ការបិទប្រទេសដោយសារមានការរាតត្បាតជាសាកលនៃជំងឺកូវីដ១៩ និងបញ្ហាភ្លើងឆេះព្រៃកាលពីរដូវក្តៅ បានធ្វើឲ្យប៉ះពាល់ដល់រយៈពេល ២៩ ឆ្នាំនៃការលូតលាស់សេដ្ឋកិច្ចគ្មានការបង្អាក់នៅក្នុងប្រទេសអូស្ត្រាលី។
ផលិតផលក្នុងស្រុកសរុប ឬក៏ប្រាក់ចំណូលជាតិសម្រាប់ត្រីមាសទីមួយនៃឆ្នាំ ២០២០ នេះ បានធ្លាក់ចុះ ដោយទាញសេដ្ឋកិច្ចប្រទេសអូស្ត្រាលីឱ្យធ្លាក់ចុះជាលើកដំបូង តាំងពីដើមទសវត្សរ៍ ១៩៩០ មក។
លោក George H. W. Bush គឺជាប្រធានាធិបតីសហរដ្ឋអាមេរិក នៅពេលដែលប្រទេសអូស្ត្រាលីមានដំណើរសេដ្ឋកិច្ចធ្លាក់ចុះចុងក្រោយបំផុតកាលពីឆ្នាំ ១៩៩១។ ប៉ុន្តែ ប្រវត្តិប្រកបដោយមោទនភាពនៃការលូតលាស់សេដ្ឋកិច្ចដែលគ្មានការបង្អាក់ជិត ៣០ ឆ្នាំ កន្លងមកនេះ ត្រូវបានបញ្ចប់។
តួលេខថ្មីចុងក្រោយបំផុតបង្ហាញថា សេដ្ឋកិច្ចអូស្ត្រាលីមានបញ្ហារួចទៅហើយនៅមុនពេលមានការរាតត្បាតនៃជំងឺកូវីដ១៩ បន្ទាប់ពីប្រទេសនេះរងគ្រោះដោយសារបញ្ហាភ្លើងឆេះព្រៃដ៏មហន្តរាយ ដែលធ្វើឲ្យមានការថយចុះខាងផ្នែកទេសចរណ៍ និងមានតម្រូវការតិចតួចនៅក្នុងប្រទេស។
ប៉ុន្តែ បញ្ហាឆ្លងរាតត្បាតនៃជំងឺកូវីដ១៩ បានរឹតតែធ្វើឲ្យសេដ្ឋកិច្ចធ្លាក់ចុះបន្ថែមទៀត។ ការបិទប្រទេសដើម្បីទប់ស្កាត់ការរាលដាលនៃជំងឺនេះ បានបង្ខំឲ្យអាជីវកម្មរាប់ពាន់កន្លែងបិទដំណើរការ ដែលមានតាំងពីកន្លែងហាត់ប្រាណ ហាងកាហ្វេ រោងកុន រហូតដល់ហាងលក់ទំនិញនានាជាច្រើន។
គេរំពឹងថាចំនួនអ្នកគ្មានការងារធ្វើនឹងកើនឡើងទ្វេដងរហូតដល់ ១០% ហើយកញ្ចប់ជំនួយហិរញ្ញវត្ថុដើម្បីជួយដល់សន្ទុះសេដ្ឋកិច្ច បានធ្វើឱ្យបំណុលជាតិកើនឡើងថែមទៀត។
រដ្ឋាភិបាលអូស្ត្រាលីបានព្រមានថា ទិដ្ឋភាពទូទៅនៃសេដ្ឋកិច្ចសម្រាប់ពេលប៉ុន្មានខែខាងមុខនេះមានសភាពធ្ងន់ធ្ងរ។
ប៉ុន្តែទោះជាយ៉ាងណាក៏ដោយ ប្រទេសអូស្ត្រាលីហាក់ដូចជាមានភាពល្អប្រសើរជាងប្រទេសដទៃទៀតនៃក្រុមប្រទេស G7 និងប្រទេសផ្សេងទៀតនៅទ្វីបអាស៊ី ដែលមានប្រាក់ចំណូលជាតិធ្លាក់ចុះច្រើនជាងអូស្ត្រាលីខ្លាំង។
លោក Josh Frydenberg រដ្ឋមន្ត្រីហិរញ្ញវត្ថុអូស្ត្រាលី បាននិយាយថា៖ «អ្វីដែលយើងប្រឈមគឺការដួលរលំសេដ្ឋកិច្ច។ យើងបានចៀសវាងមិនឲ្យអូស្ត្រាលីមានជោគវាសនាសេដ្ឋកិច្ច និងជោគវាសនាសុខភាពដូចប្រទេសដទៃទៀត ដោយសារតែវិធានការដែលយើងបានអនុវត្តក្នុងនាមជាប្រទេសជាតិមួយ។ ប៉ុន្តែនៅពេលនេះ ក្នុងត្រីមាសទីពីរនៃឆ្នាំនេះ ផលប៉ះពាល់ខាងសេដ្ឋកិច្ចនឹងមានភាពធ្ងន់ធ្ងរ»។
លោក Philip Lowe ទេសាភិបាលធនាគារជាតិអូស្ត្រាលី បាននិយាយថា ឥឡូវនេះ ប្រទេសអូស្ត្រាលីកំពុងប្រឈមនឹងស្ថានភាពធ្ងន់ធ្ងរខ្លាំងបំផុត ចាប់តាំងពីសម័យវិបត្តិសេដ្ឋកិច្ចកាលពីទសវត្សរ៍ ១៩៣០ មក។
ប៉ុន្តែ លោកបានបញ្ជាក់ថា៖ «ទំហំនៃការធ្លាក់ចុះសេដ្ឋកិច្ចលើកនេះអាចមានតិចជាងការរំពឹងទុកកាលពីដំបូងៗ»។
នេះគឺជាពេលដែលធ្វើឲ្យប្រជាពលរដ្ឋអូស្ត្រាលីជាច្រើនព្រួយបារម្ភ។ នៅពេលដែលភាពអត់ការងារធ្វើកើនឡើង មនុស្សជាច្រើនដែលកំពុងនៅមានការងារធ្វើ មានអារម្មណ៍ខ្លាចបាត់បង់ការងារខ្លាំងជាងមុន ហើយប្រឈមនឹងបំណុលច្រើនជាងមុនក្នុងគ្រួសារផងដែរ។ ករណីទាំងនេះគឺកើតឡើងនៅក្នុងបរិបទនៃការភ័យខ្លាចអំពីរលកផ្ទុះឆ្លងរាលដាលលើកទីពីរនៃជំងឺកូវីដ១៩៕
ប្រែសម្រួលដោយលោក ឈឹម សុមេធ
