លោក កែវ អ៊ាត អាយុ៥២ឆ្នាំ ធ្លាប់ជាជំទប់ទី២នៃឃុំព្រៃខ្លា ស្រុកកោះអណ្តែត ខេត្តតាកែវ មកពីអតីតគណបក្សសង្រ្គោះជាតិ ដែលត្រូវបានប្រជាពលរដ្ឋបោះឆ្នោតគាំទ្រ កាលពីថ្ងៃទី៤ ខែមិថុនា ឆ្នាំ២០១៧។ លោកបានសម្រេចចុះចូលជាមួយគណបក្សប្រជាជនកម្ពុជា មួយថ្ងៃមុនកាលកំណត់ឱសានវាទរបស់លោកនាយករដ្ឋមន្រ្តី ហ៊ុន សែន ដែលបានអំពាវនាវឲ្យចុះចូលត្រឹមថ្ងៃទី២៦ ខែវិច្ឆិកា។ ទោះជាយ៉ាងណា លោកនៅមានមន្ទិលក្នុងខ្លួននៅឡើយ ដោយសារលោកបានស្បថស្បែនឹងខ្លួនឯង និងប្រជាជនរួចហើយថា មិនចុះចូលជាដាច់ខាត។
រឿងមួយជាអកុសលសម្រាប់រូបលោក គឺលោកកំពុងប្រឈមនឹងដីកាកោះហៅរបស់តុលាការខេត្តតាកែវ ដែលតម្រូវឲ្យលោកត្រូវតែសម្រេចចិត្តចុះចូល ដើម្បីរួចខ្លួន។ លោកមានប្រសាសន៍ថា មានការសន្យាពីថ្នាក់ដឹកនាំគណបក្សប្រជាជននៅឃុំស្រុករបស់លោកថា បើលោកចុះចូល នឹងរួចខ្លួនពីផ្លូវច្បាប់។
នៅក្នុងដីកាបង្គាប់ឲ្យចូលខ្លួន ចុះថ្ងៃទី២២ ខែវិច្ឆិកា ចៅក្រមស៊ើបសួរនៃសាលាដំបូងខេត្តតាកែវ លោក អឿង វណ្ណា បានកោះហៅលោក កែវ អ៊ាត ឲ្យចូលខ្លួននៅថ្ងៃទី៤ ខែធ្នូ ឆ្នាំ២០១៧ ករណីចោទប្រកាន់ពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ ប្រព្រឹត្តនៅភូមិតាំរាសី ឃុំព្រៃខ្លា ស្រុកកោះអណ្តែត កាលពីថ្ងៃទី២០ ខែឧសភា ឆ្នាំ២០១៧។ ការចោទប្រកាន់នោះ គឺទាក់ទងនឹងការឃោសនាបោះឆ្នោតក្រុមប្រឹក្សាឃុំសង្កាត់កាលពីជាង៦ខែមុន ដែលលោក អ៊ាត បានអះអាងថា លោកមិនបានប្រព្រឹត្តខុសដូចការចោទប្រកាន់នោះទេ។ លោកមានប្រសាសន៍ថា សំឡេង និងសកម្មភាពរបស់លោកត្រូវបានកាត់ត ដើម្បីបង្ហាញថា លោកបានប្រព្រឹត្តខុស។
ទោះជាយ៉ាងណា លោក កែវ អ៊ាត មានប្រសាសន៍ថា លោកយល់ថា ករណីទាំងនេះ បានបញ្ចប់រួចទៅហើយ តែពេលនេះស្រាប់តែតុលាការចេញដីកាឲ្យចូលខ្លួន ដែលលោកយល់ថា នេះជាសម្ពាធធ្ងន់ធ្ងរមួយ ដើម្បីឲ្យលោកចុះចូលជាមួយគណបក្សប្រជាជនកម្ពុជានាពេលនេះ។
