ការរញ្ជួយដីមួយដែលបានកើតឡើងកាលពីថ្ងៃអាទិត្យម្សិលមិញនៅតាមព្រំដែនរវាងប្រទេសអ៊ីរ៉ាក់ និងអ៊ីរ៉ង់ បានសម្លាប់មនុស្សជាង ៣ រយនាក់ និងធ្វើឲ្យមនុស្ស ២ ពាន់ ៥ រយនាក់ផ្សេងទៀតរងរបួស។
ប្រព័ន្ធផ្សព្វផ្សាយរបស់រដ្ឋាភិបាលអ៊ីរ៉ង់បានរាយការណ៍នៅថ្ងៃចន្ទនេះថា មនុស្សចំនួន ៣២៨ នាក់ត្រូវបានសម្លាប់ ដែលជនរងគ្រោះភាគច្រើនមានទីលំនៅនៅក្នុងក្រុង Sarpol-e-Zahab នៃខេត្ត Kermanshah។
ក្រុមអ្នកជួយសង្គ្រោះបានធ្វើការពេញមួយយប់ឈានចូលថ្ងៃចន្ទនេះ ដើម្បីជួយសង្គ្រោះជនរងគ្រោះ។
ទីភ្នាក់ងារភូគព្ភសាស្ត្រសហរដ្ឋអាមេរិកបានបញ្ជាក់ថា គ្រោះរញ្ជួយដីនេះមានកម្រិត ៧,៣ វ៉ិចទ័រ ដែលចំណុចកណ្ដាលនៃការរញ្ជួយកើតឡើងនៅជិតក្រុង Halabja ក្នុងតំបន់ Kurdistan នៃប្រទេសអ៊ីរ៉ាក់។
នាយករដ្ឋមន្ត្រីអ៊ីរ៉ាក់លោក Haider al-Abadi បាននិយាយថា លោកដឹកនាំទីភ្នាក់ងារសុខាភិបាល និងជំនួយមនុស្សធម៌ ដើម្បីធ្វើអ្វីដែលអាចធ្វើបានក្នុងការជួយសង្គ្រោះជនរងគ្រោះ។
មានគ្រោះរញ្ជួយដីតូចៗមួយចំនួនបានកើតឡើងក្រោយពីគ្រោះរញ្ជួយដីដ៏ធំខាងលើបានកើតឡើងរួចមក ដែលជាហេតុធ្វើឲ្យប្រជាពលរដ្ឋគេចចេញពីផ្ទះសម្បែងរបស់ពួកគេកាលពីយប់មិញ។
គ្រោះរញ្ជួយដីនេះក៏បានកាត់ផ្ដាច់សេវាអគ្គិសនី និងទូរស័ព្ទនៅតាមក្រុងជាច្រើនរបស់ប្រទេសអ៊ីរ៉ង់ និងអ៊ីរ៉ាក់ ដែលជាហេតុធ្វើឲ្យមានការលំបាកបន្ថែមទៀតដល់ក្រុមអ្នកជួយសង្គ្រោះ៕
