នៅក្នុងរបាយការណ៍ ដែលបានចេញផ្សាយជាសាធារណៈកាលពីដើមខែវិច្ឆិកា កងទ័ពជើងទឹកអាមេរិកបានសន្និដ្ឋានថា «មានកំហុសជាច្រើន» នៅលើថ្នាក់ដឹកនាំ និងក្រុមនាវិក ដែលនាំឲ្យមានព្រឹត្តិការណ៍មនុស្សស្លាប់។
នាវាចម្បាំង USS John S. McCain បានបុកនឹងនាវាដឹកប្រេងកាលពីខែសីហា នៅច្រកសមុទ្រប្រទេសសិង្ហបុរី ដោយធ្វើឲ្យកងនាវិកអាមេរិក ១០នាក់ បានស្លាប់និង ៥នាក់ទៀតរងរបួស។ នាវាចម្បាំងមួយទៀត គឺ នាវា USS Fitzgerald បានបុកនឹងនាវាដឹកកុងតឺន័រ នៅក្នុងដែនសមុទ្រប្រទេសជប៉ុនកាលពីខែមិថុនា ហើយបានសម្លាប់មនុស្ស ៧នាក់។
ករណីប៉ះទង្គិចគ្នានេះ បានធ្វើឲ្យកងទ័ពជើងទឹកអាមេរិកធ្វើការត្រួតពិនិត្យការប្រតិបត្តិការរបស់ខ្លួននៅទូទាំងពិភពលោកឡើងវិញ។ មុននឹងការត្រួតពិនិត្យនេះបានបញ្ចប់ លោក Richardson បានបន្ទោសលើល្បឿនប្រតិបត្តិការដ៏ប្រញាប់ប្រញាល់ ភាពមិនច្បាស់លាស់នៃថវិកា និងថ្នាក់ដឹកនាំក្នុងកងទ័ពជើងទឹក ដែលឲ្យតម្លៃលើបេសកកម្មរបស់ខ្លួន ជាជាងសុវត្ថិភាព ដែលជាហេតុធ្វើឲ្យមានឧបទ្ទវហេតុស្លាប់មនុស្សនេះ។
លោក Richardson បានប្រាប់ទៅគណៈកម្មាធិការព្រឹទ្ធសភាផ្នែកសេវាកម្មយោធា កាលពីខែកញ្ញាថា បរាជ័យនៃភាពជាអ្នកដឹកនាំក្នុងប្រតិបត្តិការ គឺជា កត្តាចម្បងដែលធ្វើឲ្យកងទ័ពជើងទឹកខ្វះការត្រៀមខ្លួន។
លោក Richardson បានធ្វើសក្ខីកម្មថា៖ «ខ្ញុំដឹងច្បាស់ពីបញ្ហានេះ»។
ការត្រួតពិនិត្យរកឃើញថា ក្នុងអំឡុងពេលនៃឧបទ្ទវហេតុនាវា USS John S. McCain នៅក្នុងច្រកសមុទ្រប្រទេសសិង្ហបុរី ក្រុមនាវិកបានបាត់បង់ការយល់ដឹងពីស្ថានភាពនៅក្នុងតំបន់ដែនសមុទ្រដ៏មមាញឹកមួយ ដោយសារតែកំហុសក្នុងប្រតិបត្តិការប្រព័ន្ធចង្កូត និងប្រព័ន្ធជំរុញរបស់នាវា។ ក្រុមនាវិកក៏មិនបានអនុវត្តតាមនូវអ្វីគេហៅថា «ច្បាប់អន្តរជាតិនៃផ្លូវទឹក» ដែលជាប្រព័ន្ធច្បាប់គ្រប់គ្រងភាពបត់បែនរបស់នាវា នៅពេលមានហានិភ័យការប៉ះទង្គិចកប៉ាល់។ លើសពីនេះទៀត អ្នកសង្គេតការណ៍លើប្រព័ន្ធចង្កូត និងប្រព័ន្ធជំរុញរបស់នាវា ត្រូវបានគេរកឃើញថា មិនមានសមត្ថភាព និងចំណេះដឹងគ្រប់គ្រាន់លើប្រព័ន្ធទាំងនោះទេ។
នៅក្នុងអំឡុងពេលឧបទ្ទវហេតុនាវា USS Fitzgerald នៅឯភាគនិរតីប្រទេសជប៉ុន កងទ័ពជើងទឹកបានរកឃើញថា «ក្រុមសង្កេតការណ៍» នៅលើនាវា Fitzgerald មិនបានអនុវត្តនីតិវិធីដែនសមុទ្រជាមូលដ្ឋានឡើយ។ ពួកគេក៏មិនបានជូនដំណឹងដល់មន្ត្រីបញ្ជានាវានេះ នៅពេលកំពុងបើកបរកៀកនឹងនាវាក្បែរនោះ ដូចដែលបទប្បញ្ញត្តិកងទ័ពជើងទឹកតម្រូវឲ្យរាយការណ៍។ ហើយពួកគេក៏មិនបានប្រកាន់ខ្ជាប់តាមច្បាប់សមុទ្រអន្តរជាតិ នៃការរក្សាផ្លូវទឹកខាងមុខឲ្យនៅទំនេរសម្រាប់នាវាដែលកំពុងខិតមកជិត ហើយប្រសិនបើអាចចៀសវាងមិនឆ្លងកាត់មុខនាវាដែលកំពុងខិតមកជិតនោះ៕
ប្រែសម្រួលដោយ នូវ ពៅលក្ខិណា
