ភ្លៀងនៅរដូវមូសុងបានបណ្តាលឱ្យមានទឹកជំនន់នៅក្នុងផ្នែកនានានៃប្រទេសឥណ្ឌាក្នុងសប្តាហ៍នេះដែលបាននាំឱ្យមនុស្សជាង១ពាន់២រយនាក់ស្លាប់នៅទូទាំងទ្វីបអាស៊ីខាងត្បូង។
អាគារមួយបានរលុំនៅថ្ងៃព្រហស្បតិ៍នេះក្នុងក្រុង Mumbai ប្រទេសឥណ្ឌាបណ្តាលឱ្យមនុស្សយ៉ាងតិចណាស់ពីរនាក់ស្លាប់ និងធ្វើឱ្យមនុស្សប្រមាណ៣០នាក់ទៀតជាប់គាំងក្នុងទីនោះនៅក្រោយរយៈពេលមានភ្លៀងច្រើនថ្ងៃនាំឱ្យក្រុងនេះមានទឹកជំនន់។
ពួកអ្នកជួយសង្គ្រោះបានទាញយកមនុស្សមួយចំនួនចេញពីកម្ទេចអាគារនេះ។ មន្ត្រីប៉ូលិសម្នាក់បាននិយាយប្រាប់ពួកអ្នកកាសែតថា មានគ្រួសារ៩រស់នៅក្នុងអាគារនោះ។
ភ្លៀងនៅរដូវមូសុងបានធ្វើឱ្យមានទឹកជំនន់នៅក្នុងរដ្ឋធានីពាណិជ្ជកម្មនៃប្រទេសឥណ្ឌាក្នុងសប្តាហ៍នេះ ហើយពួកអ្នកព្យាករណ៍អាកាសបាននិយាយថានៅថ្ងៃព្រហស្បតិ៍នេះអាចមានភ្លៀងច្រើនថែមទៀតនៅក្នុងតំបន់នោះនៅមុនមានការធូរស្រាលនៅថ្ងៃសុក្រស្អែក។
ប្រទេសនៅជិតខាងប្រទេសឥណ្ឌាក៏បានរងគ្រោះដោយសាររដូវមូសុងនេះដែរដែលចាប់ផ្តើមក្នុងខែមិថុនាហើយមានផលប៉ះពាល់ដល់មនុស្សជាង៤០លាននាក់។
មានភ្លៀងធ្លាក់ខ្លាំងក្នុងក្រុង Karachi ប្រទេសប៉ាគីស្ថាននៅថ្ងៃព្រហស្បតិ៍នេះហើយគេរំពឹងថានឹងមានខ្យល់ព្យុះនៅក្នុងប្រទេសនេះក្នុងរយៈពេលបីបួនថ្ងៃ។
នៅក្នុងប្រទេសបង់ក្លាដែស និងប្រទេសនេប៉ាល់ក៏មានទឹកជំនន់ខ្លាំងក្លាដែរដែលបានបង្ខិតបង្ខំមនុស្សរាប់សែននាក់ឱ្យចាកចេញពីផ្ទះសម្បែងពួកគេ៕
