សាលាដំបូងរាជធានីភ្នំពេញបានសម្រេចឃុំខ្លួនជនសង្ស័យចំនួន១៣នាក់ ដែលជាប់ពាក់ព័ន្ធនឹងការរំដោះឧក្រិដ្ឋជនគ្រឿងញៀនជនជាតិចិននៅខេត្តសៀមរាបកាលពីខែសីហា។
ពួកគេរងការចោទប្រកាន់មួយចំនួន រួមមាន បទលួចរត់ពីពន្ធនាគារ បង្ខាំងមនុស្សដោយខុសច្បាប់ បោះបង់អាវុធក្នុងទីកន្លែងសាធារណៈ រៀបចំចាត់តាំងក្រុមជនប្រដាប់អាវុធ សម្អាតប្រាក់ រក្សាទុកដោយខុសច្បាប់នូវសារធាតុញៀន និងកាន់កាប់ និងដឹកជញ្ជូនអាវុធដោយខុសច្បាប់។ នេះបើតាមសេចក្តីរាយការណ៍របស់សមាគមសម្ព័ន្ធអ្នកសារព័ត៌មានកម្ពុជា ហៅកាត់ថា Camboja។
អគ្គស្នងការរងនគរបាលជាតិលោកនាយឧត្តមសេនីយ៍ ម៉ក់ ជីតូ ទទួលបន្ទុកប្រឆាំងបទល្មើសគ្រឿងញៀន ប្រាប់វីអូអេនៅថ្ងៃចន្ទនេះថា តុលាការបានបញ្ជូនជនសង្ស័យ១៣នាក់នោះទៅឃុំខ្លួន ហើយសមត្ថកិច្ចក៏កំពុងស៊ើបអង្កេត និងស្វែងរកជនសង្ស័យបន្ថែមទៀត។
លោកថ្លែងថា៖ «ហ្នឹងយើងនៅបន្តថែមទៀត នៅរកមុខអ្នកសេសសល់ និងអ្នកពាក់ព័ន្ធ…. កំពុងតែស្រាវជ្រាវ។ យើងកំពុងស្រាវជ្រាវបន្ថែម។ យើងដឹងប៉ុន្តែយើងមិនទាន់និយាយបាន ពីព្រោះយើងកំពុងស្រាវជ្រាវបន្តរកវា»។
បើតាមអគ្គស្នងការរងនគរបាលជាតិរូបនេះ ជនសង្ស័យដែលបានចូលរួមរំដោះឧក្រិដ្ឋជនគ្រឿងញៀនជនជាតិចិនហើយត្រូវបានតុលាការសម្រេចឃុំខ្លួននោះ រួមមានជនជាតិចិនតៃវ៉ាន់២នាក់ ជនជាតិខ្មែរ៣នាក់ ជនជាតិខ្មែរអាមេរិកាំង៦នាក់ ជនជាតិចិនកាន់សញ្ជាតិអាមេរិកម្នាក់ និងអារ៉ាប៊ីសាអូឌីតម្នាក់។
អ្នកនាំពាក្យអគ្គនាយកដ្ឋានពន្ធនាគារលោកនុត សវនា បញ្ជាក់ឱ្យដឹងក្នុងសារតាមប្រព័ន្ធទំនាក់ទំនងតេឡេក្រាមថា ប្រតិបត្តិការបង្ក្រាបជនសង្ស័យខាងលើជាការងារសន្តិសុខកម្រិតខ្ពស់ ដូច្នេះលោកមិនអាចផ្តល់ព័ត៌មានលម្អិតពេលនេះបានទេ។
អ្នកនាំពាក្យអយ្យការអមសាលាដំបូងរាជធានីភ្នំពេញលោកប្លង់ សុផលប្រាប់វីអូអេតាមប្រព័ន្ធទំនាក់ទំនងតេឡេក្រាមថា ចៅក្រមស៊ើបសួរកំពុងបន្តនីតិវិធីទៅលើជនសង្ស័យ១៣នាក់ដែលត្រូវបានតុលាការសម្រេចឃុំខ្លួនកាលពីពេលថ្មីៗនេះ។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាព លោក យង់ គិមអេង ថ្លែងថា អាជ្ញាធរកម្ពុជាគួរតែយកចិត្តទុកដាក់ និងពង្រឹងសមត្ថភាពដើម្បីកុំឱ្យក្រុមឧក្រិដ្ឋជនមើលស្រាលថា កម្ពុជាជាកន្លែងមួយដែលងាយស្រួលក្នុងការប្រព្រឹត្តបទល្មើសផ្សេងៗ។
