ការបោះឆ្នោតជ្រើសរើសប្រធានាធិបតីសហរដ្ឋអាមេរិកបានជិតដល់ទីបញ្ចប់ហើយដោយអ្នកបោះឆ្នោតខ្លះបានបោះឆ្នោតរួចស្រេចហើយដោយផ្ញើសន្លឹកឆ្នោតតាមប្រៃសណីយ៍ឬទៅបោះឆ្នោតនៅឯការិយាល័យបោះឆ្នោតមុនថ្ងៃបោះឆ្នោតផ្លូវការនៅថ្ងៃទី៣ ខែវិច្ឆិកា។
ហើយនៅពេលដែលយុទ្ធនាការឃោសនារកសំឡេងឆ្នោតឱ្យលោក ប្រធានាធិបតី Donald Trump ខាងគណបក្សសាធារណរដ្ឋនិងគូប្រជែងរបស់លោកខាងគណបក្សប្រជាធិបតេយ្យគឺលោកអតីតអនុប្រធានាធិបតី Joe Biden បានឈានដល់ការជំរុញចុងក្រោយបង្អស់ដើម្បីស្វែងរកការគាំទ្រ ពួកមន្ត្រីខាងសន្តិសុខនៃការបោះឆ្នោតបានបង្ហាញសញ្ញាថាការបោះឆ្នោតលើកនេះមិនដូចការបោះឆ្នោតឯទៀតៗក្នុងប្រវត្តិសាស្ត្រកាលពីពេលថ្មីៗនេះទេ។
ដោយសារមានការរាត្បាតជាសាកលនៃជំងឺកូវីដ១៩ពួកអ្នកជំនាញខ្លះទស្សន៍ទាយថាមានមនុស្ស៨០លាននាក់ក្នុងប្រទេសអាមេរិកនឹងបោះឆ្នោតដោយផ្ញើសន្លឹកឆ្នោតតាមប្រៃសណីយ៍សម្រាប់ការបោះឆ្នោតក្នុងខែវិច្ឆិកាបើប្រៀបធៀបនឹងប្រមាណ៣៣លាននាក់ដែលបានបោះឆ្នោតដោយផ្ញើសន្លឹកឆ្នោតតាមប្រៃសណីយ៍ឬការបោះឆ្នោតដោយអវត្តមាននៅថ្ងៃបោះឆ្នោតប្រធានាធិបតីកាលពីឆ្នាំ២០១៦។
លោក Christopher Krebs ជានាយកនៃទីភ្នាក់ងារសន្តិសុខតាមអ៊ីនធឺណិតនិងសន្តិសុខហេដ្ឋារចនាសម្ព័ន្ធហៅកាត់ថាCISA។ នៅក្នុងការពិភាក្សាមួយនៅក្រុមហ៊ុនអប់រំអំពីសន្តិសុខអនឡាញ Billington CyberSecurity កាលពីខែកញ្ញាលោកបាននិយាយថា៖ «សូមឲ្យមានការអត់ធ្មត់បន្តិច។ ការរាប់សន្លឹកឆ្នោតនៃការបោះឆ្នោតលើកនេះ ប្រហែលជានឹងត្រូវចំណាយពេលយូរជាងមុនបន្តិចហើយ»។
ការព្រមានរបស់លោក Krebs បានត្រូវបន្ទរដោយពួកមន្ត្រីឯទៀតៗក្នុងថ្នាក់ជាតិ រដ្ឋនិងមូលដ្ឋានដែលបានសុំដល់ក្រុមអ្នកបោះឆ្នោតអាមេរិកាំងនិងបណ្តាញផ្សាយព័ត៌មានឱ្យសម្របសម្រួលការរំពឹងរបស់ពួកគេ។
