ក្នុងករណីរំដោះអ្នកទោសជាជនជាតិចិនម្នាក់នៅខេត្តសៀមរាប អាជ្ញាធរមានសមត្ថកិច្ចបានឃាត់ខ្លួនមនុស្ស២នាក់បន្ថែមទៀត គិតត្រឹមថ្ងៃចន្ទនេះ។ ការណ៍នេះនាំឱ្យចំនួនជនសង្ស័យក្នុងករណីដែលពាក់ព័ន្ធនឹងបទល្មើសគ្រឿងញៀនផងនោះកើនដល់៨នាក់។ នេះបើតាមមន្ត្រីជាន់ខ្ពស់នគរបាលជាតិទទួលបន្ទុកប្រឆាំងបទល្មើសគ្រឿងញៀន។
ជនសង្ស័យទាំង៨នាក់ដែលត្រូវបានកម្លាំងនគរបាលចាប់ខ្លួនបាននោះ រួមមានខ្មែរសញ្ជាតិអាមេរិកាំងចំនួន៦នាក់ (កាន់លិខិតឆ្លងដែនអាមេរិក) ជនជាតិចិនសញ្ជាតិអាមេរិកម្នាក់ (កាន់លិខិតឆ្លងដែនអាមេរិក) និងជនជាតិចិន-តៃវ៉ាន់ចំនួន១នាក់។ ពួកគេទាំងនោះត្រូវកម្លាំងមានសមត្ថកិច្ចកំណត់ថា ជាឧក្រិដ្ឋជនស៊ីឈ្នួលដើម្បីធ្វើសកម្មភាព ប៉ុន្តែសមត្ថកិច្ចមិនទាន់ដឹងនៅឡើយថា តើនរណាដែលជាមេក្លោងរបស់ពួកគេ។
អគ្គស្នងការរងនគរបាលជាតិលោកនាយឧត្តមសេនីយ៍ ម៉ក់ ជីតូ ទទួលបន្ទុកបង្ក្រាបបទល្មើសគ្រឿងញៀន ប្រាប់វីអូអេនៅថ្ងៃចន្ទនេះថា មកដល់ពេលនេះសមត្ថកិច្ចបានចាប់ខ្លួនក្រុមឧក្រិដ្ឋជន ដែលទៅរំដោះអ្នកទោសដែលជាជនជាតិចិននោះបានជាបន្តបន្ទាប់ ហើយគិតត្រឹមថ្ងៃចន្ទនេះ មានជនសង្ស័យ៨នាក់ដែលសមត្ថកិច្ចចាប់ខ្លួនបាន។
លោកថ្លែងថា៖ «ថ្ងៃមុនយើងចាប់បាន៧នាក់ ហើយយើងកំពុងតែចាប់បាន១នាក់ទៀតកំពុងតែសាកសួរ [ចាប់បាន]៨នាក់ ហើយបាទ ចាប់បានម្សិលមិញខាងអន្តោប្រវេសន៍[ចាប់បាន]ពេលវារត់ចេញតាមព្រលានហ្នឹង យើងឃាត់បាន...អាហ្នឹងដូចជាជនជាតិចិនតៃវ៉ាន់»។
លោកបន្ថែមថា នៅមានជនសង្ស័យ៨នាក់ទៀតដែលសមត្ថកិច្ចមិនទាន់ចាប់ខ្លួនបាន ក្រោយការសាកសួរក្រុមឧក្រិដ្ឋជនដែលសមត្ថកិច្ចចាប់ខ្លួនបានតាំងពីសប្តាហ៍មុន។
បើតាមលោក ម៉ក់ ជីតូ សមត្ថកិច្ចកំពុងធ្វើកិច្ចសហប្រតិបត្តិការទាំងក្នុងនិងក្រៅប្រទេសដើម្បីស្រាវជ្រាវតាមចាប់អ្នកនៅពីក្រោយខ្នងនៃក្រុមដែលធ្វើសកម្មភាពរំដោះជនជាតិចិនដែលត្រូវបានតុលាការកម្ពុជារកឃើញថាមានទោសពីបទជួញដូរគ្រឿងញៀន។
