មេដឹកនាំសភាជាតិបានសម្រេចកិច្ចព្រមព្រៀងបណ្តោះអាសន្នជាមួយនឹងរដ្ឋបាលលោកប្រធានាធិបតីអូបាម៉ា លើផែនការចំណាយរបស់រដ្ឋាភិបាល។ នេះជាចំណាត់ការដែលអាចជៀសវាងការជាប់គាំងខាងផ្នែកថវិកាដ៏ធ្ងន់ធ្ងររវាងសេតវិមាននិងក្រុមអ្នកសាធារណរដ្ឋអភិរក្សដែលនិយមតឹងរ៉ឹង។
កិច្ចព្រមព្រៀងនេះគឺជាលទ្ធផលនៃការចរចាអស់ជាច្រើនសប្តាហ៍ដែលដឹកនាំដោយលោកJohn Boehner ប្រធានសភា និងលោក Mitch McConnell មេដឹកនាំសំឡេងភាគច្រើននៅក្នុងព្រឹទ្ធសភា។ អស់លោកទាំងពីរនាក់គឺជាមេដឹកនាំនៃរដ្ឋសភានិងព្រឹទ្ធសភាដែលមកពី ខាងគណបក្សសាធារណរដ្ឋ។ ការចរចានេះមានរួមបញ្ចូលលោកស្រី Nancy Pelosi ប្រធានក្រុមសំឡេងភាគតិចក្នុងសភា និងលោក Harry Reid មេដឹកនាំក្រុមអ្នកប្រជាធិបតេយ្យក្នុងព្រឹទ្ធសភា។
ផែនការនេះនឹងផ្តល់ថវិកាពេញលេញដល់រដ្ឋាភិបាលសហព័ន្ធនិងដំឡើងកម្រិតប្រាក់បំណុលរបស់រដ្ឋាភិបាលឬហៅថាអំណាចក្នុងការខ្ចីប្រាក់ រហូតដល់ខែមីនា ឆ្នាំ២០១៧ ដែលមានរយៈពេលពីរខែបន្ទាប់ពីលោកប្រធានាធិបតី បារ៉ាក់ អូបាម៉ា បញ្ចប់អណត្តិ។
ផែនការនោះនឹងជំរុញការចំណាយសម្រាប់កម្មវិធីយោធានិងក្នុងស្រុកប្រហែល៥០ពាន់លានដុល្លារក្នុងឆ្នាំ២០១៦ និង៣០ពាន់លានដុល្លារទៀតក្នុងឆ្នាំ២០១៧ ក៏ដូចជាបន្ថែម១៦ពាន់លានក្នុងមួយឆ្នាំសម្រាប់ថវិការបស់ក្រសួងការពារជាតិសម្រាប់ធ្វើសង្គ្រាមនៅក្រៅប្រទេស៕