នៅពេលនិយាយត្រួសៗប្រាប់ពួកអ្នកកាសែតកាលពីខែសីហាមន្ត្រីជាន់ខ្ពស់ម្នាក់នៃក្រសួងសន្តិសុខមាតុភូមិបានថ្លែងថា៖ «ការពិតថ្ងៃបោះឆ្នោតលែងជាថ្ងៃសំខាន់ទៀតហើយ។ អ្វីដែលសំខាន់គឺរយៈពេលនៃការបោះឆ្នោត»។
ទោះជាយ៉ាងនេះក៏ដោយ ក៏លោកប្រធានាធិបតី Trump មិនបានបង្ហាញការអត់ធ្មត់បែបនេះទេ។
លោក Trump បាននិយាយប្រាប់ពួកអ្នកសារព័ត៌មាននៅក្នុងសន្និសីទកាសែតមួយកាលពីខែកក្កដាថា៖ «ខ្ញុំចង់បានលទ្ធផលនៃការបោះឆ្នោត។ ខ្ញុំមិនចង់រង់ចាំរាប់សប្តាហ៍ ឬរាប់ខែទេ»។
លោកប្រធានាធិបតីក៏មិនព្រមនិយាយថាតើលោកនឹងទទួលយកលទ្ធផលនៃការបោះឆ្នោតនេះឬទេប្រសិនបើលោកចាញ់ឆ្នោត។
លោក Trump បាននិយាយប្រាប់ពួកអ្នកកាសែតនៅមុនពេលចាកចេញពីសេតវិមានទៅកាន់ការឃោសនាបោះឆ្នោតមួយកាលពីថ្ងៃទី២៤ ខែកញ្ញាថា៖ «យើងចង់ធ្វើឱ្យប្រាកដថាការបោះឆ្នោតនេះមានភាពទៀងត្រង់ហើយខ្ញុំមិនប្រាកដថាការបោះឆ្នោតនេះអាចមានភាពទៀងត្រង់ទេ»។
ការចំណាយពេលច្រើនដើម្បីបញ្ជាក់ឲ្យច្បាស់ថាលទ្ធផលនៃការបោះឆ្នោតមានភាពត្រឹមត្រូវមិនមែនជារឿងចម្លែកទេ។ ឧទាហរណ៍សភាមិនបានបញ្ជាក់ថាលទ្ធផលនៃជ័យជម្នះរបស់លោក Trump នៅក្នុងការបោះឆ្នោតប្រធានាធិបតីកាលពីខែវិច្ឆិកា២០១៦ជាការត្រឹមត្រូវរហូតដល់ថ្ងៃទី៦ខែមករាឆ្នាំ២០១៧។
ដោយផ្អែកលើលទ្ធផលដំបូងៗ លោក Trump បានប្រកាសជ័យជម្នះហើយលោកស្រី Hillary Clinton អតីតរដ្ឋមន្ត្រីការបរទេសនិងជាបេក្ខជនប្រធានាធិបតីខាងគណបក្សប្រជាធិបតេយ្យបានសុខចិត្តចុះចាញ់ជាផ្លូវការមុនប្រជារាស្ត្រអាមេរិកាំងភាគច្រើនភ្ញាក់ពីដំណេកក្រោយថ្ងៃបោះឆ្នោត។
ក៏ប៉ុន្តែប្រសិនបើដូចការទស្សន៍ទាយរបស់ពួកមន្ត្រីចាត់ចែងការបោះឆ្នោតលើកនេះហើយពួកមន្ត្រីរៀបចំការបោះឆ្នោតនៅតែរាប់សន្លឹកឆ្នោតនៅថ្ងៃទី៤ ខែវិច្ឆិកានោះ នេះនឹងជាលើកដំបូងហើយចាប់តាំងពីការបោះឆ្នោតប្រធានាធិបតីកាលពីឆ្នាំ២០០០ដែលពលរដ្ឋអាមេរិកាំងនឹងត្រូវរង់ចាំមួយរយៈមុននឹងបានដឹងថានរណាឈ្នះឆ្នោត។ កាលពីឆ្នាំ២០០០លោកប្រធានាធិបតី George W. Bush បានទទួលជ័យជម្នះនៅក្រោយដំណើរការខាងច្បាប់យ៉ាងយូរទាក់ទិននឹងការរាប់សន្លឹកឆ្នោតជាថ្មីក្នុងរដ្ឋFlorida។
