រដ្ឋាភិបាលសហព័ន្ធសហរដ្ឋអាមេរិកនឹងផ្ញើលុយដោយផ្ទាល់ឲ្យបានឆាប់ដល់ពលរដ្ឋអាមេរិកាំងដើម្បីបន្ធូរបន្ថយផលវិបាកផ្នែកសេដ្ឋកិច្ចដែលបណ្ដាលមកពីការឆ្លងរាលដាលមេរោគកូរ៉ូណាថ្មី។
លោកប្រធានាធិបតី Donald Trump បានសរសេរនៅលើ Twitter នៅថ្ងៃពុធ គឺក្នុងពេលមួយថ្ងៃក្រោយមកបន្ទាប់ពីលោក និងទីប្រឹក្សារបស់លោកបានប្រកាសអំពីគំនិតផ្ដួចផ្ដើមនេះ យ៉ាងដូច្នេះថា៖«សម្រាប់អ្នកដែលបាត់បង់ការងារធ្វើ ដោយសារតែគោលនយោបាយដ៏សំខាន់ និងចាំបាច់នៅក្នុងការទប់ទល់នឹងមេរោគកូរ៉ូណាថ្មី ដូចជាការបិទសណ្ឋាគារ បារ និងភោជនីយដ្ឋាននានា អ្នកនឹងទទួលបានថវិកាឧបត្ថម្ភក្នុងពេលឆាប់ៗខាងមុខនេះ»។
រដ្ឋមន្ត្រីក្រសួងហិរញ្ញវត្ថុលោក Steven Mnuchin បាននិយាយនៅពេលលោកចូលរួមជាមួយនឹងលោក Trump ក្នុងសន្និសីទកាសែតកាលថ្ងៃអង្គារថា៖ «លោកប្រធានាធិបតីបានណែនាំខ្ញុំឲ្យធ្វើរឿងនេះក្នុងពេលឥឡូវនេះ។ យើងនឹងផ្ញើលុយជាសែកធនាគារទៅឲ្យពលរដ្ឋអាមេរិកាំងជាបន្ទាន់ គឺនៅពេលនេះ និងនៅក្នុងពេលពីរសប្ដាហ៍ខាងមុខ»។
រដ្ឋបាលរបស់លោកប្រធានាធិបតី Donald Trump ចង់ឲ្យសភាអនុម័តលើការបញ្ចូលថវិកា ៨៥០ ពាន់លានដុល្លារទៀតទៅក្នុងសេដ្ឋកិច្ចជាតិ ដែលក្នុងនោះថវិកាចំនួន ២៥០ ពាន់លានដុល្លារសម្រាប់កម្ចីរបស់អាជីវកម្មខ្នាតតូច និង ៥០ ពាន់លានដុល្លារសម្រាប់ជួយដល់ក្រុមហ៊ុនអាកាសចរណ៍របស់សហរដ្ឋអាមេរិក ដែលជាផ្នែកមួយនៃកញ្ចប់ថវិកាជួយសេដ្ឋកិច្ចស្ថានការណ៍បន្ទាន់។
ថវិកានេះគឺជាការបន្ថែមទៅនឹងកញ្ចប់ថវិកាជាង ១០០ ពាន់លានដុល្លារផ្សេងទៀត ដែលរដ្ឋសភាទើបបានអនុម័ត។ ច្បាប់ថ្មីដែលរដ្ឋសភាទើបអនុម័តនោះនឹងផ្ដល់ការឈប់សម្រាកពេលមានជំងឺ ការធានារ៉ាប់រងពេលគ្មានការងារធ្វើ និងផលប្រយោជន៍ផ្សេងទៀតសម្រាប់អ្នកធ្វើការណាដែលរងផលប៉ះពាល់ដោយសារការឆ្លងរាលដាលជំងឺ COVID-19 នៅទូទាំងប្រទេស។
លោក Trumpបាននិយាយអំពីការស្នើថវិកាពីសភានេះយ៉ាងដូច្នេះថា៖«យើងចង់ឲ្យមានការបញ្ចូលថវិកាជាច្រើន ជាជាងការជួបប្រជុំតូចតាចពីរបីថ្ងៃម្ដង។ យើងចង់ធ្វើរឿងនេះឲ្យបានលឿន ហើយនេះគឺជាអ្វីដែលយើងត្រូវធ្វើ»។
កាលពីថ្ងៃអង្គារ ធនាគារកណ្ដាលសហរដ្ឋអាមេរិកបានប្រកាសថា ខ្លួនចង់រក្សាថវិកាកម្ចីចំនួន ១ លានលានដុល្លារសម្រាប់អាជីវកម្មនានា។
សហរដ្ឋអាមេរិកមានករណីឆ្លងមេរោគកូរ៉ូណាថ្មីជាង ៦.០០០ ករណី នៅក្នុងរដ្ឋទាំង ៥០ របស់សហរដ្ឋអាមេរិក គិតត្រឹមថ្ងៃពុធ និងអ្នកស្លាប់ជាង ១០០ នាក់ដោយសារមេរោគនេះ ដែលភាគច្រើននៃការស្លាប់នេះគឺនៅក្នុងរដ្ឋ Washington និងរដ្ឋ New York៕
ប្រែសម្រួលដោយ ភី សុភាដា
