ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

កម្មករ​ខ្លះ​បាក់ស្បាត​និង​ឈប់​ធ្វើការ​សំណង់​ក្រោយ​គ្រោះថ្នាក់​បាក់​អគារ


ជនរងគ្រោះ​នៅក្នុងមន្ទីរពេទ្យ​សម្រាកព្យាបាល​របួស ក្រោយ​ពី ពួកគេត្រូវបាន​សង្គ្រោះចេញ​ពី​អគារ​បាក់បែក នៅក្រុងព្រះសីហនុ នៅថ្ងៃទី ២៥ ខែមិថុនា​ ឆ្នាំ២០១៩។​ (ខាន់ សុគុំមនោ​/VOA)

លោក គឹម​ សារឹទ្ធ ជា​មេការ​នៅ​សំណង់​​ដែល​លោក​ ឆាយ៉ា កំពុង​ធ្វើ​ការ​ មាន​ប្រសាសន៍​ថា​កម្មករ​នៅ​ទីនេះ​មាន​ប្រមាណ​៣០នាក់ ហើយ​សុទ្ធ​តែ​អ្នក​មក​ពី​ខេត្ត​ផ្សេង​ មិន​មែន​នៅ​ក្នុង​ក្រុងព្រះសីហនុ​នោះ​ទេ។

លោក ខៀវ ឆាយ៉ា អាយុ​៣៩​ឆ្នាំ និង​ភរិយា​របស់​លោក ​នឹង​ឈប់​ពី​ការងារ​សំណង់​នៅ​ថ្ងៃ​អង្គារ​នេះ ក្រោយ​បាន​ឃើញ​គ្រោះ​ថ្នាក់​បាក់​អគារ​៧​ជាន់​ នៅ​ក្នុង​ក្រុង​ព្រះសីហនុ ក្បែរ​កន្លែង​ពួកគេធ្វើ​ការ​។

លោក ខៀវ ឆាយ៉ា អាយុ៣៩ ឆ្នាំ មក​ពី​ខេត្ត​កំពង់ស្ពឺ បាន​ឲ្យ​ដឹង​ថា លោក​នឹង​ភរិយា​របស់​លោក​គ្រោង​ឈប់​ពី​ការងារ​សំណង់ នៅ​ក្នុង​ក្រុង​ព្រះសីហនុ​ក្រោយ​ឧបទ្ទវហេតុ​បាក់រលំ​អគារ នៅ​ខេត្តព្រះសីហនុ នៅថ្ងៃ​ទី ២៥ ខែមិថុនា ឆ្នាំ២០១៩។ (ខាន់ សុគុំមនោ/VOA)
លោក ខៀវ ឆាយ៉ា អាយុ៣៩ ឆ្នាំ មក​ពី​ខេត្ត​កំពង់ស្ពឺ បាន​ឲ្យ​ដឹង​ថា លោក​នឹង​ភរិយា​របស់​លោក​គ្រោង​ឈប់​ពី​ការងារ​សំណង់ នៅ​ក្នុង​ក្រុង​ព្រះសីហនុ​ក្រោយ​ឧបទ្ទវហេតុ​បាក់រលំ​អគារ នៅ​ខេត្តព្រះសីហនុ នៅថ្ងៃ​ទី ២៥ ខែមិថុនា ឆ្នាំ២០១៩។ (ខាន់ សុគុំមនោ/VOA)

​លោក ឆាយ៉ា ដែល​ទើប​ធ្វើ​ការ​ជា​កម្មករ​សំណង់​ឲ្យ​ក្រុមហ៊ុន​ចិន​ ​បាន​រយ:ពេល​២៥​ថ្ងៃ​ មាន​ប្រសាសន៍​ថា ​ក្រោយ​មាន​ហេតុការណ៍​បាក់​អគារ លោក​បារម្ភ​អំពី​សុវត្ថិភាព​របស់​លោក ភរិយា និង​កូនស្រី​អាយុ​១៤​ឆ្នាំ ដែលស្នាក់​នៅ​កន្លែង​ធ្វើ​ការជាមួយ​គ្នា បើ​ទោះជា​លោកលើក​ឡើង​ថា ​សំណង់​១១​ជាន់ ​ដែល​លោក​កំពុង​បំពេញ​ការងារ ​ហាក់​មាន​ភាព​រឹង​មាំ​ក៏ដោយ។

