លោកអភិបាលខេត្តព្រះសីហនុ យន្ត មីន បានចាកចេញពីតំណែង រីឯលោកទេសរដ្ឋមន្ត្រី ញឹម វណ្ណដា ត្រូវបានលោក ហ៊ុន សែន នាយករដ្ឋមន្ត្រី ដកតួនាទីពីគណៈកម្មាធិការជាតិគ្រប់គ្រងគ្រោះមហន្តរាយទាក់ទិននឹងការបាក់រលំការដ្ឋាន សំណង់អគារកាលពីចុងសប្ដាហ៍កន្លងទៅនៅខេត្តព្រះសីហនុ។
លោក យន្ត មីន បាននិយាយថាលោកបានជម្រាបលោកនាយករដ្ឋមន្ត្រី អំពីការលាលែងពីតំណែងនេះ អំឡុងពេលលោក ហ៊ុន សែន បានចុះទៅត្រួតពិនិត្យ ទីតាំងកើតហេតុ កាលពីរំលងអាធ្រាតយប់ម៉ិញ ទីដែលក្រុមអ្នកជួយសង្គ្រោះ បានទាញយកសាកសពអ្នករងគ្រោះចំនួនជិត ៣០នាក់ និងអ្នករងរបួស២៦ នាក់។
លោក យន្ត មីនបានសរសេរក្នុងកំណត់ផ្សាយលើទំព័រហ្វេសប៊ុកផ្លូវការរបស់លោក កាលពីរសៀលថ្ងៃច័ន្ទនេះ យ៉ាងដូច្នេះថា៖
«ក្នុងឧបទ្ទវហេតុរលំអគារ៧ជាន់ក្នុងក្រុងព្រះសីហនុនេះ ខ្ញុំមានការសោកស្តាយយ៉ាងខ្លាំង និងសុំការអភ័ទោសពីក្រុមគ្រួសារនៃជនរងគ្រោះទាំងអស់»។
ការលាលែងពីតំណែងរបស់ លោក យន្ត មីន កើតមានឡើងបន្ទាប់ពីមានការស្រែកប្រកូកប្រកាស ពីសំណាក់សាធារណជន សង្គមស៊ីវិល និងអ្នកនយោបាយជំទាស់ ឲ្យមានការដកមុខតំណែង និងដាក់ពិន័យ មន្ត្រីដែលជាប់ពាក់ព័ន្ធ នឹងគ្រោះថ្នាក់អកុសលដ៏ប្រល័យខាងលើ។
ស្ថានទូតចិនក្នុងប្រទេសកម្ពុជាកាលពីថ្ងៃអាទិត្យ ក៏បានទទួលស្គាល់ផងដែរថាអាគារនោះគឺត្រូវបានសាងសង់ដោយក្រុមអ្នកវិនិយោគចិន។
ក្នុងសាររំលែកទុក្ខនៅលើទំព័រហ្វេសប៊ុករបស់ខ្លួន ស្ថានទូតចិនបន្ថែមថា «ជនជាតិចិន៣រូបដែលពាក់ព័ន្ធនឹងឧបទ្ទវហេតុលើកនេះត្រូវកម្លាំងសមត្ថកិច្ចកម្ពុជាឃាត់ខ្លួន» ហើយ ចិនគាំទ្រដល់ការស៊ើបអង្កេតចាត់វិធានការផ្លូវច្បាប់នានាលើជនល្មើសទាំងឡាយដែលពាក់ព័ន្ធក្នុងឧបទ្ទវហេតុនេះ។
នៅក្នុងកំណត់ផ្សាយមួយនៅទំព័រហ្វេសប៊ុកផ្លូវការរបស់លោកនារសៀលថ្ងៃចន្ទនេះ នាយករដ្ឋមន្ត្រី ហ៊ុន សែន បានសរសេរដែរថា លោកបានទទួលសំណើរសុំលាឈប់ របស់លោក យន្ត មីន រួចហើយ ហើយថា លោកអភិបាលខេត្តរូបនេះ បាន«ទទួលស្គាល់កំហុស» ទាក់ទិននឹងករណីបាក់រលំអគារខាងលើ។ តែលោកមិនបានបញ្ជាក់ថា នឹងមានវិធានការអ្វីបន្ទាប់ ទៅលើលោក យន្ត មីន និងមន្ត្រីពាក់ព័ន្ធផ្សេងទៀតនៅឡើយទេ។