ក្រៅពីការអាចមានការច្របូកច្របល់អំពីលទ្ធផលនៃការបោះឆ្នោត នៅមានរឿងមួយទៀតគឺថាអាចនឹងមានការប្តឹងតវ៉ាចំពោះលទ្ធផលនៃការបោះឆ្នោតដែលបានត្រូវបញ្ជាក់ថាត្រឹមត្រូវហើយនោះ។ ពួកមន្ត្រីចាត់ចែងការបោះឆ្នោតក្នុងរដ្ឋនិងក្នុងមូលដ្ឋានបានប្រុងប្រៀបស្រេចហើយសម្រាប់ការប្តឹងប្តល់។
ទិន្នន័យពីគណៈកម្មការរៀបចំការបោះឆ្នោតសហព័ន្ធបង្ហាញថាយុទ្ធនាការឃោសនាបោះឆ្នោតឱ្យលោក Trump និងលោក Bidenបានចំណាយប្រាក់រាប់សែនដុល្លារសម្រាប់ពួកមេធាវីក្នុងការប្រុងប្រៀបសម្រាប់ការតវ៉ាខាងផ្លូវច្បាប់។
ការរង់ចាំលទ្ធផលនៃការបោះឆ្នោតគ្រាន់តែជាផ្នែកមួយតែប៉ុណ្ណោះ។
តទៅនេះជាហេតុផលប្រាំទៀតដែលធ្វើឱ្យការបោះឆ្នោតនៅថ្ងៃទី៣វិច្ឆិកាឆ្នាំ២០២០មិនដូចការបោះឆ្នោតឯទៀតៗកាលពីពេលមុនៗ៖
វីរុសកូរ៉ូណា
កាលពីថ្ងៃទី១៣ខែមីនាដោយមានរបាយការណ៍អំពីករណីអ្នកមានជំងឺកូវីដ១៩ជាង១.១០០នាក់នៅក្នុងរដ្ឋ៤៩ក្នុងបណ្តារដ្ឋទាំងអស់៥០ក្នុងសហរដ្ឋអាមេរិក លោកប្រធានាធិបតី Trump បានប្រកាសភាពអាសន្ននៅទូទាំងប្រទេស។
រដ្ឋនានាក្នុងសហរដ្ឋអាមេរិក ដូចជារដ្ឋ Louisiana ជាដើមបានឆ្លើយតបដោយបានពន្យាររពេលលើកការបោះឆ្នោតទៅធ្វើនៅពេលក្រោយវិញដោយមានការបារម្ភអំពីការរាលដាលនៃជំងឺកូវីដ១៩នៅតាមការិយាល័យបោះឆ្នោតដែលនៅទីនោះមិនអាចមានការឈរឃ្លាតពីគ្នាពីរម៉ែត្រទេ។
រដ្ឋឯទៀតៗដូចជារដ្ឋ New York រដ្ឋ New Jersey រដ្ឋ Ohio រដ្ឋ Marylandនិងរដ្ឋ Kentucky ហើយបន្ទាប់មកទៀតរដ្ឋដទៃទៀតបានពន្យារពេលលើកការបោះឆ្នោតរបស់ពួកគេទៅធ្វើនៅពេលក្រោយវិញដែរ។
ទោះណារដ្ឋខ្លះបានបើកឱ្យមានសកម្មភាពឡើងវិញខ្លះៗចាប់តាំងពីពេលនោះមកក៏ដោយ ក៏រដ្ឋជាច្រើនបានលើកទឹកចិត្តឱ្យមានការបោះឆ្នោតផ្ញើតាមប្រៃសណីយ៍សម្រាប់ការបោះឆ្នោតប្រធានាធិបតីក្នុងខែវិច្ឆិកាដើម្បីកាត់បន្ថយគ្រោះថ្នាក់នៃការឆ្លងជំងឺកូវីដ១៩។