លោក ឆាយ៉ា ដែល​ពីមុនធ្វើ​ការ​ជាអ្នក​បោក​គក់នៅ​សណ្ឋាគារ​មួយ ​បាន​ថ្លែង​ប្រាប់​VOA​នៅ​កន្លែង​ការងារ​របស់​លោក​ថា៖

«ណាស់​តែ​ខ្ញុំ​មិន​ទុក​ចិត្ត​ ចង់​សម្រាក​ពី​ការងារ។ ខ្លាច ព្រោះ​អី​ខ្ញុំ​មិន​ដែល​ជួប​ហេតុការណ៍​អញ្ចឹង។ អគារ​តែ​ខ្ពស់​ រឹត​តែ​ខ្លាច»។

លោក​មាន​ប្រសាសន៍​ថា លោក​មាន​ការ​ព្រួយ​បារម្ភ​ជា​ងគេ​ ​ជា​ពិសេស​ការគេងនាពេល​យប់​នៅ​កន្លែង​ការងារ​ ដោយសារ​លោកបាន​ឃើញ​គ្រោះ​ថ្នាក់​បាក់​អគារ​កាល​ពីសប្តាហ៍​មុន។

លោក​ ឆាយ៉ា ដែល​មាន​បងប្អូន​១២​នាក់​ និង​មក​ពី​ខេត្ត​កំពង់​ស្ពឺ បាន​រៀបរាប់​ថ្ងៃ​បាក់​អគារ​ថា៖ «មុន​ដំបូង​ខ្ញុំសម្រាន្ត​សុខៗ មាន​សំឡេង​ខ្លាំង​ដូច​ជា​ខ្យល់​ព្យុះលាន់​ខ្លាំងៗហើយ​ដាច់​ខ្សែ​ភ្លើង។ សំឡេង​ហ្នឹង​ធ្វើ​ឲ្យ​ខ្ញុំ​ភ្ញាក់​ដូច​ដាស់ខ្ញុំ​អញ្ចឹង។ ធ្វើ​ឲ្យ​ខ្ញុំ​ស្ទុះ​ឡើង​ស្រឡាំងកាំង ចង់​ស្ទះបេះដូង។ ហើយ​សំឡេង​បុក​ខ្ទរ​ដល់​ដី ឡើង​ញាក់ដី។ ធ្វើ​ឲ្យ​ខ្ញុំរឹត​តែភ័យ»។

ការ​បាក់អគារ​នោះ​បាន​កើត​ឡើង​នៅ​ម៉ោង​ប្រមាណ​៤​ព្រឹក​ថ្ងៃ​សៅរ៍។ លុះ​ព្រឹក​ឡើង​ម៉ោង​៦ ទើប​លោក​ ឆាយ៉ា បាន​ដឹង​ថា​បាក់​អគារ។

ការងារ​សំណង់​នេះ លោក​រក​បាន​ចំណូល​បាន​៣៥០០០រៀល​ក្នុង​មួយ​ថ្ងៃ ខាង​ផ្នែក​លើក​ឥដ្ឋ ហើយ​ភរិយា​របស់​លោក ​បាន​ចំនួន​៣ម៉ឺន​រៀល ខា​ង​ផ្នែក​យោងកំបោរ។

កូនស្រី​របស់​លោក​ ​អាយុ​១៤​ឆ្នាំ ក៏​ស្នាក់​នៅ​ជាមួយលោក​ផង​ដែរនា​ពេល​នេះ ដោយ​ទុក​កូន​មួយ​ស្រីម្នាក់​ទៀត​ ​អាយុ​១៣​ឆ្នាំ​នៅ​ផ្ទះ​ជាមួយ​យាយ​ក្នុង​ខេត្ត​កំពង់ស្ពឺ។

