ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

តុលាការ​ថៃ​កាត់ទោស​សកម្មជន​ដាក់​ពន្ធនាគារ​២៨​ឆ្នាំ​ពី​បទ​ប្រមាថ​ព្រះមហាក្សត្រ


លោក Mongkhon Thirakot សកម្មជននយោបាយថៃ លើកដៃម្រាមបីតំណាងការតស៊ូដើម្បីលទ្ធិប្រជាធិបតេយ្យ មុនពេលចូលខ្លួនទៅតុលាការ នៅខេត្តឈៀងរ៉ៃ ប្រទេសថៃ កាលពីថ្ងៃទី ២៦ ខែមករា ឆ្នាំ ២០២៣។ (Thai Lawyers for Human Rights via AP)
លោក Mongkhon Thirakot សកម្មជននយោបាយថៃ លើកដៃម្រាមបីតំណាងការតស៊ូដើម្បីលទ្ធិប្រជាធិបតេយ្យ មុនពេលចូលខ្លួនទៅតុលាការ នៅខេត្តឈៀងរ៉ៃ ប្រទេសថៃ កាលពីថ្ងៃទី ២៦ ខែមករា ឆ្នាំ ២០២៣។ (Thai Lawyers for Human Rights via AP)

តុលាការ​មួយ​របស់​ប្រទេ​ថៃ​កាលពី​ថ្ងៃ​ព្រហស្បតិ៍​ម្សិលមិញ​បាន​កាត់ទោសបុរស​ជន​ជាតិ​ថៃ​ម្នាក់ ​ឱ្យ​ជាប់​ពន្ធនាគាររយៈពេល ​២៨​ ឆ្នាំ ពី​បទ​ជេរ​ប្រមាថ​ព្រះមហាក្សត្រ​របស់​ប្រទេស​នេះតាម​រយៈ​ការបង្ហោះ​សារ​នៅ​តាម​ប្រព័ន្ធ​អនឡាញ។ នេះបើ​យោង​ទៅ​លើ​ការ​ចេញ​ផ្សាយ​របស់​ទី​ភ្នាក់ងារ​ព័ត៌មាន AFP។

ច្បាប់​ប្រមាថ​ព្រះ​មហក្សត្ររបស់​ប្រទេស​ថៃ​ ជា​ច្បាប់​មួយដែល​មាន​លក្ខណៈ​តឹងរ៉ឹង​បំផុត​នៅ​ក្នុង​ពិភព​លោក ​ដោយ​ក្រុម​អ្នក​ការពារ​សិទ្ធិមនុស្ស​និយាយ​ថា​ ច្បាប់​នេះ​ត្រូវ​បានគេ​ប្រើប្រាស់​ខុស​គោលដៅ​ដើម្បី​គាបសង្កត់​ទៅ​លើ​ការ​ពិភាក្សា​ជា​សាធារណៈ។


តុលាការ​ក្នុង​ទីក្រុង Chiang Rai ភាគ​ខាង​ជើង​ប្រទេស​ថៃ​បាន​រក​ឃើញ​ថា ​បុរស​ឈ្មោះ Mongkol Thirakote ដែល​ជា​អ្នក​លក់​សម្លៀក​បំពាក់​អនឡាញនិង​ជា​សកម្មជន​ម្នាក់ផង​ដែរ​នោះ​ ពិត​ជា​មាន​កំហុសនៅ​ក្នុងបណ្តឹង​បរិហាកេរ្ត៍​រាជវង្សចំនួន​ពីរ​ដាច់​ដោយ​ឡែក​ពី​គ្នា។​

មេធាវី​របស់​បុរស​ជាប់ចោទ​រូប​នេះបាន​ប្រាប់​ទីភ្នាក់ងារ​ព័តមាន AFP ថា​ ​តុលាការ​ដំបូង​ឡើយ​ ​បាន​កាត់ទោសកូនក្តីរបស់​លោកឱ្យ​ជាប់ពន្ធនាគារ​រយៈពេល ៤២ ឆ្នាំ ប៉ុន្តែ​បានបន្ថយ​ទោសបន្ទាប់ពីមាន​ការផ្តល់​សក្ខីកម្មរបស់​ជន​នេះ​រួច​មក។

មេធាវី​ការពារ​ក្តី​របស់​ជនជាប់ចោទនិយាយ​ថា​ ​កូន​ក្តី​លោក​មាន​បំណង​នឹង​ប្តឹង​ឧទ្ធរណ៍​ ហើយ​តុលាការ​បាន​អនុញ្ញាត​ឱ្យ​នៅ​ក្រៅ​ឃុំ​ជា​បណ្តាះ​អាសន្ន​ ដោយ​បង់​ប្រាក់តម្កល់​ប្រមាណ​ជាង​ ៩​ ពាន់​ដុល្លារ​អាមេរិក។


បទបរិហារកេរ្តិ៍​រាជវង្ស​ថៃ​អាចមាន​ទោសជាប់ពន្ធនាគារ​រហូត​ដល់​រយៈពេល​ ១៥ ឆ្នាំ​ក្នុងមួយ​ករណីៗ។


បុរស​ឈ្មោះ Mongkol រូប​នេះ​ក៏​ប្រឈមនឹង​បទ​ចោទករណី​ទី ៣ ដាច់​ដោយឡែក​មួយ​ទៀត​ផង​ដែរ​ ពី​បទ​ប្រមាថ​រាជវង្ស​ថៃនៅក្នុង​សារ​បង្ហោះ​តាម​ប្រព័ន្ធ​អនឡាញ​កាល​ពី​ឆ្នាំ​ទៅ​ ហើយ​លោក​នឹង​ត្រូវ​ឡើង​តុលាការ​ជាថ្មី​ម្តង​ទៀត​ជុំវិញ​រឿង​នេះនៅក្នុង​ខែ​មីនា​ខាងមុខ​នេះ។

មាន​បណ្តឹង​ប្រមាណជាង ២០០​ ករណី​ ត្រូវ​បានធ្វើ​ឡើង​ប្រឆាំង​នឹង​ក្រុម​សកម្មជន​គាំទ្រ​លទ្ធិ​ប្រជាធិបតេយ្យ​ក្នុង​ប្រទេស​ថៃ​ ចាប់តាំង​ពី​ខែវិច្ឆិកា​ ឆ្នាំ ២០២០ មក។ នេះ​បើ​តាម​ក្រុម​មេធាវី​ការពារសិទ្ធិ​មនុស្ស​របស់​ប្រទេស​ថៃ៕

XS
SM
MD
LG