ការបោះឆ្នោតផ្ញើតាមប្រៃសណីយ៍
សូម្បីតែនៅមុនការរាតត្បាតជាសាកលនៃជំងឺកូវីដ១៩រដ្ឋខ្លះក្នងសហរដ្ឋអាមេរិកបានអនុញ្ញាតឲ្យមានការបោះឆ្នោតផ្ញើតាមប្រៃសណីយ៍ រួចស្រេចទៅហើយ។
បើតាមសមាគមក្រុមប្រឹក្សាជាតិនៃអង្គនីតិបញ្ញត្តិរដ្ឋថារដ្ឋ៥ក្នុងសហរដ្ឋអាមេរិកគឺ Colorado រដ្ឋ Hawaii រដ្ឋ Oregon រដ្ឋ Utah និង រដ្ឋ Washington បានធ្វើ «ការបោះឆ្នោតទាំងអស់តាមរយៈការផ្ញើតាមប្រៃសណីយ៍» ដែលអនុញ្ញាតមនុស្សទាំងអស់ដែលបានចុះឈ្មោះបោះឆ្នោតឱ្យបោះឆ្នោតផ្ញើតាមប្រៃសណីយ៍។
រដ្ឋ៣៣ទៀតអនុញ្ញាតឱ្យអ្នកបោះឆ្នោតសុំបោះឆ្នោតផ្ញើតាមប្រៃសណីយ៍ដោយមិនចាំបាច់មានហេតុផលណាមួយឡើយ។
ក៏ប៉ុន្តែជាការឆ្លើយតបនឹងការរាតត្បាតនៃជំងឺកូវីដ១៩រដ្ឋខ្លះក្នុងបណ្តារដ្ឋទាំងនេះបានសម្រេចធ្វើឲ្យការបោះឆ្នោតផ្ញើតាមប្រៃសណីយ៍កាន់តែងាយស្រួលជាងមុនថែមទៀត។ ឧទាហរណ៍ រដ្ឋ California បានប្រកាសកាលពីខែឧសភាថាខ្លួននឹងផ្ញើសន្លឹកឆ្នោតតាមប្រៃសណីយ៍ទៅឱ្យក្រុមអ្នកបោះឆ្នោតទាំងអស់ដែលបានចុះឈ្មោះសម្រាប់ការបោះឆ្នោតប្រធានាធិបតីនៅខែវិច្ឆិកា។
ក៏ប៉ុន្តែការជំរុញធ្វើឲ្យការបោះឆ្នោតផ្ញើតាមប្រៃសណីយ៍មានលក្ខណៈងាយស្រួលជាងមុនបានរងការរិះគន់ពីលោកប្រធានាធិបតី Trump។
កាលពីខែមិថុនាលោក Trump បាន tweet ថាការប្រើសន្លឹកឆ្នោតផ្ញើតាមប្រៃសណីយ៍នឹងនាំឱ្យមាន«ការបោះឆ្នោតមានការគៃបន្លំច្រើនបំផុតក្នុងប្រវត្តិសាស្ត្រនៃប្រទេសជាតិយើងប្រសិនបើភាពភ្លីភ្លើនេះមិនត្រូវបញ្ឈប់ទេនោះ»។
ជាការឆ្លើយតបស្ត្រីអ្នកនាំពាក្យរបស់សមាគមក្រុមប្រឹក្សាជាតិនៃអង្គនីតិបញ្ញត្តិរដ្ឋហៅកាត់ថា NASSបានប្រាប់វីអូអេថា៖ «យើងមិនបានដឹងអំពីភស្តុតាងណាមួយគាំទ្រការនិយាយអះអាងរបស់ប្រធានាធិបតី Trump ទេ»។ពួកសមាជិកនៃសមាគម NASSចាត់ចែងការបោះឆ្នោតនៅក្នុងរដ្ឋនីមួយៗក្នុងបណ្តារដ្ឋទាំងអស់៥០ក្នុងប្រទេសអាមេរិក។