លោកបន្ថែមថា អាជ្ញាធរពាក់ព័ន្ធគួរតែស៊ើបអង្កេតឱ្យបានច្បាស់លាស់ពីប្រតិបត្តិការរំដោះឧក្រិដ្ឋជននេះ ដើម្បីកុំឱ្យប្រជាពលរដ្ឋមានការសង្ស័យថា សំណុំរឿងនេះមានជាប់ពាក់ព័ន្ធនឹងមន្ត្រីទទួលបន្ទុកការពារសន្តិសុខ។
លោកថ្លែងថា៖ «ចំពោះបញ្ហានេះខ្ញុំថា ខាងអាជ្ញាធរគួរតែមានការយកចិត្តទុកដាក់ ហើយបើកាលណាមានករណីបែបហ្នឹង វាអាចធ្វើឱ្យប្រជាពលរដ្ឋអាចមានការមន្ទិលសង្ស័យទៅលើ….ទីមួយទៅលើសមត្ថភាព ទីពីរអាចទៅលើថា តើមានមន្ត្រីណាដែលឃុបឃិតជាមួយនឹងឧក្រិដ្ឋជនជួញដូរគ្រឿងញៀន ដើម្បីជួយរំដោះពួកគេ ហើយគួរតែមានការស៊ើបអង្កេតឱ្យបានច្បាស់លាស់ដែរ»។
លោកបានបន្តថា សមត្ថកិច្ច ឬអាជ្ញាធរកម្ពុជាគួរអនុវត្តច្បាប់ឱ្យបានត្រឹមត្រូវ ដោយកំណត់អត្តសញ្ញាណជនសង្ស័យ ឧក្រិដ្ឋជនគ្រឿងញៀន ឬអ្នកដែលពាក់ព័ន្ធមកកាត់ទោសតាមច្បាប់ ដើម្បីបញ្ចៀសផលប៉ះពាល់ទៅលើយុវជនជំនាន់ក្រោយ។
លោកថ្លែងថា៖ «បើពុំនោះទេគឺបញ្ហាគ្រឿងញៀន វានៅតែជាបញ្ហាមួយដែលចាក់ស្រេះនៅក្នុងសង្គមយើង ហើយធ្វើឱ្យយើងខាតបង់ឱកាសនៅក្នុងការអភិវឌ្ឍជាតិ អភិវឌ្ឍសង្គម ក្នុងការអភិវឌ្ឍយុវជនយើង»។
គួររំឭកថា ហេតុការណ៍រំដោះអ្នកទោសជាជនជាតិចិនបានកើតឡើងនៅក្នុងសង្កាត់ស្វាយដង្គំ ក្រុងសៀមរាប ខេត្តសៀមរាប នៅគ្រាដែលមន្ដ្រីពន្ធនាគារ៤នាក់បានបញ្ជូនអ្នកទោសជាជនជាតិចិនឈ្មោះ Chen Hsin Han អាយុ ៤៥ឆ្នាំ ទៅគ្លីនិកធ្មេញ ហើយអង្គុយរង់ចាំការព្យាបាល។ នៅពេលកំពុងអង្គុយចាំពេទ្យព្យាបាលធ្មេញ ស្រាប់តែមានជនពាក់របាំងមុខប្រដាប់ដោយអាវុធភ្ជង់កាំភ្លើងទៅកាន់នគរបាល និងបានចងដៃមន្ត្រីប៉ូលិសផងដែរ ហើយពួកគេបានសម្រុកចូលទៅរំដោះជនជាតិចិនម្នាក់នោះ។
បើតាមរបាយការណ៍របស់នគរបាល អ្នកទោសជនជាតិចិន Chen Hsin Han អាយុ ៤៥ឆ្នាំ ត្រូវបានឃុំខ្លួនតាំងពីខែកុម្ភៈ ឆ្នាំ ២០០៩ ពីបទជួញដូរគ្រឿងញៀន ហើយត្រូវបានកាត់ទោសឱ្យជាប់ពន្ធនាគាររយៈពេល ៥២ឆ្នាំ។
កាលពីដើមខែសីហា លោក ហ៊ុន សែន បានថ្លែងជំរុញឱ្យរដ្ឋាភិបាលអាណត្តិទី៧ដែលដឹកនាំដោយកូនប្រុសរបស់លោកគឺលោកនាយករដ្ឋមន្រ្តី ហ៊ុន ម៉ាណែត ឱ្យផ្តោតការយកចិត្តទុកដាក់បង្ក្រាបបទល្មើសពាក់ព័ន្ធនឹងគ្រឿងញៀនបន្ថែមទៀត ដើម្បីឆ្លុះបញ្ចាំងពីសមត្ថភាពរបស់រាជរដ្ឋាភិបាលអាណត្តិថ្មី៕
