នៅសល់ពេល ១៤ ថ្ងៃទៀតប៉ុណ្ណោះ មុនការបោះឆ្នោតជ្រើសរើសប្រធានាធិបតីសហរដ្ឋអាមេរិកចូលមកដល់ បេក្ខជនប្រធានាធិបតីខាងគណបក្សប្រជាធិបតេយ្យលោក Joe Biden នៅបន្តនាំមុខលោកប្រធានាធិបតី Donald Trump ខាងគណបក្សសាធារណរដ្ឋ ហើយប្រជាពលរដ្ឋអាមេរិកាំងរាប់លាននាក់ បានបោះឆ្នោតមុនថ្ងៃបោះឆ្នោតរួចហើយ។
ការស្ទង់មតិបង្ហាញថា លោក Biden នាំមុខលោក Trump ប្រមាណ ៩% ឬ ១០% នៅទូទាំងប្រទេស ហើយប្រហែលពាក់កណ្ដាលនៃចំនួននោះ នាំមុខនៅរដ្ឋសំខាន់ៗ ដែលជារដ្ឋដែលអាចកំណត់អំពីលទ្ធផលបោះឆ្នោតបាន។
ប៉ុន្តែលោក Trump នៅតែមានទំនុកចិត្តថា លោកនឹងជាប់ឆ្នោតនៅអាណត្តិទីពីរជាបន្តទៀត។
លើកនេះ មានការបោះឆ្នោតមុនថ្ងៃបោះឆ្នោតច្រើនមិនធ្លាប់មាននៅក្នុងសហរដ្ឋអាមេរិក ដែលមនុស្សជិត ២៨ លាននាក់ បានទៅបោះឆ្នោតរួចទៅហើយ តាមរយ:ការទៅបោះដោយផ្ទាល់ ឬផ្ញើតាមប្រៃសណីយ៍។ តួលេខនេះ ស្មើនឹងប្រហែល ២០% នៃចំនួនសន្លឹកឆ្នោតសរុប នៅពេលដែលលោក Trump ឈ្នះអ្នកស្រី Hillary Clinton ខាងគណបក្សប្រជាធិបតេយ្យនៅក្នុងឆ្នាំ ២០១៦។
អ្នកបោះឆ្នោតមួយចំនួន បានឲ្យដឹងថា ពួកគេបានបោះឆ្នោតមុនថ្ងៃបោះឆ្នោត ដើម្បីចៀសវាងការជួបគ្នាដោយផ្ទាល់ជាមួយអ្នកបោះឆ្នោតផ្សេងទៀតនៅឯស្ថានីយ៍បោះឆ្នោតនៅថ្ងៃទី ៣ ខែវិច្ឆិកា ខាងមុខ នៅក្នុងអំឡុងពេលដែលសហរដ្ឋអាមេរិកកំពុងមានការឆ្លងរាតត្បាតនៃជំងឺកូវីដ១៩។
អ្នកគាំទ្រគណបក្សប្រជាធិបតេយ្យមួយចំនួនបាននិយាយថា មូលហេតុដែលពួកគេបោះឆ្នោតមុនថ្ងៃបោះឆ្នោត គឺដោយសារចង់ស្ថិតក្នុងចំណោមអ្នកបោះឆ្នោតដំបូងគេដើម្បីទម្លាក់លោក Trump។
ចំណែកឯការស្ទង់មតិវិញ បានបង្ហាញថា ភាគច្រើននៃអ្នកគាំទ្រគណបក្សសាធារណរដ្ឋ បានប្រកាសអំពីបំណងរបស់ពួកគេនៅក្នុងការទៅបោះឆ្នោតដោយផ្ទាល់នៅថ្ងៃបោះឆ្នោត៕