លោក គឹម សារឹទ្ធ ជា​មេការ​នៅ​សំណង់​ដែល​លោក ឆាយ៉ា កំពុង​ធ្វើការ​ជាមួយ ដែល​ជា​សំណង់​ខុនដូ​១១​ជាន់​របស់​ចិន។ ថត​នៅ​ខេត្តព្រះសីហនុ នៅថ្ងៃទី ២៥ ខែមិថុនា ឆ្នាំ២០១៩។ (ខាន់ សុគុំមនោ/VOA)
លោក គឹម សារឹទ្ធ ជា​មេការ​នៅ​សំណង់​ដែល​លោក ឆាយ៉ា កំពុង​ធ្វើការ​ជាមួយ ដែល​ជា​សំណង់​ខុនដូ​១១​ជាន់​របស់​ចិន។ ថត​នៅ​ខេត្តព្រះសីហនុ នៅថ្ងៃទី ២៥ ខែមិថុនា ឆ្នាំ២០១៩។ (ខាន់ សុគុំមនោ/VOA)

លោក គឹម​ សារឹទ្ធ ជា​មេការ​នៅ​សំណង់ដែល​លោក​ ឆាយ៉ា កំពុង​ធ្វើ​ការ​ មាន​ប្រសាសន៍​ថា​កម្មករ​នៅ​ទីនេះ​មាន​ប្រមាណ​៣០នាក់ ហើយ​សុទ្ធ​តែ​អ្នក​មក​ពី​ខេត្ត​ផ្សេង​ មិន​មែន​នៅ​ក្នុង​ក្រុងព្រះសីហនុ​នោះ​ទេ។

ពួកគេ​អាច​រក​ចំណូល​បាន​ចន្លោះ​ពី​៣ម៉ឺន​ទៅ​ជាង​៤ម៉ឺន​រៀល​ក្នុង​មួយ​ថ្ងៃ ​តាម​ជំនាញ​របស់​ពួកគេ។

លោក​ សារឹទ្ធ ដែល​ទើប​មក​ធ្វើ​ជា​មេការ​នៅសំណង់​ខុនដូ​១១​ជាន់​របស់​ចិន ​បាន​ជាង​២​ខែ តែ​ធ្វើ​ការ​ក្នុង​វិស័យ​សំណង់​ជាង​៥​ឆ្នាំ​មក​ហើយ មាន​ប្រសាសន៍​ថា​ក្រោយ​មាន​ហេតុ​ការណ៍​នេះ កម្មករ​មានភាព​ភ័យ​ខ្លាច​ក្នុង​ការ​ធ្វើ​ការងារ។ ប៉ុន្តែ​លោក​មាន​ប្រសាសន៍ថាអគារ​ដែល​លោក​កំពុង​ធ្វើ​នេះ​មាន​ភាពរឹង​មាំ មិនដូច​អគារ​ដែល​បាក់​នោះ​ទេ។

កម្មករសំណង់​ស្នាក់​នៅ​កន្លែង​ធ្វើការ​ជា​រឿង​ធម្មតា ដោយសារ​ពួកគេ​មិន​មាន​ថវិកា​គ្រប់គ្រាន់​ក្នុង​ការជួល​កន្លែង​ស្នាក់​នៅ។

ក្រុង​ព្រះសីហនុ ​កំពុង​រីកដុះដាល​សំណង់​យ៉ាងគំហុក ​ក្នុង​រយ:ពេល​ពីរបីឆ្នាំ​ចុង​ក្រោយ​នេះ ក្រោយ​មាន​កំណើន​ជនជាតិ​ចិនក្នុង​ខេត្ត​មួយ​នេះ។ សំណង់​ទាំង​នេះ​មាន​ដូច​ជា​សណ្ឋាគារ កាស៊ីណូ ភោជនីយដ្ឋាន ​កន្លែង​ស្នាក់​សម្រាប់​ជួល​ និង​សំណង់​ផ្សេងៗ។

របាយការណ៍​របស់​ក្រុម​ធនាគារ​ពិភពលោក​ចេញផ្សាយ​កាល​ពី​ខែ​សីហា ឆ្នាំ​២០១៨ ដែល​និយាយ​អំពី«ឆ្ពោះ​ទៅ​សម្រេច​សក្តានុពល​នគរូបនីយកម្ម» បាន​បញ្ជាក់​ថា​ខេត្ត​ព្រះសីហនុ បាន​ប្រឈម​នឹង​«​គុណភាព​អន់ថយ​នៃ​សំណង់​លំនៅដ្ឋាន ​និង​កង្វះហេដ្ឋារចនា​សម្ព័ន្ធ​ជា​មូលដ្ឋាន​ក្នុង​ទី​ប្រជុំជន​»។ របាយការណ៍​បាន​បញ្ជាក់​បន្ថែមថា ការ​ផ្តល់​ការ​អនុញ្ញាត​ឲ្យ​ធ្វើ​សំណង់​នៅ​តែ​ជាបញ្ហា​ត្រង់​ថា ​«សង់​សិន អាជ្ញា​បណ្ណ​តាម​ក្រោយ»។

