ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

សាលា​ឧទ្ធរណ៍​ច្រាន​ចោល​សំណើ​សុំ​នៅ​ក្រៅឃុំ​របស់​កូន​ប្រុស​សកម្មជន​ដីធ្លី​ក្នុង​ខេត្ត​ព្រះវិហារ


លោក ស៊ុម ម៉ឺន (ឆ្វេង) និងកូនប្រុសរបស់លោកគឺលោក ម៉ឺន មាន ត្រូវបាន​ចាប់ខ្លួន​ដោយ​មន្ត្រី​យោធា។ រហូតមកដល់ពេលនេះ លោក ស៊ុម ម៉ឺន បាន​បាត់​ខ្លួន​អស់រយៈពេល​ពីរខែហើយ។ (រូបថតដោយ៖ សកម្មជនក្នុងសហគមន៍)

តុលាការ​សាលា​ឧទ្ធរណ៍​​សម្រេច​មិន​អនុញ្ញាត​ឲ្យ​លោក ​ម៉ឺន មាន​ បាន​ស្ថិត​នៅក្រៅ​ឃុំ​ជួបជុំគ្រួសារ​ បន្ទាប់​ពីអាជ្ញាធរ​ខេត្ត​ព្រះវិហារ​ប្រាប់​អ្នកស្រី​ ភឹម ម៉ៅ​ ដែល​ជា​ម្តាយ​ថា កូនប្រុសអ្នកស្រីនឹង​បាន​ស្ថិត​នៅក្រៅ​ឃុំ​ ​បើ​អ្នកស្រី​​​​ឈប់​ប្តឹង​អាជ្ញាធរ​ចំពោះ​ការ​បាត់​ខ្លួន​ស្វាមី​អ្នកស្រី​​​​។

សាលា​ឧទ្ធរណ៍​ កាល​ពី​ថ្ងៃ​ពុធ​ បាន​ច្រាន​ចោល​សំណើ​សុំនៅ​ក្រៅ​ឃុំ​របស់​លោក ម៉ឺន មាន​ កូនប្រុស​របស់សកម្មជន​ដីធ្លី​លោក​ ស៊ុម ម៉ឺន​ ដែល​កំពុង​បាត់​ខ្លួន។ តុលាការ​ជាន់​ខ្ពស់​កម្ពុជា​មួយ​នេះមិន​បាន​បញ្ជាក់​ហេតុផល​ណា​ ​ក្រៅពី​អះអាង​ថា​ ​ការ​សម្រេច​ឃុំ​ខ្លួន​ដោយ​សាលា​ដំបូង​ខេត្ត​ព្រះវិហារ​ទៅ​តាម​សំណើ​របស់​ព្រះ​រាជអាជ្ញា​នៃ​តុលាការ​នេះ ​គឺ​នៅ​ទុក​ជា​បាន​ការ​ដដែល។​

កាល​ពី​ខែ​មករា​ ឆ្នាំ​ ២០១៩​ ​មនុស្ស​ចំនួន​ ១៤​ នាក់​ត្រូវ​បាន​ឃុំខ្លួន​បណ្តោះ​អាសន្ន​ រង់​ចំា​សវនា​ការ​នៅ​ក្នុង​ពន្ធនាគារ​ខេត្ត​ព្រះវិហារ ​ក្នុង​នោះ​រួម​មាន​កូន​ប្រុស​របស់​លោក​ ស៊ុម ម៉ឺន​ ឈ្មោះ ម៉ឺន មាន​ ដែល​មាន​អាយុ​ ២៦ ​ឆ្នាំ។​

លោក យី សុខសាន្ត​ មន្ត្រី​អង្កេត​ជាន់​ខ្ពស់​របស់​សមាគម​សិទ្ធិ​មនុស្ស​អាដហុក (Adhoc) ​មាន​ប្រសាសន៍​ថា​ តុលាការ​សាលា​ឧទ្ធរណ៍​បាន​សម្រេច​មិន​អនុញ្ញាត​ឲ្យ​ជនជាប់​ចោទ​លោក​ ម៉ឺន មាន​ បាន​ស្ថិត​នៅ​ក្រៅ​ឃុំ​នោះ​ទេ​ ​ដោយ​អះអាង​ថា​ សំណើ​សុំ​របស់​ព្រះ​រាជ​អាជ្ញា​សាលា​ដំបូង​ខេត្ត​ព្រះវិហារ​ ដែល​ទាមទារ​ឲ្យ​សាលា​ឧទ្ធរណ៍​បន្តឃុំ​ខ្លួន​លោក​ ម៉ឺន មាន​ នេះ​គឺ​អាច​ទទួល​យក​បាន​ដើម្បី​បន្ត​ការ​ស៊ើប​អង្កេត។​