កាលពីខែសីហាពួកមន្ត្រីជាន់ខ្ពស់ខាងការស៊ើបការណ៍សម្ងាត់និងខាងការពង្រឹងច្បាប់បាននិយាយប្រាប់ក្រុមអ្នកកាសែតថាពួកគេ«គ្មានព័ត៌មានឬព័ត៌មានសម្ងាត់ណាមួយ»ដើម្បីគាំទ្រការនិយាយអះអាងថាពួកតួអង្គបរទេសឬតួអង្គក្នុងប្រទេសណាមួយកំពុងព្យាយាមប្រើការបោះឆ្នោតផ្ញើតាមប្រៃសណីយ៍ដើម្បីធ្វើឱ្យមានផលប៉ះពាល់ដល់លទ្ធផលនៃការបោះឆ្នោតក្នុងពេលខាងមុខនេះទេ។
លោក Christopher Wray នាយកការិយាល័យ FBI ក៏បានបញ្ជាក់យ៉ាងច្បាស់លាស់យ៉ាងដូច្នេះដែរ។
លោក Wrayបាននិយាយប្រាប់ពួកសមាជិកសភានៅក្នុងសវនាការមួយអំពីការគំរាមកំហែងដល់សន្តិសុខមាតុភូមិសហរដ្ឋអាមេរិក កាលពីថ្ងៃទី១៧ខែកញ្ញាថា៖«រហូតដល់ថ្ងៃនេះយើងមិនបានឃើញមានកិច្ចខិតខំប្រឹងប្រែងនៅទូទាំងប្រទេសដើម្បីគៃបន្លំសន្លឹកឆ្នោតនៅក្នុងការបោះឆ្នោតធំណាមួយទេ» ទោះជានៅពេលបន្ទាប់មកលោកបានសារភាពថាមានឧប្បត្តិហេតុនៃការគៃបន្លំសន្លឹកឆ្នោតក្នុងកម្រិតមូលដ្ឋាន «ម្តងម្កាល»ក៏ដោយ។
ការជ្រៀតជ្រែករបស់រុស្ស៊ី
ទីភ្នាក់ងារស៊ើបការណ៍ណ៍សម្ងាត់របស់សហរដ្ឋអាមេរិក បានព្រមានអំពីកិច្ចប្រឹងប្រែងរបស់រុស្ស៊ីដើម្បីជ្រៀតជ្រែកក្នុងការបោះឆ្នោតក្នុងប្រទេសអាមេរិកតាំងពីមុនការបោះឆ្នោតប្រធានាធិបតីកាលពីខែវិច្ឆិកា២០១៦ ទៅទៀត។
ក៏ប៉ុន្តែចាប់តាំងពីពេលនោះមក លោក Trump បានច្រានចោលច្រើនដងនូវរបាយការណ៍និងការចោទប្រកាន់ថាយុទ្ធនាការឃោសនាបោះឆ្នោតឱ្យលោកបានទទួលជំនួយពីប្រទេសរុស្ស៊ីថាជា«ការបញ្ឆោត»។
ក៏ប៉ុន្តែនៅតែមានការព្រមានថែមទៀត។
កាលពីខែសីហាពួកមន្ត្រីជាន់ខ្ពស់ខាងការប្រឆាំងនឹងចារកម្មសហរដ្ឋអាមេរិកបានចេញសេចក្តីថ្លែងការណ៍សាធារណៈដោយកម្រមួយព្រមានទៀតថាអាជ្ញាធរក្រឹមឡាំងជ្រៀតជ្រែកទៀតហើយ។
