មន្ត្រីអន្តោប្រវេសន៍ថៃជាង១០០នាក់ត្រូវគេរំពឹងថានឹងប្រឈមការចោទប្រកាន់ពីបទទទួលសំណូកមួយចំនួននៅក្នុងពេលប៉ុន្មានសប្ដាហ៍ខាងមុខនេះ បន្ទាប់ពីបានជួយសម្រួលដល់ជនជាតិចិនរាប់ពាន់នាក់ឱ្យចូលទៅក្នុងប្រទេសថៃដោយខុសច្បាប់ដើម្បីបង្កើតមុខជំនួញទាក់ទិននឹងឧក្រិដ្ឋកម្ម។
ថ្លែងទៅកាន់ក្រុមអ្នកសារព័ត៌មានកាលពីថ្ងៃទី៩ មីនាកន្លងទៅ ស្នងការរងប៉ូលិសជាតិលោកឧត្តមសេនីយ៍ Surachet Hakparn បាននិយាយថាគេបានរៀបចំសំណុំរឿងប្រឆាំងនឹងមន្ត្រីទាំងនេះរួចហើយ ដែលនៅក្នុងនោះយ៉ាងហោចណាស់ក៏មានមន្ត្រីជាន់ខ្ពស់ម្នាក់មានឋានៈជាឧត្តមសេនីយ៍ប៉ូលិសផងដែរ។ សំណុំរឿងរបស់ពួកគេត្រូវបានប្រគល់ជូនទៅខាងគណៈ កម្មការប្រឆាំងអំពើពុករលួយជាតិដើម្បីធ្វើការចោទប្រកាន់លើបញ្ហាមួយចំនួនពាក់ព័ន្ធនឹងអំពើទុច្ចរិតក្នុងការិយាល័យធ្វើការក៏ដូចជាការទទួលសំណូកជាដើម។
ករណីទាំងនេះកើតមានឡើង ខណៈពេលដែលអាជ្ញាធរថៃបានព្យាយាមទប់ស្កាត់ការរីករាល ដាលកាន់តែខ្លាំងឡើងនៃការបង្ហូរសាច់ប្រាក់ខុសច្បាប់ ពីប្រទេសចិនចូលទៅក្នុងសេដ្ឋកិច្ចរបស់ថៃចាប់ តាំងពីជំនួញពាក់ព័ន្ធនឹងវិស័យទេសចរណ៍រហូតដល់វិស័យទ្រព្យសម្បត្តិ និងសហគ្រាសកម្សាន្តពេលរាត្រីជាដើម។
លទ្ធភាពនៃការប្រើលុយរបស់ចិន ក្នុងការគេចវេសពីផ្លូវច្បាប់របស់ថៃនោះបានធ្វើឱ្យជនជាតិថៃជាច្រើនមានការបារម្ភខ្លាំងក្នុងពេលប៉ុន្មានខែថ្មីៗនេះក្រោយពីការចាប់ខ្លួនអ្នកជំនួញចិនមួយរូបឈ្មោះ Chaiyanat Kornchayanant ដែលមានឈ្មោះក្រៅថា «Tuhao» កាលពីចុងឆ្នាំទៅពីបទលាងលុយកខ្វក់រាប់លានដុល្លារអាមេរិកតាមរយៈប្រទេសថៃ។
អ្នកជំនួញចិនរូបនេះបានរៀបអាពាហ៍ពិពាហ៍ជាមួយនឹងមន្ត្រីប៉ូលិសថៃម្នាក់ ហើយក្រោយមកក៏បានទទួលសញ្ជាតិថៃតាមរយៈប្រពន្ធរបស់គាត់នឹងបានដូរឈ្មោះទៅជាឈ្មោះថៃថាជា Chaiyanat Kornchayanant។ ដោយប្រឈមទៅនឹងដីការចាប់ខ្លួនលើបទចោទប្រកាន់គ្រឿងញៀននោះ បុរសចិនរូបនេះបានចូលសារភាពនៅចំពោះមុខអាជ្ញាធរថៃកាលពីខែវិច្ឆិកាកន្លងទៅហើយត្រូវបានប៉ូលិសថៃរឹបអូសយកបានទ្រព្យសម្បត្តិជាច្រើន រថយន្តទំនើបៗ យន្ត ហោះផ្ទាល់ខ្លួន និងប្រាក់សុទ្ធប្រមាណជិត៩០លានដុល្លារអាមេរិកផងដែរ។
អាជ្ញាធរថៃបានចោទប្រកាន់អ្នកជំនួញចិនរូបនេះថាបានប្រើប្រាស់រូបភាពនៃការទាក់ទងកម្រិតខ្ពស់ជាមួយថៃដើម្បីបង្កើតក្រុមឧក្រិដ្ឋដ៏ធំមួយហើយបាននាំចូលជនជាតិចិនយ៉ាងតិចណាស់ក៏៤ពាន់នាក់ដែរចូលមកក្នុងប្រទេសថៃដើម្បីធ្វើជំនួញផ្សេងៗ ដូចជាការបើកក្លិបរាំ កម្សាន្តពេលរាត្រីដែលមានការលក់គ្រឿងញៀនទៅឱ្យភ្ញៀវជាជនជាតិចិនដោយចំហរនៅទីនោះដែរ។ បុរសចិនរូបនេះមិនព្រមទទួលសារភាពកំហុសទៅលើការចោទប្រកាន់នោះឡើយហើយត្រូវឡើងតុលាការក្នុងពេលប៉ុន្មានខែខាងមុខនេះ៕
គេរំពឹងថានឹងមានបទចោទប្រកាន់ព្រហ្មទណ្ឌជាច្រើនករណីក្នុងប្រទេសថៃពាក់ព័ន្ធនឹងជនអន្តោប្រវេសន៍ចិន
បាងកក —