លោកបញ្ជាក់ថា៖ «ឥឡូវនេះ យើងកំពុងតែច្បាមតាមរកប៉ុន្តែវាមានបញ្ហាពីរ ទីមួយអាចលាក់ខ្លួននៅក្នុងប្រទេស ទីពីរអាចឆ្លងដែនបានតាមរបៀងវាអាចទៅប្រទេសឡាវ ព្រោះពួកគ្រឿងញៀនហ្នឹងកាលណាវារត់ អត់ហ៊ានរត់ទៅណាទេគឺរត់ទៅឡាវហើយ...គឺវាប្លែក អ៊ីចឹងបានបងប្អូនខាងពន្ធនាគារគ្នា មិនសូវបានចាប់អារម្មណ៍ ដល់ចំរឿងហ្នឹងទៅដូចជាភាន់ភាំងចន្លោះប្រហោងអ៊ីចឹងបាទ»។
កាលពីថ្ងៃទី១៧ ខែសីហា ឆ្នាំ២០២៣ អ្នកទោសជាជនជាតិចិនម្នាក់ឈ្មោះ Chen Hsin Han អាយុ ៤៥ឆ្នាំ ត្រូវបានរំដោះចេញពី គ្លីនិកធ្មេញមួយកន្លែងនៅក្នុងស្រុកស្វាយដង្គំ ខេត្តសៀមរាប ដោយជនពាក់របាំងមុខប្រដាប់ដោយអាវុធ។ ក្នុងគ្រាសម្រុកចូលរួមទៅរំដោះជនជាតិចិននោះ ពួកខ្មាន់កាំភ្លើង បានភ្ជង់អាវុធទៅកាន់នគរបាល និងបានចងដៃមន្ត្រីប៉ូលិសផងដែរ។
ថ្លែងនៅក្នុងសន្និសីទសារព័ត៌មានកាលពីថ្ងៃទី១៩ ខែសីហា អំពីការធ្វើសកម្មភាពទៅរំដោះ មេក្លោងគ្រឿងញៀនម្នាក់នៅខេត្តសៀមរាបនោះ លោក ម៉ក់ ជីតូ អគ្គស្នងការរងនគរបាលជាតិបានអះអាងថា ក្រុមឧក្រិដ្ឋជននេះបានរៀបចំផែនការត្រៀមធ្វើសកម្មភាពរយៈពេល២ខែមកហើយដើម្បីរំដោះអ្នកទោសជនជាតិចិនខាងលើនោះ ពោលគឺពួកគេរៀបចំផែនការតាំងពីនៅសហរដ្ឋអាមេរិកមកម្ល៉េះ។
លោកថ្លែងថា៖ «អ៊ីចឹងចំពោះមុខនេះការងាររបស់មន្ត្រីនគរបាលយុត្តិធម៌ អគ្គស្នងការដ្ឋាននគរបាលជាតិទីមួយគឺស្រាវជ្រាវបង្ក្រាបមេក្លោង និងចាប់ឱ្យបានយកមកវិញ ផ្តន្ទាទោសយ៉ាងធ្ងន់ធ្ងរចំពោះទណ្ឌិតនេះឯង។ ហើយទីពីរ ពាក់ព័ន្ធនឹងការសង្ស័យចេះ សង្ស័យចុះគឺយើងនឹងស្រាវជ្រាវបង្ក្រាបបំបាត់ភាពសង្ស័យនេះ ហើយនឹងរាយការណ៍ជូនអ្នកសារព័ត៌មានសាជាថ្មី»។
យ៉ាងណាមិញ មេប៉ូលិសបង្ក្រាបគ្រឿងញៀនរូបនេះ បានទទួលស្គាល់ថានេះអាចមកពី ភាពចន្លោះប្រហោងរបស់សមត្ថកិច្ច ដោយសារតែកន្លងទៅកម្ពុជាមិនដែលធ្លាប់មានករណីខ្មាន់កាំភ្លើងសម្រុកចូលមករំដោះអ្នកទោសបែបនេះឡើយ។