លោក William Evanina ជានាយកមជ្ឈមណ្ឌលជាតិប្រឆាំងចារកម្មនិងសន្តិសុខ។ លោកបាននិយាយថា៖ «យើងវាយតម្លៃថាប្រទេសរុស្ស៊ីប្រើវិធានការមួយចំនួនដើម្បីបង្ខូចឈ្មោះលោកអតីតអនុប្រធានាធិបតី Biden និងអ្វីដែលរុស្ស៊ីយល់ថាជាការប្រឆាំងនឹងរុស្ស៊ី»។
លោកបានថ្លែងបន្ថែមថា៖ «តួអង្គខ្លះដែលមានចំណងទាក់ទងជាមួយរុស្ស៊ីថែមទាំងបានព្យាយាមលើកតម្កើងបេក្ខភាពរបស់លោក Trump តាមបណ្តាញព័ត៌មានសង្គមនិងទូរទស្សន៍រុស្ស៊ី»។
លោក Christopher Wray នាយក FBI ក៏បានសន្មតស្រដៀងគ្នានេះដែរនៅពេលលោកឆ្លើយជាកសិណសាក្សីនៅចំពោះមុខពួកសមាជិកសភាកាលពីខែកញ្ញា។
លោកWray បានមានប្រសាសន៍ថា៖ «រុស្ស៊ីនៅតែប្រឹងប្រែងធ្វើឱ្យមានឥទ្ធិពលលើការបោះឆ្នោតរបស់យើងភាគច្រើនតាមរយៈអ្វីដែលយើងហៅថាឥទ្ធិពលអាក្រក់របស់បរទេស...ដើម្បីបង្ខូចឈ្មោះលោកអនុប្រធានាធិបតី Biden និងអ្វីដែលរុស្ស៊ីយល់ថាជាពួកអ្នកកាន់អំណាចប្រឆាំងនឹងរុស្ស៊ី»។
ប្រសាសន៍របស់លោក Wray បានធ្វើឱ្យប្រធានាធិបតី Trumpខឹងសម្បារ។
ការគំរាមកំហែងឯទៀតអំពីការជ្រៀតជ្រែកក្នុងការបោះឆ្នោត
ពួកមន្ត្រីខាងការស៊ើបការណ៍សម្ងាត់សហរដ្ឋអាមេរិកបានព្រមានថាការប្រឹងប្រែងរបស់រុស្ស៊ីក្នុងការជ្រៀតជ្រែកក្នុងការបោះឆ្នោតប្រធានាធិបតីកាលពីឆ្នាំ២០១៦អាចបំផុសគំនិតដល់ប្រទេសឯទៀតឱ្យធ្វើតាមរដ្ឋាភិបាលម៉ូស្គូ។
ពីរឆ្នាំបន្ទាប់មកការវាយតម្លៃមួយរបស់ការិយាល័យរបស់នាយកខាងការស៊ើបការណ៍សម្ងាត់ជាតិសន្និដ្ឋានថាប្រទេសចិន អ៊ីរ៉ង់និងរុស្ស៊ី«បានធ្វើសកម្មភាពឱ្យមានឥទ្ធិពលនិងយុទ្ធនាការបញ្ចេញសារ»ទាក់ទិនជាមួយការបោះឆ្នោតពាក់កណ្តាលអាណត្តិកាលពីឆ្នាំ២០១៨។
នៅក្នុងការវាយតម្លៃរបស់លោកកាលពីខែសីហាលោក William Evanina ដែលជានាយកមជ្ឈមណ្ឌលជាតិខាងប្រឆាំងចារកម្មនិងសន្តិសុខហៅកាត់ថាNCSC បានព្រមានថាដូចកាលពីឆ្នាំ២០១៨ដែរប្រទេសចិននិងអ៊ីរ៉ង់ខិតខំព្យាយាមលូកដៃចូលក្នុងការបោះឆ្នោតលើកនេះដោយសង្ឃឹមថាTrump នឹងចាញ់ឆ្នោត។