លោកបានថ្លែងនៅថ្ងៃទី២៥ខែវិច្ឆិកា ថា៖ «ឥឡូវខ្ញុំមិនដឹងសម្រេចថាម៉េច មានតែសម្រេចទៅចូលជាមួយគេ អាហ្នឹងយើងវារួចខ្លួន។ ហើយដល់យើងមិនចូលជាមួយគេ វាពិបាកនឹងដោះស្រាយ ហើយគ្មានពីណាជួយខ្ញុំផងឥឡូវ។ វាពិបាកអញ្ចឹង បងឯងគិតមើល ឥឡូវតុលាការ គេហៅទៅ គេមិនហៅធ្វើអី រឿងតែប៉ុណ្ណឹង។ ទីមួយគេដាក់គំនាបឲ្យយើង ចុះចូលជាមួយគេ អាហ្នឹងយើងអាចរួចខ្លួន។ បើយើងមិនចុះចូល កម្មវិធីរបស់គេ មានតទៅមុខទៀត មិនដឹងគេធ្វើអីយើង។ ឥឡូវមានតែសម្រេចថា ទៅជាមួយគេអញ្ចឹងម្មងទៅបង យកម៉ារស់សិនទៅ យកម៉ារួចខ្លួន ចាំម៉េចម៉ា ចាំគិតទៀត»។
លោកបានថ្លែងបែបនេះនៅពេលVOAទាក់ទង តាមទូរស័ព្ទ មុនថ្ងៃកំណត់ចុះចូលថ្ងៃទី២៦ ខែវិច្ឆិកា។
មុនពេលចុះចូល លោក កែវ អ៊ាត ដែលបានចូលរួមជាមួយគណបក្សសម រង្ស៊ី តាំងពីឆ្នាំ១៩៩៨ បានឲ្យដឹងទៀតថា លោកត្រូវបានគេព្យាយាមបញ្ចុះបញ្ចូលយ៉ាងតិច៤ដង និងរងការគំរាមកំហែងក្នុងរូបភាពយកនគរបាល និងទាហាន សរុបជិត២០នាក់ មកមុខផ្ទះរបស់លោក នាពេលយប់ ចំនួនពីរដង។ ទោះជាយ៉ាងណា លោកបញ្ជាក់ថា នាពេលនោះ លោកនៅតែប្រកាន់ជំហរមិនចុះចូល បើទោះជាគណបក្សសង្រ្គោះជាតិ ត្រូវបានរំលាយក៏ដោយ។
លោក កែវ អ៊ាត មានប្រសាសន៍បន្តថា ពីរថ្ងៃមុនការចេញដីកានេះ លោកបានស្បថស្បែ និងនិយាយនៅចំពោះមុខប្រជាជនដែលគាំទ្ររូបលោកថា លោកមិនចុះចូលនោះទេ ដែលពេលនោះលោកមិនបានដឹងថា តុលាការចេញដីកាឲ្យលោកចូលខ្លួននោះទេ។
លោកមានប្រសាសន៍ថា៖ «ពលរដ្ឋគាត់ចេះតែសួរម៉េចឡូវវិញយើង។ សម្តេចកោះហៅពួកយើងឲ្យទៅចូលរួមជាមួយគេហើយ ម៉េចយើងទៅឬក៏មិនទៅ? ខ្ញុំក៏បានស្បថថា ខ្ញុំមិនអាចក្បត់ឆន្ទៈខ្លួនឯង ឬក៏ឆន្ទៈពលរដ្ឋបានទេ ខ្ញុំមិនទៅចុះចូលជាមួយអ្នកណាទេ ព្រោះក្តាមឥឡូវវាពេញតាមភ្លឺ(ស្រែ) ភ្លឺណាក៏មានក្តាមដែរ ខ្ញុំមិនចង់បានទេ អារឿងប្រាក់ខែប៉ុណ្ណឹង»។
កាលពីថ្ងៃទី២៧ ខែវិច្ឆិកា VOAបានចុះទៅជួបលោក កែវ អ៊ាត នៅផ្ទះរបស់លោកក្នុងឃុំព្រៃខ្លា លោកបានបដិសេធអត្ថាធិប្បាយបន្ថែមលើករណីរបស់លោក ក្រោយការចុះចូលជាមួយគណបក្សប្រជាជនកម្ពុជា។
នៅពេល លោក កែវ អ៊ាត កំពុងជួបជាមួយអ្នកយកព័ត៌មានVOA ក្រុមប្រឹក្សាឃុំព្រៃខ្លា ខាងគណបក្សប្រជាជនកម្ពុជា លោក ផឹង ផាន បានជិះម៉ូតូ ចូលមកផ្ទះរបស់លោក កែវ អ៊ាត នៅរសៀលថ្ងៃទី២៧ ខែវិច្ឆិកា ដោយប្រាប់លោក កែវ អ៊ាត ឲ្យទៅចូលរួមពិធីប្តេជ្ញាសច្ចា នៅថ្ងៃទី២៨ ខែវិច្ឆិកា។
