គណៈកម្មការនៃការជជែកដេញដោលរបស់បេក្ខជនប្រធានាធិបតីសហរដ្ឋអាមេរិក (Commission on Presidential Debates) បានបញ្ជាក់ថា ខ្លួនមានបំណងរឹតបន្តឹងរបៀបនៃការជជែកដេញដោល មុនពេលលោកប្រធានាធិបតី Donald Trump និងលោក Joe Biden ដែលជាគូប្រជែងរបស់លោកខាងគណបក្សប្រជាធិបតេយ្យ ប្រឈមមុខគ្នាជាលើកទីពីរ បន្ទាប់ពីការតតាំងលើកដំបូងរបស់លោកទាំងពីរ កាលពីថ្ងៃអង្គារត្រូវបានចាត់ទុកថា ជាការជជែកដេញដោលដ៏អាក្រក់បំផុតនៅក្នុងប្រវត្តិសាស្ត្រនយោបាយសហរដ្ឋអាមេរិក។
បេក្ខជនទាំងពីរ ជារឿយៗ បានបង្អាក់គ្នាទៅវិញទៅមក ឬនិយាយក្នុងពេលតែមួយ ដោយអ្នកកាសែតទូរទស្សន៍ Fox News លោក Chris Wallace ដែលជាអ្នកសម្របសម្រួលការជជែកដេញដោលនេះ បានបន្ទោសលោក Trump ថា មិនធ្វើតាមវិន័យដែលអនុញ្ញាតឲ្យបេក្ខជននីមួយៗឆ្លើយសំណួរដោយគ្មានការបង្អាក់។
គណៈកម្មការឯករាជ្យដែលរៀបចំការជជែកដេញដោលនេះ បានលើកឡើងថា របៀបនៃការជជែកដេញដោលត្រូវការរចនាសម្ព័ន្ធបន្ថែម «ដើម្បីធានាថា ការពិភាក្សាមានរបៀបរៀបរយប្រសើរជាងមុន» បន្ទាប់ពីការជជែកដេញដោលកាលពីថ្ងៃអង្គារ នៅឯសាកលវិទ្យាល័យ Case Western Reserve ក្នុងទីក្រុង Cleveland រដ្ឋ Ohio មានលក្ខណៈច្របូកច្របល់មក។
គណៈកម្មការនេះបានបន្ថែមថា ខ្លួននឹងដាក់ការរឹតត្បិតថ្មីនៅពេលឆាប់ៗនេះ មុនពេលការជជែកដេញដោលលើកទី ២ និងទី ៣ រវាងលោក Trump និងលោក Biden ចូលមកដល់នៅថ្ងៃទី ១៥ និងទី ២២ ខែតុលានេះ។
អ្នកដែលរិះគន់លើការជជែកដេញដោលលើកទីមួយរវាងបេក្ខជនទាំងពីរ បានស្នើថា នៅពេលដែលបេក្ខជនណាម្នាក់កំពុងនិយាយ ឧគ្ឃោសនសព្ទរបស់បេក្ខជនម្នាក់ទៀតគួរត្រូវបិទ។
លោក Trump ក្នុងអំឡុងពេលនៃការឃោសនា កាលពីល្ងាចថ្ងៃពុធ នៅអាកាសយានដ្ឋានមួយក្នុងទីក្រុង Duluth រដ្ឋ Minnesota បានប្រកាសខ្លួនលោកថា ជាអ្នកឈ្នះនៃការជជែកដេញដោលលើកទីមួយ ហើយបានរិះគន់អ្នកសម្របសម្រួលការជជែកដេញដោល ដោយនិយាយថា «ខ្ញុំបានជជែកដេញដោលជាមួយមនុស្ស ២ នាក់កាលពីយប់មិញ» ដែលនោះគឺលោក Biden និងលោក Wallace។
លោក Biden ដែលជាបេក្ខជនខាងគណបក្សប្រជាធិបតេយ្យ បានប្រាប់អ្នកយកព័ត៌មាននៅក្នុងរដ្ឋOhio កាលពីថ្ងៃពុធម្សិលមិញថា៖ «លោកទន្ទឹងរង់ចាំ» ជជែកដេញដោលជាមួយលោក Trump ម្តងទៀត។ លោក Biden បានបញ្ជាក់ថា ការសម្ដែងឡើងរបស់លោក Trump នៅក្នុងការជជែកដេញដោលកាលពីយប់ថ្ងៃអង្គារ គឺជា «ការអាម៉ាស់របស់ជាតិ»៕