លោក William Evanina បាននិយាយថា៖ «យើងវាយតម្លៃថាចិនចង់ឱ្យលោកប្រធានាធិបតីTrump ដែលរដ្ឋាភិបាលប៉េកាំងយល់ថាមិនអាចទាយទុកជាមុនបាន ចាញ់ឆ្នោតក្នុងការឈរឈ្មោះជាថ្មី»។
លោក Evanina បានថ្លែងថាអ៊ីរ៉ង់៖ «បានត្រូវជំរុញដោយការយល់ឃើញថាការជាប់ឆ្នោតជាថ្មីរបស់លោកប្រធានាធិបតី Trump នឹងនាំឱ្យមានការបន្តដាក់សម្ពាធរបស់សហរដ្ឋអាមេរិក លើអ៊ីរ៉ង់នៅក្នុងការប្រឹងប្រែងមួយដើម្បីធ្វើឱ្យមានការផ្លាស់ប្តូររបបគ្រប់គ្រង»។
ប្រទេសឯទៀតក៏ប្រហែលកំពុងព្យាយាមបំបែកពួកអ្នកបោះឆ្នោតដែរ។ លោក Trump បាននិយាយប្រាប់ពួកអ្នកសារព័ត៌មានកាលពីខែសីហាថាប្រទេសកូរ៉េខាងជើងនិងប្រទេសឯទៀតប្រហែលប្រើការពឹងពាក់ច្រើនជាងមុនលើការបោះឆ្នោតតាមរយៈប្រៃសណីយ៍ដើម្បី«ក្លែងសន្លឹកឆ្នោតហើយបញ្ជូនសន្លឹកឆ្នោតទាំងនេះមកក្នុងប្រទេសអាមេរិក»។
ទោះណាជាប្រទេសមួយចំនួនប្រហែលកំពុងជ្រៀតជ្រែកក្នុងការបោះឆ្នោតប្រឆាំងនឹងសហរដ្ឋអាមេរិកក៏ដោយ ក៏ពួកមន្ត្រីចាត់ចែងការបោះឆ្នោតគិតគូរហ្មត់ចត់អំពីការគំរាមកំហែងទាំងនេះដោយព្រមានថាពួកសត្រូវអាចប្រឹងប្រែងផ្សព្វផ្សាយព័ត៌មានមិនពិតក្នុងសហរដ្ឋអាមេរិក នៅពេលស្ថានីយបោះឆ្នោតបិទទ្វារនៅថ្ងៃ៣ខែវិច្ឆិកាដើម្បីជួយធ្វើឱ្យមានចលាចលនិងភាពច្របូកច្របល់។
មានការខ្វល់ខ្វាយដែរថាពួកប្រទេសក្រៅនិងក្រុមឧក្រិដ្ឋជននឹងខិតខំយកហេដ្ឋារចនាសម្ព័ន្ធបោះឆ្នោតសហរដ្ឋអាមេរិកជាទីដៅនៃការវាយប្រហារ។
លោក Matt Masterson ជាទីប្រឹក្សាជាន់ខ្ពស់ខាងសន្តិសុខនៃការបោះឆ្នោតរបស់ក្រសួងសន្តិសុខមាតុភូមិ។ នៅក្នុងវេទិកាមួយតាមអនឡាញលោកបាននិយាយថា «ប្រព័ន្ធបោះឆ្នោតដូចជាបច្ចេកវិទ្យាព័ត៌មានដែរត្រូវគេពិនិត្យមើល និងស្រាវជ្រាវរកចំណុចខ្សោយ»។