មិនមែនតែលោក អ៊ាត នោះទេដែលជាប់បណ្តឹងតុលាការ ក្រុមប្រឹក្សាពីររូបទៀតនៃឃុំព្រៃខ្លា ក៏បានចុះចូលជាមួយគណបក្សប្រជាជនផងដែរ ដោយពួកគេសង្ឃឹមថា នឹងរួចផុតពីការចោទប្រកាន់របស់តុលាការ នៅក្នុងសំណុំរឿងដូចគ្នា។ ក្រៅពីនោះ សមាជិកគណបក្សសង្រ្គោះជាតិ៣រូបទៀត ដែលមិនជាប់ឆ្នោត ក៏កំពុងប្រឈមមុខនឹងចំណាត់ការរបស់តុលាការ ក្នុងសំណុំរឿងដូចគ្នា ប៉ុន្តែពួកគេមិនបានចុះចូលនោះទេ ដោយសង្ឃឹមថា ការចុះចូលរបស់លោក កែវ អ៊ាត និងក្រុមប្រឹក្សាពីររូបទៀត នឹងអាចជួយពួកគេឲ្យរួចផុតពីការចោទប្រកាន់របស់តុលាការ។
គណបក្សសង្រ្គោះជាតិទទួលបាន៣អាសនៈសម្រាប់ឃុំព្រៃខ្លា កើនឡើង១អាសនៈ ខណៈគណបក្សប្រជាជនទទួលបាន៦អាសនៈ សម្រាប់ការបោះឆ្នោតក្រុមប្រឹក្សាឃុំសង្កាត់កាលពីខែមិថុនា ឆ្នាំ២០១៧។
លោក កែវ អ៊ាត មានប្រសាសន៍ថា មិនមានអ្នកណាអាចជួយរូបលោកបាននោះទេ សូម្បីតែលោក ម៉ៅ ផល ដែលធ្លាប់ជា ប្រធានគណៈកម្មាធិការប្រតិបត្តិខេត្តនៃគណបក្សសង្រ្គោះជាតិ ក៏ត្រូវបានកាត់សិទ្ធិនយោបាយចំនួន ៥ឆ្នាំផងដែរ។
អ្នកនាំពាក្យតំណាងចៅក្រមស៊ើបសួរនៃសាលាដំបូងខេត្តតាកែវ លោក លឹម សុខន មានប្រសាសន៍ថា នេះជានីតិវិធីរបស់តុលាការ ដោយមិនពាក់ព័ន្ធនឹងសម្ពាធ ដើម្បីឲ្យមានការចុះចូលជាមួយគណបក្សប្រជាជនកម្ពុជានោះទេ។
គំនាបសង្កត់ប្រឆាំងនឹងការគោរពឆន្ទៈរាស្រ្ត
ក្រុមប្រឹក្សាស្រុកកោះអណ្តែតមកពីអតីតគណបក្សសង្រ្គោះជាតិ លោក ចាន់ លាភ អាយុ៦៦ឆ្នាំ ជាអតីតទាហានម្នាក់ ដែលមិនបានចុះចូលជាមួយគណបក្សប្រជាជនកម្ពុជា មានប្រសាសន៍ថា ចំណាត់ការរបស់តុលាការ គ្មានគោលបំណងអ្វីក្រៅពីបង្ខំឲ្យមន្រ្តីគណបក្សទាំងនោះចុះចូលនោះទេ។
លោកមានប្រសាសន៍ថា៖ «វាអត់ដាក់គំនាបអីធ្ងន់ធ្ងរទេ វាមកចិត្តសាស្រ្ត អង្វរក ជាយុទ្ធវិធីបត់បែន លួងលោម។ វាមិនឲ្យចំណុចក្តៅមកយើងទេ តែដល់ក្រោយការរំលាយហើយនេះ មានការដាក់គំនាប ដូចជាឃុំព្រៃខ្លាហ្នឹង ពាក់ព័ន្ធនៅជាប់ពាក្យបណ្តឹងហ្នឹង វាដាក់គំនាប ដាក់ដីកានាំខ្លួន ឲ្យចូល បើមិនចូល ចាប់ដាក់គុក។ បើអញ្ចឹង ខ្ញុំគ្មានយុទ្ធវិធីអីដោះស្រាយទេ ខ្ញុំសម្របសម្រួលរកវិធីសាស្រ្ត ដើម្បីឲ្យមនុស្ស ដោះខ្លួនរួចពីគុក ឲ្យចុះចូលគេទៅ ដើម្បីបត់បែនផ្ទៃក្នុង ព្រោះមិនមែនឲ្យចូលដោយវាចង់ទេ។ ពួកអស់ហ្នឹង មិនចង់ចូលសោះ»។
លោកបញ្ជាក់ថា អ្នកចុះចូលភាគច្រើន រងគំនាប ដូចជាការឃ្លាំមើលពីសំណាក់អាជ្ញាធរ និងសមត្ថកិច្ច និងគំនាបខាងផ្លូវតុលាការជាដើម។