លោក យន្ត មីន ដែលពីមុនជាមេបញ្ជាការតំបន់ប្រតិបត្តិការសឹកខេត្តកោះកុង មានឋានន្តរស័ក្តិជាឧត្ដមសេនីយ៍ត្រី បានចូលមកកាន់តំណែងជាអភិបាលខេត្តព្រះសីហនុកាលពីឆ្នាំ២០១៥។
អស់ពេលជិតបួនឆ្នាំនៃអាណត្តិរបស់លោក នៅខេត្តជាប់មាត់សមុទ្រមួយនេះគាប់ជួនពេលដែលមានការហូរចូលយ៉ាងគំហុកភ្លាមៗនៃការវិនិយោគរបស់ចិនទៅលើវិស័យសំណង់ អចលនទ្រព្យ និងកាស៊ីណូព្រោងព្រាតនាអំឡុងពេលជាងពីរឆ្នាំចុងក្រោយនេះ។
ការកើនឡើងទ្រង់ទ្រាយធំរបស់ជនជាតិចិននេះបានបង្ករបញ្ហាអសកម្មនៅក្នុងខេត្តព្រះសីហនុដូចយ៉ាងជម្លោះដីធ្លីមួយដែលបានកើតឡើងកាលពីដើមឆ្នាំនេះ ដែលមានការនាំឲ្យដកតំណែងអភិបាលរងខេត្តពីររូបនាគ្រានោះ ដែលលោកយន្ត មីន ខ្លួនឯងក៏រក្សាតួនាទីស្ទើរមិនជាប់។
លោក ហ៊ុន សែន ក៏បានបញ្ជាក់បន្ថែមថា ទោះបីមានការលាលែង លោក យន្ត មីន នឹងនៅបន្តកាន់តំណែងជាអភិបាលខេត្តរហូតប្រតិបត្តិការរុករកនិងជួយសង្គ្រោះអ្នករងគ្រោះ នៅអគារបាក់រលំខាងលើត្រូវបិទបញ្ចប់។
លោក គួច ចំរើន អភិបាលខេត្តកំពង់ចាមនឹងត្រូវផ្ទេរឲ្យមកជំនួសតួនាទីលោក យន្ត មីន ជាអភិបាលខេត្តព្រះសីហនុ។ នេះបើយោងតាមការបន្ថែមបន្តរបស់លោក ហ៊ុន សែន ដែលកំពុងពិគ្រោះយោបល់ជាមួយលោក ស ខេង ឧបនាយករដ្ឋមន្ត្រី ដ៏មានឥទ្ធិពលរបស់លោក។
យ៉ាងណាក៏ដោយយោងតាមព្រះរាជក្រឹត្យដែលចែកចាយឱ្យអ្នកសារព័ត៌មាន នៅល្ងាចថ្ងៃចន្ទ ព្រះមហាក្សត្រខ្មែរ បានឡាយប្រហស្តតែងតាំង លោក គួច ចំរើន អភិបាលខេត្តកំពង់ចាម ឱ្យមកជំនួសតួនាទីលោក យន្ត មីន ជាអភិបាលខេត្តព្រះសីហនុ។ លោក យន្ត មីន ត្រូវបានផ្ទេរការងារទៅក្រសួងមហាផ្ទៃវិញ។
ស្របពេលជាមួយគ្នានេះផងដែរ លោក ហ៊ុន សែន ក៏បានសម្រេចដកតួនាទីលោក ញឹម វណ្ណដា អនុប្រធានគណៈកម្មាធិការជាតិគ្រប់គ្រងគ្រោះមហន្តរាយ ក្រោមថា លោក ញឹម វណ្ណដា បានបំពេញតួនាទីដោយ«ខ្វះការទទួលខុសត្រូវនិងភូតភរ»។
លោក ហ៊ុន សែន នៅរសៀលថ្ងៃច័ន្ទ នេះបានបញ្ជាក់ថាលោកអនុប្រធានយូរឆ្នាំនៃស្ថាប័នឆ្លើយ តបនឹងគ្រោះមហន្តរាយរបស់រដ្ឋាភិបាលមួយរូបនេះពុំអាចទាក់ទងបាន និងពុំមានវត្តមាននៅទីតាំងដែលកើតមានឧបទ្ទវហេតុនោះទេ តែបែរជាមានវត្តមាននៅខេត្តកំពតជាមួយស្ត្រីមួយរូបដែលលោក ហ៊ុន សែននិយាយថា លោកពុំដឹងថាជានរណានោះទេ។
