នៅទីក្រុង Bethlehem នៃតំបន់ West Bank នៅមជ្ឈិមបូព៌ា ដែលជាកន្លែងប្រសូត្ររបស់ព្រះយេស៊ូ កាលពីថ្ងៃព្រហស្បតិ៍ម្សិលមិញបានចាប់ផ្តើមប្រារព្ធបុណ្យរាត្រីមុនណូអែលដោយមានក្បួនភ្លេងពោរពេញដោយក្តីសប្បាយរីករាយនិងការមកដល់នៃបុព្វជិតកាតូលិកកំពូលនៅទឹកដីពិសិដ្ឋនេះ ក៏ប៉ុន្តែមនុស្សតិចតួចបានស្ថិតនៅទីនោះដើម្បីស្វាគមន៍ពួកគេនៅពេលដែលការរាតត្បាតនៃវីរុសកូរ៉ូណានិងការបិទសកម្មភាពសង្គមដ៏តឹងរ៉ឹងបានកាត់បន្ថយការប្រារព្ធពិធីតាមបែបប្រពៃណីនៅកន្លែងកំណើតរបស់ព្រះយាស៊ូនេះ។ នេះតាមសេចក្តីរាយការណ៍របស់ទីភ្នាក់ងារព័ត៌មាន AP។
ទិដ្ឋភាពសោះកក្រោះស្រដៀងគ្នានេះ បានកើតមានឡើងនៅទូទាំងពិភពលោកនៅពេលដែលការជួបជុំក្រុមគ្រួសារនិងនិងការសូត្រធម៌ដែលកត់សម្គាល់នៃការឈប់សម្រាកបានត្រូវកាត់បន្ថយឬលុបចោលការជួបជុំគ្នានេះ។
នៅក្នុងប្រទេសអូស្ត្រាលី ពួកអ្នកសូត្រធម៌ ត្រូវកក់សំបុត្រតាមអនឡាញដើម្បីចូលរួមពិធីនៅព្រះវិហារដោយអនុវត្តគម្លាតសង្គម។ ប្រទេសហ្វីលីពីន បានហាមឃាត់ការប្រមូលផ្តុំគ្នាមានមនុស្សច្រើន ហើយបានរារាំងមិនឲ្យក្រុមគ្រួសារសាច់ឆ្ងាយចូលរួមការទទួលទានអាហារពេលល្ងាចបុណ្យណូអែលតាមប្រពៃណី។ ការច្រៀងចម្រៀងជាក្រុមតាមប្រពៃណីរបស់កូនក្មេងពីផ្ទះមួយទៅផ្ទះមួយបានត្រូវលុបចោលនៅក្នុងប្រទេសក្រិក។
នៅល្ងាចមុនថ្ងៃណូអែលក្នុងប្រទេសអ៊ីតាលី ជួងនៅព្រះវិហារ បានត្រូវបន្លឺឡើងឆាប់ជាងធម្មតា។ បម្រាមគោចរម៉ោង១០យប់របស់រដ្ឋាភិបាលអ៊ីតាលី បានបណ្តាលឲ្យអាចារ្យគ្រិស្តសាសនាផ្លាស់ប្តូរការធ្វើពិធី ដោយការសូត្រធម៌«ពាក់កណ្តាលយប់» មកចាប់ផ្តើមនៅល្ងាចថ្ងៃព្រហស្បត៍នៅព្រះវិហារខ្លះបានប្រារព្ធពិធីប៉ុន្មានម៉ោងមុនបន្ទាប់ពីមេឃងងឹត។ សម្តេចប៉ាប Pope Francis ដែលបានប្រាប់ប្រជាពលរដ្ឋថា «ត្រូវតែគោរព»វិធានការរបស់អាជ្ញាធរស៊ីវិលដើម្បីប្រយុទ្ធប្រឆាំងការរាតត្បាតនៃជំងឺកូវីដ១៩នេះ ព្រះអង្គក៏គោរពដូចគ្នាដែរ។ នៅឆ្នាំនេះ ការប្រមូលផ្តុំអុតទានបុណ្យណូអែលនៅព្រះវិហារ Basillica នៅ St. Peter របស់បុរីវ៉ាទីកង់ក៏បានផ្លាស់ប្តូរមកធ្វើពីម៉ោង៩:៣០នាទីយប់មកម៉ោង៧:៣០នាទីយប់វិញ។
ការប្រារព្ធពិធីនៅទីកន្លែងផ្សេងទៀតនៅទ្វីបអឺរ៉ុប បានត្រូវលុបចោលឬកាត់បន្ថយយ៉ាងខ្លាំងនៅពេលដែលការឆ្លងវីរុសបានកើនឡើងនៅទូទាំងទ្វីបនិងមានវីរុសវិវត្តិន៍ថ្មីដែលអាចរាលដាលកាន់តែឆាប់រហ័សឡើង បានត្រូវគេរកឃើញ៕