លោក​ យី សុខសាន្ត​ ពន្យល់​ថា៖​

«រឿង​នេះ​ គឺ​ខាង​តុលាការ​សាលា​ដំបូងហាក់​ដូច​ជា​មិន​ចោទ​សម្រេច​ មិន​ឲ្យ​គាត់មាន​ការ​ឃុំ​ខ្លួន​អី​ទេ​ ក៏​ប៉ុន្តែខាង​តំណាង​អយ្យការ​ គាត់​បាន​ប្តឹង​មក​ឧទ្ធរណ៍។​ អ៊ីចឹង​ហើយ​បាន​ជា​នៅ​ឃុំ​ខ្លួន​ទៀត»។

មន្ត្រី​អង្កេត​ជាន់​ខ្ពស់​របស់​សមាគម​អាដហុក​រូប​នេះ​ប្រាប់​ VOA ​បន្ថែម​ថា​ លោក ម៉ឺន មាន បាន​បាត់​ប្រយោជន៍​ខាង​ផ្លូវ​ច្បាប់​របស់​លោក​ក្នុង​សវនាការ​ ដែល​បាន​ធ្វើឡើង​នៅ​សាលា​ឧទ្ធរណ៍​ កាលពី​ថ្ងៃ​ពុធ​កន្លង​ទៅ​នេះ​ ព្រោះ​លោក​មិន​ត្រូវ​បាន​គេ​នាំ​ខ្លួន​មកចូល​រួម​សវនាការ។

លោក​ថា​ មេធាវី​របស់​លោក​ ម៉ឺន មាន​ ក៏​ទទួល​បាន​ការ​ជូន​ដំណឹង​អំពី​សវនាការ​នេះយ៉ាង​ប្រថុច​ញ៉ុច​ ដែល​ធ្វើ​ឲ្យ​មេធាវី​ខកខាន​មិន​បាន​ចូលរួម​សវនាការ​ជា​សាធារណៈ​នេះ​ផង​ដែរ។​

លោក​ យី សុខសាន្ត​ មាន​ប្រសាសន៍​បន្ថែម​ថា៖​

«អ្វី​ដែល​យើង​មើល​ឃើញ​ ការណ៍​ដែល​បើក​សវនាការ​មួយ​ ដែល​មិន​មាន​ការ​ចូលរួម​ពីមេធាវី​ វា​ហាក់​ដូច​ជាអយុត្តិធម៌​សម្រាប់​កូន​ក្តី​ ពីព្រោះ​អី​ ពេល​ខ្លះ​ខាង​សាលា​ឧទ្ធរណ៍​ហ្នឹង​គាត់បញ្ជាក់​ថា​ បើសិន​ជា​មេធាវី​លើក​ពេល​ ឬ​មួយ​ក៏​មិន​បាន​ចូល​រួម​ វា​ជា​ខាត​ប្រយោជន៍​កូន​ក្តី។ ​ប៉ុន្តែ​នៅ​ពេល​ដែល​យើង​ស្នើ​សុំ​ឲ្យលើក​លែង​ឲ្យ​គាត់​នៅ​ក្រៅ​ឃុំ​ គេ​បែរ​ជា​ ហាក់​ដូច​ជា​អត់​ឆ្លើយ​តប​ទៅលើ​ពួក​យើង​ទេ។​ អា​ហ្នឹង​ក៏​វា​ជាការ​ខាត​ប្រយោជន៍របស់​កូន​ក្តី​ដែរ​ ដែល​មិន​បាន​ឲ្យ​គាត់​នៅ​ក្រៅ​ឃុំ​អ៊ីចឹង​ណ៎ា!»។

មុន​ពេល​ត្រូវ​បាន​តុលាការ​ខេត្ត​ព្រះ​វិហារ​ឃុំខ្លួន​នោះ​ លោក​ ម៉ឺន មាន​ និង​ឪពុក​លោក​គឺ​លោក​ ស៊ុម ម៉ឺន ត្រូវ​បាន​ចាប់​ខ្លួន ​ពេល​កំពុង​បើក​គោ​យន្ត​ដឹក​សម្ភារៈ​លក់​ដូរ ​កាល​ពី​ថ្ងៃ​ទី​ ២០ ខែ​មករា ឆ្នាំ​ ២០១៩​ ដោយ​យោធា​មក​ពី​ទី​បញ្ជាការ​វរៈសេនា​តូច​អន្តរាគមន៍​លេខ ២៦១​ ស្ថិត​នៅ​ក្រោម​ទី​បញ្ជាការ​កង​ពលតូច​អន្តរាគមន៍​លេខ ៦ ​នៃ​កង​យោធពល​ខេមរភូមិន្ទ ​(យោធា​ទំាង​នោះ​ជា​កង​សន្តិ​សុខ​របស់​ក្រុមហ៊ុន​ ដែល​ទទួល​បាន​ដី​សម្បទាន​នៅ​ឃុំយាង​ ស្រុក​ជំាំក្សាន្ត)។ នេះ​បើ​យោង​តាម​របាយ​ការណ៍​របស់​អង្គការ​សិទ្ធិមនុស្ស​ផ្សេង​ទៀត​ គឺ​អង្គការ​លីកាដូ ​(Licadho)។​

