ប៉ូលីសក្នុងតំបន់ខាងកើតនៃប្រទេសអ៊ុយក្រែនបាននិយាយថា គ្រាប់រ៉ុកកែតបានសម្លាប់មនុស្សយ៉ាងហោចណាស់ក៏១០នាក់នៅក្នុងទីក្រុងកំពង់ផែ Mariupol ប៉ុន្មានម៉ោងបន្ទាប់ពីមេដឹកនាំឧទ្ទាមកំពូលម្នាក់នៅក្នុងតំបន់ Donetskបាននិយាយថានឹងគ្មានការចរចាសន្តិភាពជាមួយរដ្ឋាភិបាលទីក្រុងគាវ (Kyiv)ទៀតទេ។
ទីភ្នាក់ងារសារព័ត៌មាន Reuters បានដកស្រង់សម្តីប្រធានប៉ូលីសមកចុះផ្សាយថា ក្រុមឧទ្ទាមបានបាញ់ផ្លោងតំបន់មានលំនៅដ្ឋាននៅក្នុងទីក្រុងនោះ។
កាលពីថ្ងៃសុក្រលោកAlexander Zakharchenko គាំទ្រដោយប្រទេសរុស្ស៊ី ដែលប្រកាសខ្លួនឯងថាជាមេដឹកនាំសាធារណរដ្ឋប្រជាមានិត Donetsk បាននិយាយថា កងទ័ពរបស់លោកនឹងវាយប្រហារកងទ័ពរដ្ឋាភិបាលរហូតទាល់តែទៅដល់ព្រំដែននៃតំបន់ Donetsk។ លោកបាននិយាយទៀតថា ក្រុមប្រយុទ្ធរបស់លោកបានរុញច្រានប្រឆាំងកងទ័ពអ៊ុយក្រែន បន្ទាប់ពីបានកាន់កាប់ព្រលានយន្តហោះដែលមានការប្រទាញប្រទង់គ្នាយ៉ាងយូរកាលពីថ្ងៃព្រហស្បតិ៍។
ឥឡូវនេះក្រុមទាមទារបំបែករដ្ឋបានត្រួតត្រាទឹកដីសំខាន់ៗនៅក្នុងតំបន់ Donetsk និងតំបន់ Luhansk នៅជិតព្រំដែនប្រទេសរុស្ស៊ី បន្ទាប់ពីការចាប់ផ្តើមបះបោររបស់ខ្លួនកាលពី៩ខែមុន ប្រឆាំងនឹងការគ្រប់គ្រងរបស់អ៊ុយក្រែន។
លោក Zakharchenko ត្រូវបានសារព័ត៌មានរុស្ស៊ីដកស្រង់សម្តីមកចុះផ្សាយថា លោកមើលឃើញថា «គ្មានចំណុចណា» នៅក្នុងការចរចាសន្តិភាពបន្តទៀតទេ។លោកបានប្រាប់ទីភ្នាក់ងារសារព័ត៌មាន Interfax ថាការចរចាសន្តិភាពទីក្រុង Minsk ដែលបានព្រមព្រៀងគ្នាកាលពីឆ្នាំទៅនោះ គឺជា «កំហុសមួយ» ដែល «យើងនឹងមិនធ្វើម្តងទៀត» ។
នៅព្រឹត្តិការណ៍ដាច់ដោយឡែកមួយ ទីភ្នាក់ងារសារព័ត៌មាន Interfax របស់រុស្ស៊ី បានដកស្រង់សម្តីលោក Eduard Basurin មន្រ្តីយោធារបស់ក្រុមឧទ្ទាមមកចុះផ្សាយថា កងទ័ពអ៊ុយក្រែនជាង៧៥០នាក់ត្រូវបានសម្លាប់ក្នុងអំឡុងពេលថ្មីៗនេះ នៅក្នុងការប្រយុទ្ធនៅព្រលានយន្តហោះទីក្រុង Donesskដែលឥឡូវនេះត្រូវបានបំផ្លាញ៕