ក្នុងថ្ងៃចន្ទជាមួយគ្នាផងដែរ គេបានឃើញមានការតែងតាំងលោកទេសរដ្ឋមន្ត្រី គន់ គីម អតីតឋនាយអគ្គសេនាធិការដ្ឋាននៃកងយោធពលខេមរភូមិន្ទ មកជំនួសតួនាទីលោក ញឹម វណ្ណដា ដែលត្រូវបានផ្ទេរទៅស្ថិតក្នុងចំណោមទីប្រឹក្សាដ៏ច្រើនកុះកររបស់រដ្ឋាភិបាលលោក ហ៊ុន សែន។
VOAមិនអាចទាក់ទងលោក ញឹម វណ្ណដា ដើម្បីសុំការបំភ្លឺបានទេ នារសៀលថ្ងៃចន្ទនេះ។
លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជាបាននិយាយប្រាប់ VOAថា ការលាលែងរបស់លោក យន្ត មីន បានបង្ហាញអំពី«ទំនួលខុសត្រូវផ្ទាល់ខ្លួន» និងការបង្ហាញនូវ«សម្បជញ្ញៈ»របស់លោកអភិបាលខេត្តរូបនេះ។
រីឯករណីលោក ញឹម វណ្ណដា វិញ លោក ផៃ ស៊ីផាន បានលើកឡើងថាលោកផ្ទាល់ជាអ្នកនាំពាក្យស្រាប់ ក៏មិនទាន់មានព័ត៌មានលម្អិតនៅឡើយ ថាតើលោក ញឹម វណ្ណដា បានបង្ហាញការខ្វះទំនួលខុសត្រូវ ឬភូតភរលោកនាយករដ្ឋមន្ត្រីនៅលើរឿងអ្វីនោះទេ។
អ្នកនាំពាក្យរដ្ឋាភិបាលនេះបាននិយាយពីការដកតួនាទីលោក ញឹម វណ្ណដា ហើយតែងតាំងភ្លាមៗជាទេសរដ្ឋមន្ត្រីទទួលបន្ទុកជាទីប្រឹក្សារដ្ឋាភិបាលក្នុងថ្ងៃតែមួយនេះ យ៉ាងដូច្នេះប្រាប់ VOAតាមទូរស័ព្ទថា៖
«នៅក្នុងកាលៈទេសៈនេះ នៅក្នុងន័យប្រមូលកម្លាំងកសាងនិងការពារជាតិ អាហ្នឹងជាសារៈសំខាន់ ហើយនៅក្នុងន័យដែលយើងផ្ដល់តម្លៃនៃការប្រឹងប្រែងរបស់ឥស្សរជន ទាំងនោះនៃអតីតកាលដែលលោកបានផ្ដល់សេវាកម្មសាធារណៈ យើងមិនកាត់ថ្លៃ ឬកាត់ក ការបាត់បង់តំណែងដែលកំពុងទទួលខុសត្រូវគឺជាការបាត់បង់កិត្តិយសដ៏ធំធេងណាស់»។
លោក ផៃ ស៊ីផាន បានលើកឡើងបន្តថាការយកលោក ញឹម វណ្ណដា ទៅជាទីប្រឹក្សារដ្ឋាភិបាល ក្នុងក្ដីសង្ឃឹមថាលោកនឹងយកបទពិសោធន៍ការងារច្រើនឆ្នាំកន្លងមកដែលរដ្ឋាភិបាលទទួលស្គាល់ ជាធាតុចូល ជួយការងាររដ្ឋបាលសាធារណៈទៅថ្ងៃមុខបន្តទៀត។
គិតល្ងាចថ្ងៃចន្ទនេះ ក្រុមជួយសង្គ្រោះចម្រុះដែលមានកម្លាំងប្រមាណមួយពាន់នាក់ បានទាញយកអ្នកស្លាប់បាន២៨នាក់ និងអ្នករងរបួសសរុប ២៦នាក់ ចេញពីគំនរបែកបាក់ ដែលនេះរាប់បញ្ចូលទាំងការយកចេញបាននូវ អ្នករស់រានមានជីវិតពីរនាក់ចុងក្រោយ ដែលទើបនឹងរកឃើញនាវេលាម៉ោង៤:៣០នាទីរសៀលនេះ បន្ទាប់ពីជាប់ក្នុងគំនរបែកបាក់អស់ប្រមាណជិត៦០ម៉ោង៕