របាយ​ការណ៍​របស់​អង្គការ​លីកាដូ​បាន​ឲ្យដឹង​បន្ត​ថា​ សាក្សី​មួយ​ចំនួន​បាន​រាយ​ការណ៍​ថា ​ក្រោយ​ការ​ចាប់​ខ្លួន​នោះ​មក​ ​លោក​ ម៉ឺន មាន​ និង​ឪពុកត្រូវ​បាន​វាយ​ដំ ​ដោយ​ក្រុមទាហានក្នុង​ទំនាស់​ដីធ្លី​ដែល​ស្ថិត​នៅ​លើ​ទីតាំង​ដី​សម្បទាន​ផ្តល់​ទៅ​ឲ្យ​ក្រុមហ៊ុន​មេត្រីភាព​កសិ​ឧស្សាហ​កម្ម ​ដែលមាន​ទំនាក់​ទំនង​ជាមួយ​នឹង​ឧកញ៉ា អាន ម៉ារឌី។​

លោក​ ទូច ថារិទ្ធ​ អ្នក​នាំ​ពាក្យ​សាលា​ឧទ្ធរណ៍​ មិន​ទាន់​អាច​ផ្តល់​ការ​អធិប្បាយ​អំពី​សេចក្តី​សម្រេច​របស់​តុលាការ​ ដែល​មិន​អនុញ្ញាត​ឲ្យ​លោក​ ម៉ឺន មាន ​បាន​ស្ថិត​នៅ​ក្រៅឃុំ​នោះ​ទេ។ ​ក៏​ប៉ុន្តែ​លោក​បាន​ច្រាន​ចោល​ការ​ស្តី​បន្ទោស​ថា​ តុលាការ​សាលា​ឧទ្ធរណ៍​បាន​ជូន​ដំណឹង​យឺត​យ៉ាវ​ទៅ​មេធាវី​លោក ​ម៉ឺន មាន អំពី​សវនាការ​កាលពី​ថ្ងៃពុធ។​

«ខ្ញុំ​ដូច​ក្តាប់​អត់​ទាន់​ ជុំវិញ​បញ្ហា​ហ្នឹង​ដែរ​បង​ ​ព្រោះអី​ចាំ​មើល​ខ្ញុំអាច​ឆែក​មើល​បន្តិច​សិន​បង។​ ប៉ុន្តែ​គ្រាន់តែ​ចង់​ជម្រាប​ជូន​ថា​ ទៅ​តាម​នីតិវិធី​នៃ​តុលាការ​មិន​អាចកោះ​ម្ង៉ៃហៅ​ចូល​ម្ង៉ៃ​ និង​កាត់​ម្ង៉ៃ​បាន​ទេ​បង។​ តាម​នីតិវិធី​ វា​អត់​ដែល​មាន​អ៊ីចឹង»។

យោង​តាម​របាយ​ការណ៍​របស់​អង្គការ​លីកាដូ ​ចេញ​ផ្សាយ​កាលពី​ថ្ងៃទី ​២១ ខែ​មីនា ​ឆ្នាំ​ ២០១៩​ ​លោក ​ម៉ឺន មាន​ និង​មនុស្ស​ ១៣ ​នាក់​ផ្សេង​ទៀតត្រូវ​បាន​ចោទ​ប្រកាន់​តាម​មាត្រា​ ៦២​ និង​មាត្រា​ ៥៤ នៃ​ច្បាប់​ស្តីពី​តំបន់​ការពារ​ធម្មជាតិ​ (ទាក់​ទង​នឹង​ការ​កាប់​គាស់​រុករាន​ដីព្រៃ)​ ហើយ​អាច​ប្រឈម​នឹង​ការ​ជាប់​ពន្ធនាគារ ១០​ ឆ្នាំ ​និង​ពិន័យ​ជា​ប្រាក់ ១៥០ លាន​រៀល។​

