អង្គការកម្មវិធីម្ហូបអាហារពិភពលោកហៅកាត់ថា WFP និយាយថា រហូតមកដល់ពេលនេះមនុស្សជាង១សែននាក់បានខ្ចាត់ព្រាត់ពីផ្ទះសម្បែងពួកគេដោយសារមានការវាយលុកដោយកងកម្លាំងតួកគី នៅក្នុងផ្នែកខាងជើងនៃប្រទេសស៊ីរី។
ទីភ្នាក់ងារនេះបាននិយាយថា ពួកជនខ្ចាត់ព្រាត់ពីលំនៅដ្ឋានទាំងនេះមកពីក្រុង Ras al-Ayn និងក្រុង Tal Abyad។
កងកម្លាំងប្រជាធិបតេយ្យស៊ីរីដឹកនាំដោយពួកជនអំបូរ Kurde បានបដិសេធដំណឹងថា កងកម្លាំងតួកគី មិនបានវាយយកបានក្រុងព្រំដែន Ras al-Ayn ដូចដែល តួកគី បានអះអាងនោះទេ។
អង្គការ Syrian Observatory for Human Rights និយាយថាចំនួនជនស៊ីវិលស្លាប់ដោយសារការវាយលុករបស់តួកគី បានកើនឡើងដល់៣០នាក់ហើយ។
រដ្ឋាភិបាលក្រុងអង់ការ៉ា បានបើកធ្វើប្រតិបត្តិការឆ្លងកាត់ព្រំដែនកាលពីថ្ងៃពុធដោយនិយាយថា ខ្លួនចង់បណ្តេញកងកម្លាំង Kurde ស៊ីរីចេញពីតំបន់ទ្រនាប់មួយក្នុងប៉ែកខាងជើងនៃប្រទេសស៊ីរី។ រដ្ឋាភិបាលនេះចាត់ទុកកងកម្លាំងនេះថាជាពួកភេរវជនជាសម្ព័ន្ធមិត្តជាមួយពួក kurde ទាមទារបំបែករដ្ឋក្នុងប្រទេស តួកគី។
ពួកមន្ត្រីស.រ.អា.និយាយថាប៉ុស្តិ៍ ជួរមុខមួយរបស់កងយោធាងាមេរិកាំងនៅ Kobane ក្នុងប៉ែកឦសាននៃប្រទេសស៊ីរីបានត្រូវជម្លៀសនៅក្រោយគ្រាប់កាំភ្លើងធំតួកគី បានធ្លាក់នៅជិតទីនោះ។ មូលដ្ឋានធំរបស់ស.រ.អា.នៅ Kabane គ្មានផលប៉ះពាល់អ្វីទេហើយពួកមន្ត្រីបាននិយាយថា ការជម្លៀសប៉ុស្តិ៍ ជួរមុខនេះគ្រាន់តែជាវិធានការបណ្តោះអាសន្នប៉ុណ្ណោះ។
អង្គការអូតង់បានសុំដល់តួកគី ដែលជាសមាជិកមួយនៃសម្ព័ន្ធភាពនេះដែរ ឱ្យមានការទប់ចិត្ត៕