លោក តេង ច័ន្ទណាត ស្នងការនគរបាលខេត្តសៀមរាប ប្រាប់វីអូអេនៅថ្ងៃចន្ទនេះថា សមត្ថកិច្ច និងមន្ត្រីពាក់ព័ន្ធនានាបាននឹងកំពុងធ្វើការស្រាវជ្រាវ និងតាមរកបក្ខពួកជនដែលប្រព្រឹត្តអំពើឧក្រិដ្ឋនេះ។
លោកថ្លែងថា៖ «ខ្ញុំគ្រាន់តែបញ្ជាក់ថា សមត្ថកិច្ចកំពុងតែបន្តស្រាវជ្រាវទៅលើកិច្ចការនោះ ហើយប្រសិនបើបានព័ត៌មានអីយ៉ាងណាបន្ថែមទៀតគឺយើងនឹងផ្តល់ទៅអ្នកសារព័ត៌មានទាំងអស់ឱ្យបានដឹងទាំងអស់គ្នា»។
ការចរាចរណ៍គ្រឿងញៀននៅកម្ពុជាត្រូវបានអ្នកតាមដានសង្គមមួយចំនួនមើលឃើញថា ហាក់មិនទាន់មានការបង្រ្កាបបានល្អប្រសើរនៅឡើយ ហើយញ្ហានេះកាន់តែរីកធំឡើងក្នុងស្ថានភាពគួរឱ្យបារម្ភ។ ពួកគេជំរុញឱ្យមានការរៀបចំវិធានការថ្មី និងបើកឱ្យមានការចូលរួមឱ្យបានច្រើនពីគ្រប់ភាគីពាក់ព័ន្ធ ក្រោមរដ្ឋាភិបាលថ្មីក្នុងការបង្រ្កាបបទល្មើសគ្រឿងញៀននៅកម្ពុជា។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍និងសន្តិភាព លោក យង់ គិមអេង លើកឡើងថា រដ្ឋាភិបាលអាណត្តិថ្មីគួរតែពង្រឹង និងយកចិត្តទុកដាក់លើការអនុវត្តច្បាប់ ព្រមទាំងធ្វើការសហការជាមួយភាគីពាក់ព័ន្ធដើម្បីបង្ការ និងទប់ស្កាត់សកម្មភាពទាំងអស់នោះ។
លោកថ្លែងថា៖ «ទន្ទឹមនឹងការអប់រំឱ្យយុវជនយល់ដឹង ហើយមានការប្រុងប្រយ័ត្នបន្ថែមទៀត ហើយត្រូវមានកិច្ចសហការពីបណ្តាស្ថាប័នពាក់ព័ន្ធសង្គមស៊ីវិល ហើយនិងបណ្តាប្រជាពលរដ្ឋផ្សេងៗទៀត ដៃគូផ្សេងៗទៀតឱ្យចូលរួមនៅក្នុងការបង្ការ និងទប់ស្កាត់»។
កាលពីដើមខែសីហា លោកនាយករដ្ឋមន្រ្តី ហ៊ុន សែន បានថ្លែងជំរុញឱ្យរដ្ឋាភិបាលអាណត្តិទី៧ដែលនឹងដឹកនាំដោយកូនប្រុសរបស់គាត់គឺលោក ហ៊ុន ម៉ាណែត ឱ្យផ្តោតការយកចិត្តទុកដាក់បង្ក្រាបបទល្មើសពាក់ព័ន្ធនឹងគ្រឿងញៀនបន្ថែមទៀត ដើម្បីឆ្លុះបញ្ចាំងពីសមត្ថភាពរបស់រាជរដ្ឋាភិបាលអាណត្តិថ្មី៕