របាយការណ៍​បាន​បញ្ជាក់​ថា៖ «នៅ​មាន​ការ​អនុញ្ញាត​ការ​សាង​សង់​ត្រូវ​បាន​ផ្តល់​លើ​មូលដ្ឋាន​មួយ​ករណី​ម្តងៗ ដែល​នៅ​ទីនោះ​គេ​ច្រើន​ស្គាល់​ថា​ជាវិធី​«សង់​សិន អាជ្ញា​បណ្ណ​តាម​ក្រោយ»។ សិទ្ធិ​អំណាច​ក្នុង​ការ​ចេញ​អាជ្ញា​បណ្ណ​សាង​សង់​និង​ការ​ត្រួតត្រា​សំណង់​ស្ថិត​នៅ​ហួស​ពី​សមត្ថ​កិច្ច​របស់​មន្ទីរ​ខេត្ត​នីមួយៗ ឬ​របស់​អាជ្ញាធរ​ក្រុង​ទៅទៀត»។

លោក ​សន ជ័យ ​ប្រធាន​អង្គការ​សម្ព័ន្ធ​គណនេយ្យ​ភាព​សង្គម​កម្ពុជា បាន​ថ្លែង​ថា​សំណង់​អគារ​ផ្សេង​ទៀត ក៏​នឹង​អាច​ប្រឈម​នឹង​ផ្លូវ​ច្បាប់​ផង​ដែរ។

លោក​បាន​ថ្លែង​ថា៖ «ខ្ញុំ​យល់​ថា​រឿង​សំណង់​ខុស​ច្បាប់ វា​មិន​មែន​តែ​សំណង់​ដែល​ដួល​រលំ​ហ្នឹង​ទេ។ វា​អាច​មាន​ផ្សេង​ទៀត ហើយ​យល់​ល្អ​អាជ្ញាធរ​គួរ​តែ​ពិនិត្យ ហើយ​សំណង់​ខ្លះ​ ខ្ញុំ​សង្ស័យ​តែប្រឈម​នឹង​ការ​រុះរើ ​ឬ​ក៏វាយ​ចោល​ទេ។ ហើយ​តម្រូវ​ឲ្យ​ក្រុមហ៊ុន​ចិន​ហ្នឹងត្រូវ​សុំ​ច្បាប់​ឡើង​វិញ»។

ក្រោយ​មាន​គ្រោះ​ថ្នាក់បាក់​អគារ​នេះ រដ្ឋាភិបាល​បាន​សម្រេច​បង្កើត​គណ:កម្មការ​ចម្រុះ​មួយ ដើម្បី​ត្រួតពិនិត្យបទដ្ឋានផ្នែកបច្ចេកទេស និងច្បាប់ នៅតាមការដ្ឋានសំណង់នៅខេត្តព្រះសីហនុ។

លោក​នាយករដ្ឋមន្រ្តី​ ហ៊ុន សែន​ កាល​ពី​ថ្ងៃ​ចន្ទ​ បាន​ព្រមាន​ថា​នឹង​មិន​មាន​ការ​លើកលែង​នោះ​ទេ​ចំពោះ​ការ​សាងសង់​អគារ​ដោយ​ខុសច្បាប់ ហើយ​លោក​ចាត់​ទុក​គ្រោះ​ថ្នាក់បាក់អគារ​នេះ​ជា​មេរៀន​មួយ។ លោក​ថ្លែង​បែប​នេះ ខណ:លោកចុះ​ពិនិត្យ​ការ​ស្វែង​រក​មនុស្ស​ដែល​ជាប់​គាំង​ក្នុង​គំនរ​អគារ។