ទោះជាមានការបារម្ភទាំងនេះក៏ដោយក៏ពួកមន្ត្រីខាងសន្តិសុខនៃការបោះឆ្នោតនៅតែមានការទុកចិត្តថាទោះណាជាត្រូវចំណាយពេលយូរជាងមុនដើម្បីរាប់សន្លឹកឆ្នោតក៏ដោយក៏លទ្ធផលនៃការបោះឆ្នោតលើកនេះនឹងត្រឹមត្រូវ។
ប្រៃសណីយ៍ជាតិសហរដ្ឋអាមេរិក
ការពឹងពាក់ខ្លាំងលើការបោះឆ្នោតផ្ញើតាមប្រៃសណីយ៍សម្រាប់ការបោះឆ្នោតនៅថ្ងៃទី៣ខែវិច្ឆិកាបាននាំឱ្យមានការយកចិត្តទុកដាក់ជាងមុនលើសេវាប្រៃសណីយ៍សហរដ្ឋអាមេរិកដែលបានត្រូវរិះគន់ដោយពួកប្រជាធិបតេយ្យក្នុងសភាសហរដ្ឋអាមេរិកថាបានពន្យឺតសេវាសំបុត្រជាផ្នែកមួយនៃវិធានការបន្ថយសោហ៊ុយ។
សមាជិកសភាខ្លះខាងគណបក្សប្រជាធិបតេយ្យក៏បានលើកឡើងអំពីកង្វល់ស្តីពីទំនាក់ទំនងរបស់លោក Louis DeJoy អគ្គនាយកប្រៃសណីយ៍ជាតិជាមួយលោកប្រធានាធិបតី Trump ដោយកត់សម្គាល់ថាលោក DeJoy ជាអ្នកអង្គាសប្រាក់ឱ្យគណបក្សសាធារណរដ្ឋនិងជាអ្នកផ្តល់ប្រាក់ឲ្យយុទ្ធនាការឃោសនាបោះឆ្នោតរបស់លោក Trump។
លោក DeJoy បានបដិសេធថាលោកមិនបានធ្វើអ្វីខុសទេដោយលោកបាននិយាយថា «បច្ចុប្បន្ននេះប្រៃសណីយ៍ជាតិប្រុងប្រៀបស្រេចហើយដើម្បីចាត់ចែងសន្លឹកឆ្នោតផ្ញើតាមប្រៃសណីយ៍ដែលខ្លួនទទួលក្នុងរដូវស្លឹកឈើជ្រុះនេះទោះជាមានច្រើនប៉ុណ្ណាក៏ដោយ»។
ក៏ប៉ុន្តែមានរដ្ឋយ៉ាងតិចណាស់១៤បានប្តឹងប្រៃសណីយ៍ជាតិសហរដ្ឋអាមេរិកថារារាំងការផ្លាស់ប្តូរខ្លះដែលអាចធ្វើឱ្យមានការយឺតយូរដល់ការប្រគល់សន្លឹកឆ្នោតផ្ញើតាមប្រៃសណីយ៍ជាតិ។
កាលពីពាក់កណ្តាលខែកញ្ញាចៅក្រមម្នាក់ក្នុងរដ្ឋ Washingtonបានចេញអធិបញ្ជាដំបូងមួយប្រឆាំងនឹងការផ្លាស់ប្តូរទាំងនេះដោយនិយាយថា៖ «ពួករដ្ឋបានបង្ហាញថាពួកចុងចោទមានទាក់ទិនក្នុងការវាយប្រហារបែបនយោបាយទៅលើប្រសិទ្ធភាពនៃប្រៃសណីយ៍ជាតិ»។
កាលពីថ្ងៃទី២១ខែកញ្ញា ចៅក្រមសហព័ន្ធម្នាក់ក្នុងរដ្ឋ New York បានសម្រេចថាប្រៃសណីយ៍ជាតិត្រូវបញ្ជូនសន្លឹកឆ្នោតឱ្យបានលឿនហើយផ្តល់ប្រាក់បន្ថែមនៃការធ្វើការលើសម៉ោងកម្រិតឱ្យក្រុមបុគ្គលិកថែមទៀតផង។
ប្រែសម្រួលដោយ លោក ឈឹម សុមេធ
