រួច​ផុត​ពី​ការ​ឃុំឃាំង​ក្នុង​ផ្ទះ ប៉ុន្តែ​ស្ថិត​ក្រោមលក្ខខណ្ឌ​របស់​តុលាការ​ថា​ លោក​មិន​អាច​ចាកចេញ​ពី​ប្រទេស​កម្ពុជា​ មិន​អាច​ចូលរួម​ក្នុង​សកម្មភាព​នយោបាយ ​និង​ត្រូវ​ឆ្លើយ​តប​នឹង​ការ​កោះហៅ​របស់​សមត្ថកិច្ច។

លោក ជិន ម៉ាលីន អ្នកនាំពាក្យ​ក្រសួង​យុត្តិធម៌ប្រាប់ VOA ថា នីតិវិធី​តម្រូវ​ឲ្យ​ជន​ត្រូវ​ចោទ​ត្រូវ​តែ​ចូល​បង្ហាញ​ខ្លួន​ក្នុង​សវនាការ​ និង​ថា ក្នុង​ករណី​ជន​ត្រូវ​ចោទ​មិន​ចូល​ខ្លួន​ជន​នោះ​ត្រូវ​មាន​មូលហេតុ​គ្រប់គ្រាន់បញ្ជាក់​ពី​អវត្តមាន។ លោក​បន្ថែម​ថា ការ​គេច​វេស​មិន​ចូល​រួម​សវនាការ នឹង​បង្កើត​ជា​បទល្មើស។​

«ជានីតិវិធី​ច្បាប់ ជនជាប់​ចោទ​ហ្នឹង​គឺ​ត្រូវ​តែ​បង្ហាញ​ខ្លួន​ហើយ លើកលែង​តែ​កាត់​កំបាំង​មុខ នៅ​ពេល​ដែល​ជន​ជាប់​ចោទ​រត់​គេច​ខ្លួន​អាហ្នឹង​គេ​កាត់​កំបាំង​មុខ តែ​បើ​អត់​ទេ អាហ្នឹង​គេ​តម្រូវ​ឲ្យ​ចូល​ខ្លួន លើក​លែង​តែ​មាន​ការ​ស្នើ​សុំ​ទេ ស្នើ​សុំ​ដោយ​មាន​មូលហេតុ​សមរម្យ​ច្បាស់​លាស់​ អាហ្នឹង​គេពិចារណា​តាម​ហ្នឹង»។

ការ​ចាប់​ខ្លួន​លោក​ កឹម សុខា​ ធ្វើ​ឡើង​មុន​បន្តិច​នៃ​ការ​រំលាយ​គណបក្ស​សង្គ្រោះ​ជាតិ ​ដែល​មាន​អ្នក​គាំទ្រជាង​៤០​ភាគរយ​ នៅ​ទូទាំង​ប្រទេស​ កាលពី​ការ​បោះឆ្នោត​ជ្រើស​រើស​ក្រុម​ប្រឹក្សា​ឃុំ​សង្កាត់​ឆ្នាំ​២០១៧។

សហគមន៍​អន្តរជាតិ​ ដែល​មាន​សហភាព​អឺរ៉ុប​ និង​សហរដ្ឋ​អាមេរិក​ជាដើម ​បាន​ថ្កោល​ទោស​រដ្ឋាភិបាល​កម្ពុជា​ ដោយ​ថា​ការ​ចាប់​ខ្លួន​លោក​ កឹម សុខា មាន​ចរិត​នយោបាយ​ និង​បាន​ទាម​ទារ​ឲ្យ​ដោះលែង​លោក​ ដោយ​ឥត​លក្ខខណ្ឌ ​ព្រម​ទាំង​អនុញ្ញាត​ឲ្យ​គណបក្ស​សង្គ្រោះ​ជាតិ​ដំណើរ​ការ​ឡើង​វិញ។​

ដោយ​រក​ឃើញ​ថា​មានការ​រំលោភ​សិទ្ធិ​មនុស្ស​ជា​បន្ត​បន្ទាប់ សហភាព​អឺរ៉ុប​បាន​ព្រមានដក​ឋានៈ​អនុគ្រោះ​ពន្ធ​ «គ្រប់​មុខ​ទំនិញ​លើក​លែង​សព្វាវុធ‍» ​ឬ «Everything But Arms ​(EBA)‍»​ ដែល​អនុញ្ញាត​ឲ្យ​កម្ពុជា​ចំណេញ​ប្រាក់​ជាង​៦០០​លាន​ដុល្លារ​ក្នុង​មួយ​ឆ្នាំៗ​ ពី​ការ​នាំ​ទំនិញ​ចូល​ទីផ្សារ​សហ​ភាព​អឺរ៉ុប​ដោយ​មិន​ចាំបាច់​បង់​ពន្ធ ​ប្រសិន​បើ​រដ្ឋាភិបាល​របស់​លោក​នាយក​រដ្ឋ​មន្ត្រី​ ហ៊ុន សែន​ មិន​ស្តារ​ស្ថាន​ភាព​សិទ្ធិ​មនុស្ស ​និង​ប្រជាធិបតេយ្យ។

សហភាព​អឺរ៉ុបនឹង​សម្រេច​ជា​ចុង​ក្រោយ​នៅ​ខែ​កុម្ភៈ ឆ្នាំ​២០២០​ថា​ ​ត្រូវ​ព្យួរ​ការ​អនុគ្រោះ​ពន្ធ EBA ​ឬ​យ៉ាង​ណា៕

តួលេខនៃករណីឆ្លងជំងឺកូវីដ១៩

XS
SM
MD
LG