លោក ចាន់ លាភ ដែលបានចូលរួមជាមួយគណបក្សសម រង្ស៊ី តាំងពីឆ្នាំ១៩៩៧ មានប្រសាសន៍ថា លោកមិនបានចុះចូលជាមួយគណបក្សប្រជាជនកម្ពុជានោះទេ បើទោះជាលោកប្រឈមនឹងការអូសទាញពីសំណាក់មន្រ្តីគណបក្សកាន់អំណាចក៏ដោយ។
លោកមានប្រសាសន៍ថា៖ «បើកុំចោទ កុំរំលាយគណបក្សខ្ញុំចោទថា ក្បត់ជាតិ ខ្ញុំអាចនឹងសម្របសម្រួលការងារហ្នឹងកើតដែរ។ ប៉ុនខ្ញុំខំតស៊ូមក ថាធ្វើនូវអំពើល្អ ចូលរួមក្នុងការអភិវឌ្ឍ ដើម្បីសង្គមជាតិ ទីបំផុតមកចោទខ្ញុំថាក្បត់ជាតិ ហើយឲ្យខ្ញុំចូលទៅ មនុស្សក្បត់ជាតិ ចូលទៅអង្គុយនៅជាមួយនឹងគ្នាម៉េចនឹងកើតទៅ»។
លោកបន្តថា ក្រោយការរំលាយគណបក្សសង្រ្គោះជាតិកាលពីថ្ងៃទី១៦ ខែវិច្ឆិកា មន្រ្តីគណបក្សប្រជាជនកម្ពុជានៅថ្នាក់ស្រុក បានទាក់ទងរូបលោក ដោយអះអាងថា នឹងរក្សាតួនាទី និងប្រាក់ខែរបស់លោកចំនួន ៧៥ម៉ឺនរៀល ឲ្យនៅដដែល ប្រសិនបើចុះចូល។
ដោយសារការបាត់បង់តំណែងក្រុមប្រឹក្សាស្រុកនេះ លោក ចាន់ លាភ មានប្រសាសន៍ថា លោកពឹងផ្អែកជីវិតលើការធ្វើស្រែបន្តិចបន្តួច និងការជួយផ្គត់ផ្គង់របស់កូនៗ ដែលធ្វើការជាកម្មករសំណង់នៅប្រទេសថៃ។
ចំណែកលោក អ៊ុំ សំអឿន អាយុ៤៨ឆ្នាំ ជាអតីតជំទប់ទី២នៃឃុំក្រពុំឈូក ក្នុងស្រុកកោះអណ្តែតដែរនោះ ក៏មិនបានសម្រេចចិត្តចូលដែរ បើទោះមានការបញ្ចុះបញ្ចូលជាបន្តបន្ទាប់យ៉ាងណាក៏ដោយ។ លោកបញ្ជាក់ថា លោកគោរពឆន្ទៈរាស្រ្តដែលបានបោះឆ្នោតជូនរូបលោក។
លោកមានប្រសាសន៍ថា៖ «ស្ថានភាពឥឡូវហ្នឹង នៅបន្តអូសទាញមិនឈប់ទេ ប៉ុន្តែខ្ញុំដាច់ខាតគឺជំហរ មិនអាចក្បត់ឆន្ទៈប្រជារាស្រ្តខ្ញុំបានទេ មិនអាចចូលទៅជាមួយគេបានទេ ទោះបីយ៉ាងណាក៏ដោយ ក៏មិនត្រូវទៅដែរ អត់ទេ»។
លោកមានប្រសាសន៍ថា មុនរំលាយគណបក្ស លោកត្រូវបានទាក់ទងចំនួន៣ដងពីសំណាក់មន្រ្តីគណបក្សប្រជាជននៅថ្នាក់ឃុំ ដើម្បីឲ្យចុះចូលតែលោកបានបដិសេធជាបន្តបន្ទាប់។
លោកមានប្រសាសន៍ថា៖ «ពេលហ្នឹងគេថា មេឃុំ គេថាមកមក កុំនៅ។ ជៀសអាលាយមិនរួចទេ។ ខ្ញុំថាអ្ហេខ្ញុំមិនអាចទៅបានទេ។ អាលាយក៏អាលាយទៅ ពូឯងមិនបាច់មកទាក់ទងខ្ញុំអីអញ្ចឹងទេ ឈប់ណា។ ហើយគាត់អ្ហេអានេះគ្នាឯង គាត់ចេះតែប្រាប់ទៅឲ្យមកមក យកប្រាក់ខែ ប្រាក់អី ស៊ីដដែល ហើយអំណាចនៅដដែល»។