លោក ផាត សុផល អាយុ​៣៧​ឆ្នាំ ជា​កម្មករ​ម្នាក់ ដែល​ត្រូវ​បាន​ជួយ​សង្រ្គោះ​ពី​គ្រោះ​ថ្នាក់ ​ក្រោយ​ជាប់​ជិត​៦ម៉ោង។ លោក​បាន​ថ្លែង​ថា​លោកនៅ​តែ​បន្ត​ការងារ​ជា​កម្មករ​សំណង់ តែ​លោក​នឹង​គិត​ពី​សុវត្ថិភាព​នៅ​កន្លែង​ការងារ​។

លោក​មាន​ប្រសាសន៍ថា៖ «បាទ ទៅ​ថ្ងៃ​មុខ ខ្ញុំ​ធ្វើ​សំណង់​ តែ​ទោះ​ម៉េច​ក៏​រើស​ក្រុមហ៊ុន ពិនិត្យ​មើល​ក្រុម​ហ៊ុន​ណា​ល្អ កុំ​ឲ្យ​មាន​គ្រោះ​ថ្នាក់ដូច​ពេល​អញ្ចឹង​ទៀត»។

ជន​រងគ្រោះ​ម្នាក់​ទៀត លោក រី ប្រុស អាយុ​២០​ឆ្នាំ មក​ពី​ខេត្តស្ទឹងត្រែង ធ្វើការ​សំណង់​នៅ​ខេត្ត​ព្រះសីហនុ​ បានរយ:ពេល​៨ថ្ងៃ មុន​ថ្ងៃ​គ្រោះថា្នក់​កើត​ឡើង បាន​ថ្លែង​ប្រាប់​VOAនៅ​មន្ទីរពេទ្យ​ខេត្ត កន្លែង​លោក​ទទួល​ការ​ព្យាបាល​ថា លោក​នឹង​ត្រឡប់​ទៅ​រកការងារ​ធ្វើ​នៅ​ខេត្ត​វិញ ហើយ​លោក​មិន​ធ្វើការងារ​សំណង់​ទៀត​ទេ។

លោក​បាន​ថ្លែង​ថា៖ «ធ្វើ​ខាង​សំណង់​ វា​ហត់​ផង ហើយ​វា​គ្រោះ​ថ្នាក់​ច្រើន ហើយ​គ្រោះ​ថ្នាក់ផ្សេងៗ​ទៀត ក៏​មើល​មិន​ឃើញ​ដែរ ហើយ​ណាមួយ​ឡើង​ខ្ពស់ៗ»។

យោង​តាម​ក្រសួង​ការងារ ក្នុង​ឆ្នាំ​២០១៨ គ្រោះថា្នក់​ការងារ​សរុបមាន​ចំនួន២៥,២០៦​ករណី ហើយ​កម្មករ​២០០នាក់​ បាន​ស្លាប់​ និង​២,៧១១ រង​របួស​ធ្ងន់ ដោយសារ​បញ្ហាគ្រោះ​ថ្នាក់ និង​ជំងឺ។

ក្រោយ​ហេតុការណ៍​បាក់​អគារ​នេះ អង្គការពលកម្ម​អន្តរជាតិ បានចេញ​សេចក្តី​ថ្លែងការណ៍​មួយ​នៅ​ថ្ងៃអង្គារ​នេះ ដោយ​បាន​ជំរុញ​ឲ្យ​មាន​ការ​ពិនិត្យ​ច្បាប់​ ការ​ពង្រឹង​ច្បាប់​នៅ​ក្នុង​ផ្នែក​សំណង់ ការ​បង្ហាញ​អំពី​សុវត្ថិភាពការងារ និង​ស្តង់ដារ​សុខភាព ស្តង់ដារសុវត្ថិភាពសំណង់ និង​បង្កើន​ការ​ត្រួតពិនិត្យ​ជាដើម។

លោក ខៀវ ឆាយ៉ា ដែល​បាន​ឈប់​ពីការងារ​នៅ​ថ្ងៃ​នេះ​ មាន​ប្រសាសន៍​ថា​លោក​ និងភរិយា​របស់​លោក​ នឹង​ប្រកប​របរ​នេសាទ​ ដោយ​ទៅ​រស់​នៅ​ជាមួយ​ម្តាយ​ក្មេង​របស់​លោក៕

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG