ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ទីភ្នាក់ងារ​ព័ត៌មាន​ AP រាយការណ៍​ថា ការធ្វើតេស្ត​ជំងឺ​កូវីដ១៩​ប្រចាំ​ថ្ងៃ​ធ្លាក់ចុះ​ក្នុង​សហរដ្ឋ​អាមេរិក


រូបឯកសារ៖ គ្រូបង្រៀនម្នាក់វាស់សីតុណ្ហភាពសិស្សនៅសាលាបឋមសិក្សា Newton County នៅក្រុង Decatur សហរដ្ឋអាមេរិក កាលពីថ្ងៃទី០៣ ខែសីហា ឆ្នាំ២០២០។

ការធ្វើ​តេស្ត​ប្រចាំ​ថ្ងៃ​មេរោគ​កូរ៉ូណានៅក្នុង​សហរដ្ឋ​អាមេរិក​កំពុង​ធ្លាក់ចុះ​ ទោះជា​នៅ​ពេល​ដែល​ចំនួន​មនុស្សស្លាប់​កើនឡើង​ក៏ដោយ។ នេះតាម​សេចក្តីរាយការណ៍​របស់​ទីភ្នាក់ងារ​ព័ត៌មាន​ Associated Press កាលពី​ថ្ងៃ​ពុធ។

ទីភ្នាក់ងារ​ព័ត៌មាន​ AP បាន​រាយការណ៍ថា ចំនួន​នៃ​ការធ្វើ​តេស្ត​បាន​ធ្លាក់ចុះ​ជិត​៤ ភាគរយ​ក្នុង​រយៈពេល​ជាង​២សប្តាហ៍​កន្លង​មក​នេះ។

ពួក​អ្នក​ជំនាញ​បាន​និយាយ​ថា តម្រូវការ​បាន​ដាក់​បន្ទុក​ហួស​ដល់​មន្ទីរ​ពិសោធន៍​ដែល​ធ្វើ​តេស្ត​មាន​សុក្រិតភាពខ្ពស់ដែលអាច​រក​ឃើញពន្ធុរបស់​មេរោគ​កូរ៉ូណា​ដែល​បណ្តាល​ឲ្យកើត​ជំងឺ​កូវីដ១៩។​ ការធ្វើ​តេស្ត​ទាំងនោះ​អាច​ផ្តល់​លទ្ធផល​យ៉ាង​តិច​រយៈពេល​២​ថ្ងៃ។

ពួក​អ្នក​ជំនាញកំពុង​អំពាវនាវ​ឲ្យ​ធ្វើ​តេស្ត​តាម​វិធី​ផ្សេងទៀត​ដែល​មនុស្ស​អាច​ធ្វើ​តេស្ត​ខ្លួនឯង​បាន​ហើយ​ទទួល​បាន​លទ្ធផល​តែរយៈពេល​ប៉ុន្មាន​នាទីតែ​ប៉ុណ្ណោះ ក៏ប៉ុន្តែ ពួក​អ្នក​វិទ្យាសាស្រ្ត​ និយាយ​ថា ការធ្វើ​តេស្ត​ទាំង​នេះមិនអាច​ទុកចិត្តបាន។ ការធ្វើ​តេស្ត​ទាំង​នោះ​រួមមាន​ការធ្វើតេស្ត​ដោយ​ខ្លួនឯង ​ដែល​ពួក​អ្នក​ជំងឺនឹង​ស្តោះ​ទឹកមាត់​លើ​ក្រដាស​ពិសេស​មួយ​ដែលផ្លាស់ប្តូរ​ពណ៌ ប្រសិនបើ​លទ្ធផល​វិជ្ជមាន។

ក៏ប៉ុន្តែពួក​និយ័តករ​សហព័ន្ធ​និយាយ​ថា ការធ្វើតេស្ត​បែប​នេះអាច​ជាការ​មិនអាច​ទុកចិត្តបានយ៉ាងខ្លាំង។

ក្នុង​ខណៈ​នោះដែរ ពួកអាជ្ញាធរ​រុស្ស៊ីបាន​និយាយ​កាលពី​ថ្ងៃពុធ​ថា ពួកគេ​កំពុង​ពង្រីក​ការធ្វើ​តេស្ត​ជំងឺ​កូវីដ១៩​តាម​របៀប​រហ័ស​របស់​ខ្លួន​នៅចំណតអាកាស​យាន្តដ្ឋាន​សំខាន់​២​ក្នុង​ទីក្រុង​ម៉ូស្គូ បន្ទាប់ពីការ​ធ្វើ​តេស្ត​នៅ​ចំណត​អាកាស​យាន្ត​ Sheremetyevo ដែល​ជា​ចំណតអាកាស​យាន្ត​ដ្ឋាន​ដ៏មមា​ញឹកបំផុត​មួយ។

ពួក​អាជ្ញាធរ​និយាយ​ថា ការធ្វើ​តេស្ត​នោះអាច​ផ្តល់​លទ្ធផល​តែ​រយៈពេល​មួយ​ម៉ោង​ប៉ុណ្ណោះ។

Facebook កាលពី​ថ្ងៃ​ពុធ​ម្សិលមិញ​បាន​ដកចេញ​ការចុះផ្សាយ​ដោយ​ប្រធានា​ធិបតី​ដូណាល់ ត្រាំ ពីព្រោះតែ Facebook និយាយ​ថា ការចុះ​ផ្សាយ​នោះ​បាន​ផ្សព្វផ្សាយ​ព័ត៌ មាន​មិន​ពិត​អំពី​មេរោគ​កូរ៉ូណា។

អ្នក​នាំពាក្យ​ Facebook បាន​និយាយ​ថា៖ «វីដេអូ​នោះរួមមាន​ការអះអាង​មិនពិត​ថា មនុស្ស​មួយ​ក្រុម​ បានរួច​ផុតពីការឆ្លង​ជំងឺ​កូវីដ​១៩ ដែលជា​ការរំលោភ​គោលនយោបាយ​របស់​យើង​ជុំវិញព័ត៌មាន​មិនពិត​អំពី​ជំងឺ​កូវីដ​១៩ដ៏​គ្រោះថ្នាក់»៕

XS
SM
MD
LG