គេចខ្លួន ដោយសាររងការគំរាមកំហែងឲ្យចុះចូល
លោក ហ៊ន ឈោយ អាយុ៦៥ឆ្នាំ ជំទប់ទី ២ ឃុំតាគ្រាម ស្រុកបាណន់ ខេត្តបាត់ដំបង បានកំពុងរត់គេចខ្លួន ចាប់តាំងពីថ្ងៃទី២២ ខែវិច្ឆិកា ដោយសារតុលាការបានចេញដីកាឲ្យលោកចូលខ្លួនទៅតុលាការ ករណីជម្លោះដីធ្លីជាមួយបងប្អូនកាលពីឆ្នាំ២០១៤។ លោកយល់ថា ករណីនេះបានបញ្ចប់រួចទៅហើយ តែតុលាការទើបតែចេញដីកាកោះហៅនាពេលនេះ។ ដោយលោកបានឃើញមានការចាប់ខ្លួនសកម្មជនគណបក្សមួយរូបក្នុងឃុំតាគ្រាម ក្នុងសំណុំរឿងដែលមានការចោទប្រកាន់ថា ឃាតកម្ម ដូច្នេះលោកបានសម្រេចចិត្តគេចខ្លួន។
លោកមានប្រសាសន៍ថា៖ «គេឲ្យខ្ញុំចុះចូល រឿងហ្នឹងគេហ្នឹងបញ្ចប់អញ្ចឹង។ ខ្ញុំថាអត់ទេ ខ្ញុំអត់មានបញ្ចប់ទេ ព្រោះអីរឿងខ្ញុំ វាមិនមែនដល់ទោសព្រហ្មទណ្ឌណា។ ខ្ញុំដឹងថា ពួកហ្នឹងវាអត់មានបំណងល្អនឹងយើងទេ វាកំពុងតែដាក់សម្ពាធហើយ ព្រោះអីគាត់ចាប់ សមាជិកខ្ញុំមួយហើយ គាត់ធ្លាក់ឆ្នោតហើយ»។
លោកបានបញ្ជាក់បន្ថែមថា៖ «ប៉ុនខ្ញុំថា បងប្អូនកុំបារម្ភ រឿងខ្ញុំដាច់ខាត អត់ក្បត់ឧត្តមគតិ អត់ក្បត់បងប្អូនដែលបោះឆ្នោតឲ្យសង្រ្គោះជាតិ ឲ្យខ្ញុំទៅចូលគេ វាទាបថោក ខ្ញុំមិនអាចរស់នៅឃុំតាគ្រាមបានទេ»។
លោក ជា ជីវ ជាអតីតប្រធានគណៈកម្មាធិការប្រតិបត្តិខេត្តបាត់ដំបងរបស់គណបក្សសង្រ្គោះជាតិ ដែលត្រូវបានកាត់សិទ្ធិនយោបាយដែរ មានប្រសាសន៍ថា សមាជិករបស់លោកចំនួនពីរនាក់ ម្នាក់បានជាប់បណ្តឹងនៅតុលាការ ហើយម្នាក់ទៀតរងការគាបសង្កត់ ដោយសារកម្លាំងសមត្ថកិច្ចបានមកដល់ផ្ទះ បានគេចខ្លួន ដើម្បីកុំឲ្យប្រឈមនឹងការបង្ខំឲ្យចុះចូល។ លោកមានប្រសាសន៍ថា សមាជិកម្នាក់ទៀតត្រូវបានតុលាការកោះហៅ និងចោទប្រកាន់ក្នុងសំណុំរឿងឃាតកម្ម និងបានឃុំខ្លួនរូបលោក ដោយសារលោកប្រកាន់ជំហរតឹងរ៉ឹងមិនចុះចូល។
លោក ជា ជីវ មានប្រសាសន៍ថា៖ «អញ្ចឹងប្រព័ន្ធតុលាការគេកោះហៅ គេកោះហៅឲ្យគាត់នឹងអញ្ជើញមក ហើយខាងគណបក្សកាន់អំណាចនៅមូលដ្ឋានបានជជែកជាមួយគាត់ បើសិនជាមានការចុះចូល អាហ្នឹងផ្លូវតុលាការដោះស្រាយបាន»។ លោកបញ្ជាក់ថា សកម្មជនរូបនោះមិនព្រមចុះចូលនោះទេ ដោយសារលោកយល់ថា លោកមិនបានប្រព្រឹត្តខុសដូចការចោទប្រកាន់នោះទេ។
ចុះចូលដោយអស់ពីចិត្ត?