របាយ​ការណ៍​បាន​បន្ថែម​ថា​ ការ​ចាប់​ខ្លួន​លោក ​ម៉ឺន មាន រហូត​ដល់​មាន​ការ​ឃុំខ្លួន​លោក​នេះ កើត​ឡើងបន្ទាប់​ពីមាន​ការ​ធ្វើ​ទុក្ខបុកម្នេញ​ពីសំណាក់​សន្តិសុខ​ក្រុមហ៊ុន​និង​អាជ្ញាធរ​ទៅ​លើ​អ្នក​ភូមិ​ដែល​រស់​នៅ​ក្នុង​សហគមន៍​យាង​ ស្រុក​ជំាំក្សាន្តជា​ច្រើន​ឆ្នាំ​កន្លមក​ហើយ​ ដោយ​រួម​មាន​ការ​ដុត​ផ្ទះ​ប្រជា​ពល​រដ្ឋ​ ដែល​គេ​ចោទ​ថា​មាន​ការ​ចាប់​ខ្លួន​តាម​អំពើ​ចិត្ត ​និង​ការ​បន្ត​គំរាម​កំហែង​ប្រជា​ពល​រដ្ឋ​ ដែល​ជាប់​ទាក់ទង​នឹង​ទំនាស់​ដីធ្លី​ជាមួយ​ក្រុមហ៊ុន​មេត្រីភាព​កសិ​ឧស្សា​ហ​កម្ម។

ក្នុង​សំណុំ​រឿង​ដដែល​នេះ​ លោក ស៊ុម ម៉ឺន បាន​បាត់​ខ្លួន​អស់​រយៈពេល​ជាង​ពីរ​ខែ​មក​ហើយ ពោល​គឺ​គិត​ចាប់​តាំងពី​លោក​ត្រូវ​បាន​ចាប់​ឃុំ​ខ្លួនជាមួយ​កូន​ប្រុស​របស់​លោក។​

ចាប់​តាំង​ពីចុងខែ​មករា ឆ្នាំ​ ២០១៩ ​មក​ អាជ្ញាធ​រមិន​បាន​ផ្តល់​ភស្តុតាង​ដែល​សហគមន៍​អាច​ជឿ​ទុក​ចិត្ត​បាន​ពី​ទីតាំង​របស់​លោក​ ស៊ុម ម៉ឺន​ នោះ​ទេ​ ដោយ​បាន​អះអាង​ផ្សេងៗ​គ្នា​ថា គាត់​បាន​និង​កំពុង​លាក់​ខ្លួន​នៅ​ទីតាំង​អាថ៌កំបាំង​មួយ​ក្នុង​រាជធានី​ភ្នំពេញ​ ឬកំពុង​ទទួល​ការ​ព្យាបាល​សុខភាព​នៅ​រាជធានី​ភ្នំពេញ។​ នេះ​បើ​យោង​តាម​របាយ​ការណ៍​របស់​អង្គការ​ឃ្លាំមើល​ និង​ការ​ពារ​សិទ្ធិ​មនុស្ស​លីកាដូ។​

នៅ​មុន​សវនាការ​ជម្រះ​សំណើ​សុំ​នៅ​ក្រៅ​ឃុំ​របស់​លោក​ ម៉ឺន មាន​ នៅ​សាលា​ឧទ្ធរណ៍​នៅ​រាជធានី​ភ្នំពេញ​ ​កាលពី​ថ្ងៃ​ពុធ​ អ្នកស្រី​ ភឹម ម៉ៅ​ ដែល​ជា​ម្តាយ​លោក ម៉ឺន មាន ត្រូវ​បាន​ប្រាប់​ដោយ​អាជ្ញាធរ​ខេត្ត​ព្រះវិហារ​ថា​ លោក​ ម៉ឺន មាន នឹង​ត្រូវ​បាន​ដោះលែង​ឲ្យ​នៅ​ក្រៅ​ឃុំ​ បើ​អ្នកស្រី​ឈប់​ប្តឹង​ផ្តល់​អាជ្ញាធរ​ចំពោះ​ការ​បាត់​ខ្លួន​របស់​លោក​ ស៊ុម ម៉ឺន។

អ្នកស្រី​ ភឹម ម៉ៅ​ ប្រាប់​ VOA ​កាលពី​ថ្ងៃ​ពុធ​ថា​ ប្រសិន​បើ​មាន​ការ​ដោះលែង​កូន​ប្រុស​អ្នកស្រី​មែន​នោះ​ អ្នកស្រី​នឹង​ឈប់​ប្តឹង​អាជ្ញាធរ​ស្រុក​ ខេត្ត​ព្រះវិហាររឿង​បាត់​ខ្លួន​ប្តី​អ្នកស្រី​ ​តែ​បើ​កូន​ប្រុស​អ្នក​ស្រី​នៅ​បន្ត​ជាប់​ឃុំ​ទៀត​នោះ​ អ្នកស្រី​នឹង​បន្ត​ការ​ប្តឹង​ផ្តល់​តទៅ​ទៀត៕

តួលេខនៃករណីឆ្លងជំងឺកូវីដ១៩

XS
SM
MD
LG