ប្រធានគណៈកម្មការអឺរ៉ុបទទួលសារភាពថា មេដឹកនាំនយោបាយនៅក្នុងសហភាពអឺរ៉ុប «ស្ទង់ប្រមាណស្ទើរ» អំពីទំហំគ្រោះថ្នាក់ដាក់ឱ្យមានដោយមេរោគវីរុសកូរ៉ូណា។
លោកស្រី Ursula von der Leyen បានមានប្រសាសន៍ប្រាប់កាសែតអាល្លឺម៉ង់ Bild ថា «ជាការច្បាស់លាស់ថានេះជាវីរុសមួយដែលធ្វើឱ្យយើងរវល់ក្នុងរយៈពេលយូរ»។
ក្រុមមេដឹកនាំអឺរ៉ុបបានយល់ស្របគ្នាដាក់កំហិតការហាមប្រាមមិនឱ្យពួកអ្នកដំណើរនៅខាងក្រៅប្លុកនេះចូលក្នុងសហភាពអឺរ៉ុបចំនួន៣០ថ្ងៃ។
ប្រទេសបារាំងធ្វើតាមប្រទេសអ៊ីតាលីនិងប្រទេសអេស្ប៉ាញក្នុងការបិទប្រទេសជាទូទៅចំនួនយ៉ាងតិចណាស់១៥ថ្ងៃ។ ប្រទេសប៊ែលហ្ស៊ិកបញ្ជាឱ្យពលរដ្ឋខ្លួននៅក្នុងផ្ទះរហូតយ៉ាងហោចណាស់ដល់ថ្ងៃទី៥ ខែមេសា។
ប្រទេសអាល្លឺម៉ង់បានបញ្ជាឱ្យពលរដ្ឋខ្លួននៅក្នុងផ្ទះ។ ចំណែកឯចក្រភពអង់គ្លេសនិងប្រទេសអ៊ីស្រាអែលអំពាវនាវដល់ពលរដ្ឋពួកគេឱ្យចៀសវាងការធ្វើដំណើរមិនចាំបាច់។
នៅក្នុងប្រទេសរុស្សីដែលនៅទីនោះព្រំដែនបានបិទមិនឱ្យពួកជនបរទេសចូលសាលារៀននឹងបិទទ្វារពីថ្ងៃទី ២៣ ខែមីនាដល់ថ្ងៃទី១២ ខែមេសាហើយជើងហោះទៅកាន់ចក្រភពអង់គ្លេស សហរដ្ឋអាមេរិក និងប្រទេសអេមីរ៉ាតអារ៉ាប់រួមនឹងត្រូវផ្អាកចាប់តាំងពីថ្ងៃទី២០ ខែមីនា។
នៅក្នុងប្រទេសប៉ាគីស្ថាន នាយករដ្ឋមន្ត្រី Imran Khan និយាយថា ប្រទេសលោកមិនអាចបិទដោយទ្រង់ទ្រាយធំដូចនៅបស្ចឹមប្រទេសបានទេ ដោយព្រួយបារម្ភថា ការធ្វើដូច្នេះអាចនាំឱ្យអន្តរាយសេដ្ឋកិច្ច។
ក្រុមហ៊ុនផលិតរថយន្តអាល្លឺម៉ង់ម៉ាក BMW និយាយថា ខ្លួននឹងបិទរោងចក្រនៅក្នុងទ្វីបអឺរ៉ុបនិងប្រទេសអាហ្វ្រិកខាងត្បូងដែលផលិតចំនួនរថយន្តពាក់កណ្តាលចំនួនមួយខែ។
រដ្ឋបាល Trump និងធនាគារកណ្តាលអាមេរិកប្រកាសអំពីជំនួយហិរញ្ញវត្ថុដល់វិស័យជំនួញមានផលប៉ះពាល់ខ្លាំងបំផុតនិងដល់គ្រួសារមានការលំបាកខ្លាំងផងដែរ។
ប្រទេសស្វីស អាមេនី សាធារណរដ្ឋម៉ុលដាវី និងប្រទេសកាហ្សាស្ថាន និងតំបន់ពីរនៃប្រទេសអ៊ុយក្រែន ព្រមទាំងតំបន់មួយនៃប្រទេសកៀហ្ស៊ីស្ថានបានប្រកាសភាពមានអាសន្ន។ក្រុងធំបំផុតពីរនៃប្រទេសប្រេស៊ីលគឺក្រុង Rio de Janeiro និងក្រុង Sao Paulo ក៏បានប្រកាសដូចគ្នាដែរ។
ចាប់តាំងពីមានមេរោគវីរុសនេះជាលើកដំបូងកាលពីចុងខែធ្នូមក មានមនុស្ស៨ពាន់៩២នាក់បានស្លាប់នៅទូទាំងពិភពលលោក ដោយមានករណីអ្នកជំងឺសាកលចំនួន២សែន៦រយ៨០នាក់ នេះបើតាមតួលេខរបស់ទីភ្នាក់ងារព័ត៌មានបារាំង AFP ផ្អែកលើប្រភពផ្លូវការនៅម៉ោង១រសៀលម៉ោងសាកលកាលពីថ្ងៃពុធ។
ប្រទេសដែលមានផលប៉ះពាល់ខ្លាំងបំផុតគឺប្រទេសចិនដីគោកមានមនុស្ស៣ពាន់ ២រយ៣៧នាក់ស្លាប់ក្នុងបណ្តាករណីអ្នកជំងឺ៨ម៉ឺន៨រយ៩៤នាក់ ហើយអ្នកជំងឺ៦ម៉ឺន៩ពាន់៦រយនាក់បានជាសះស្បើយ។