អ្នកវិភាគនយោបាយ លោក មាស នី យល់ថាប្រសិនបើមានការចុះចូលច្រើន នោះបង្ហាញថា គណបក្សសង្រ្គោះជាតិមានភាពទន់ខ្សោយ។ ទោះជាយ៉ាងណា លោកបានចោទជាសំណួរទៅលើការចុះចូលដោយស្មោះត្រង់ ដោយលោកសង្កេតឃើញមានការដាក់សម្ពាធតាមប្រព័ន្ធតុលាការនេះ។
លោកមានប្រសាសន៍ថា៖ «វាមិនច្បាស់ថាការចុះចូលនេះ វានឹងបង្ហាញអំពីការចុះចូលទាំងចិត្ត ទាំងគំនិត ទាំងបេះដូច១០០ភាគរយទេបាទ ដោយសារតែមានសម្ពាធ អញ្ចឹងអ្នកខ្លះក៏ចូលដើម្បីតែរួចខ្លួន។ ប៉ុន្តែបេះដូងគេ ទឹកចិត្តគេ វាមិនបានទៅជាមួយណា»។
អ្នកស្រី ម៉េង សុភារី អតីតប្រធាននាយកដ្ឋានកិច្ចការបោះឆ្នោត និងនីតិកម្មនៃគណបក្សសង្រ្គោះជាតិដែលត្រូវបានកាត់សិទ្ធិនយោបាយដោយសារអ្នកស្រីជាសមាជិកគណៈកម្មាធិការនាយក មានប្រសាសន៍ថា ភាគច្រើនអ្នកដែលចុះចូល គឺដោយសារពួកគេរងការគំរាមកំហែង និងរងគំនាប ជាបន្តបន្ទាប់។ អ្នកស្រីបញ្ជាក់ថា មានតែចំនួនតូចប៉ុណ្ណោះ ដែលពួកគេចុះចូល ដើម្បីរក្សាតំណែង និងទទួលលាភសក្ការៈមួយចំនួន។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានបដិសេធការចោទប្រកាន់ថា គណបក្សប្រជាជនកម្ពុជាបានដាក់គំនាប ដើម្បីឲ្យមានការចុះចូល។ លោកបញ្ជាក់ថា រាល់ការចុះចូលគឺ មានការស្ម័គ្រចិត្តដោយខ្លួនឯង។
ឧទាហរណ៍មួយគឺលោក កែវ អ៊ាត និងមន្រ្តីគណបក្សសង្រ្គោះជាតិផ្សេងទៀតនៅក្នុងស្រុកកោះអណ្តែត ដែលបានចុះចូលជាមួយគណបក្សប្រជាជនកម្ពុជាទោះជាលោកធ្លាប់បានប្រកែកមិនចុះចូលមែន តែទីចុងបំផុតដោយសារសម្ពាធពីតុលាការនិងការរំខានផ្សេងៗ លោកបានចូលប្តេជ្ញាកាលពីថ្ងៃទី២៨ ខែវិច្ឆិកាជាមួយគណបក្សកាន់អំណាច។ នៅចំពោះមុខមន្រ្តីគណបក្សប្រជាជនកម្ពុជា លោក កែវ អ៊ាត បានឡើងប្តេជ្ញាតាមសារសរសេរដោយមន្រ្តីគណបក្សប្រជាជនថា លោកសូមចុះចូលនិងប្តេជ្ញាគាំទ្រគណបក្សកាន់អំណាច ដោយមិនងាករេនោះទេ។
នៅក្នុងសំឡេងដែលត្រូវបានផ្សព្វផ្សាយតាមបណ្តាញសង្គមហ្វេសប៊ុក កាលពីសប្តាហ៍មុន លោកនាយករដ្ឋមន្រ្តី ហ៊ុន សែន មានប្រសាសន៍ថាការចុះចូលរបស់មន្រ្តីថ្នាក់ក្រោមគណបក្សសង្រ្គោះជាតិ គឺដើម្បីកុំឲ្យពួកគេប្រមូលផ្តុំកម្លាំង និងបង្កើតបក្សថ្មី ឬក៏ទៅចូលរួមជាមួយបក្សសិទ្ធិមនុស្ស និងភ្លើងទៀន ដែលជាសម្ព័ន្ធរបស់គណបក្សសង្រ្គោះជាតិ។ លោកបន្តថា សមាជិកក្រុមប្រឹក្សារបស់គណបក្សប្រឆាំង មិនអាចក្បត់នឹងគណបក្សប្រជាជនកម្ពុជារបស់លោកនោះទេ ដោយសារពួកគេនៅរយៈពេលយូរ មុននឹងមានការបោះឆ្នោតក្រុមប្រឹក្សាឃុំសង្កាត់ក្នុងរយៈពេល៥ឆ្នាំទៀត។
លោកមានប្រសាសន៍ថា៖ «ហើយពួកគេចូលរួមជាមួយយើងយ៉ាងស្មោះស្ម័គ្រ ដើម្បីប្រមូលកម្លាំង ដើម្បីគាទ្រគណបក្សប្រជាជន។ ពីមុនគេប្រមូលកម្លាំងគាំទ្រសង្រ្គោះជាតិ ឥឡូវត្រូវធ្វើឲ្យពួកគេគាំទ្រកម្លាំងគាំទ្រគណបក្សប្រជាជន ព្រោះពួកគេនៅមានរយៈពេលជិត៥ឆ្នាំទៀត ដូច្នេះពួកគេមិនអាចក្បត់យើងបានទេ បើក្បត់យើង ក៏យើងត្រូវដកគេចោលដែរ។ ប៉ុន្តែបើសិនវានៅសេសសល់តិចតួច អាហ្នឹងគឺជារឿងមួយ ប៉ុន្តែគឺនៅរយៈពេល៥ឆ្នាំ យើងអាចអប់រំគេ ទាក់ទាញគេ ហើយឲ្យពួកគេសកម្ម ដើម្បីយកពួកគេប្រើប្រាស់ ដើម្បីទាញយកកម្លាំងត្រឡប់មកវិញ»។
បើតាមទិន្នន័យដែលផ្តល់ដោយមន្រ្តីគណបក្សប្រជាជនកម្ពុជា មន្រ្តីគណបក្សសង្រ្គោះជាតិចំនួន២.៦០៣នាក់ បានចុះចូលជាមួយគណបក្សប្រជាជនកម្ពុជា។ ក្នុងនោះមានសមាជិកក្រុមប្រឹក្សាខេត្តចំនួន ៩នាក់ ក្រុងស្រុកចំនួន ៧១នាក់ មេឃុំចៅសង្កាត់ចំនួន ៦៤នាក់ និងក្រុមប្រឹក្សាឃុំសង្កាត់ចំនួន ៧៧២នាក់ និងបេក្ខជនមិនជាប់ឆ្នោតចំនួន១.៦៣៤នាក់។
ក្នុងការបោះឆ្នោតឃុំ-សង្កាត់កាលពីខែមិថុនាកន្លងទៅ គណបក្សសង្គ្រោះជាតិ ដណ្ដើមបានអាសនៈក្រុមប្រឹក្សាឃុំ-សង្កាត់ចំនួន៥០០៧ និងទទួលបានតំណែងជាមេឃុំ-ចៅសង្កាត់ចំនួន៤៨៩ ក្នុងចំណោម១៦៤៦ឃុំសង្កាត់នៅទូទាំងប្រទេស និងទទួលបានសំឡេងឆ្នោតគាំទ្រជាង៣លានសំឡេង៕
