ក្រសួងមហាផ្ទៃ នាព្រឹកថ្ងៃព្រហស្បតិ៍នេះ បានចេញសេចក្តីអំពាវនាវស្នើសុំឲ្យសាធារណជនទាំងឡាយណាដែលបានប្រទះឃើញហេតុការណ៍នៃអំពើហិង្សាលើតំណាងរាស្ត្រគណបក្សសង្គ្រោះជាតិនោះ ចូលមកបំភ្លឺ ផ្តល់ព័ត៌មាន ឬចង្អុលបង្ហាញអត្តសញ្ញាណនានាដើម្បីឈានដល់ការដាក់បន្ទុក និងចាប់ខ្លួនក្រុមជនដៃដល់យកមកផ្តន្ទាទោសតាមផ្លូវច្បាប់។
មួយថ្ងៃបន្ទាប់ពីករណីវាយប្រហារលើតំណាងរាស្រ្តគណបក្សជំទាស់នោះ រដ្ឋាភិបាលកម្ពុជាបានបង្កើតគណៈកម្មការថ្មីមួយក្រោមការដឹកនាំរបស់ក្រសួងមហាផ្ទៃដើម្បីស៊ើបអង្កេតលើករណីនេះ។ គណៈកម្មការ ដែលបានចាប់ផ្តើមបេសកកម្មកាលពីថ្ងៃពុធម្សិលមិញនេះ កំពុងធ្វើការប្រមូលភស្តុតាង ដោយរំពឹងថា នឹងមានលទ្ធផលក្នុងពេលឆាប់ៗខាងមុខនេះ។ នេះបើតាមការបញ្ជាក់ពីលោកខៀវ សុភ័គ អ្នកនាំពាក្យក្រសួងមហាផ្ទៃ។
«ដើម្បីសុំឲ្យបងប្អូនដែលបានឃើញហេតុការណ៍ហ្នឹង ស្គាល់ភិនភាគជនដៃដល់ និងរូបភាពផ្សេងៗ សុំផ្តល់មកគណៈកម្មការ។ ដំណើរការទៅមុខហើយ ហើយសង្ឃឹមថា មិនយូរទេនឹងមានលទ្ធផល»។
គេហទំព័រប៉ូលិសជាតិបានឲ្យដឹងថា គណៈកម្មការថ្មីនេះគឺដឹកនាំដោយលោកឯម សំអាន រដ្ឋលេខាធិការក្រសួងមហាផ្ទៃ និងមន្ត្រីប៉ូលិសសំខាន់ៗមួយចំនួនទៀត។ VOA មិនអាចទំនាក់ទំនាក់សុំសេចក្តីអធិប្បាយពីប្រធាននិងសមាជិករបស់គណៈកម្មការថ្មីនេះបានទេ។
ការវាយប្រហារលើអ្នកតំណាងរាស្ត្រទាំងពីររូបគឺលោកញ៉យ ចំរើន តំណាងរាស្ត្រមណ្ឌលកំពង់ចាម និងលោកគង់ សភា តំណាងរាស្ត្រខេត្តស្វាយរៀង បានប្រព្រឹត្តឡើងក្នុងពេលជាងមួយម៉ោងក្រោយពីមានបាតុកម្មដែលរៀបចំឡើងដោយក្រុមអ្នកគាំទ្រគណបក្សកាន់អំណាចរបស់លោក ហ៊ុន សែន នាព្រឹកច័ន្ទទាមទារឱ្យលោកកឹម សុខា អនុប្រធានគណបក្សសង្គ្រោះជាតិចុះចេញពីតំណែងជាអនុប្រធានសភាជាតិ។
គេសង្កេតឃើញថា មិនមានអន្តរាគមន៍ពីអាជ្ញាធរនោះទេ ក្នុងពេលដែលក្រុមដៃដល់ធ្វើសកម្មភាពវាយប្រហារលើតំណាងរាស្រ្តនៅមុខរដ្ឋសភាជាតិនោះ។
នៅក្នុងសេចក្តីថ្លែងការណ៍ពិសេសកាលពីល្ងាចថ្ងៃពុធកន្លងទៅ លោកហ៊ុន សែនបញ្ជាក់ថា នៅមុខរដ្ឋសភានោះមិនមានបាតុករគាំទ្រលោកទេក្នុងពេលផ្ទុះអំពើហិង្សានោះ។ លោកនាយករដ្ឋមន្ត្រីហ៊ុន សែន ដែលកាន់អំណាចជាង៣០ឆ្នាំ បានថ្លែងថា ការផ្ទុះអំពើហិង្សា និងការធ្វើបាតុកម្មនាថ្ងៃច័ន្ទនោះ ទំនងជា«ការជះឥទ្ធិពល»ពីការធ្វើបាតុកម្មប្រឆាំងនឹងរូបលោក ជាបន្តបន្ទាប់ ពេលដែល លោកធ្វើទស្សនកិច្ចនៅបុរីញូវយ៉ក និងក្រុងប៉ារីសក្នុងពេលថ្មីៗនេះ។
យ៉ាងណាក៏ដោយ ទាក់ទងនឹងការបង្កើតគណៈកម្មការស៊ើបអង្កេតទៅលើករណីហិង្សាចំពោះតំណាងរាស្ត្រនេះ មន្ត្រីសង្គមស៊ីវិលយល់ថា លទ្ធផលដែលនឹងចេញពីការស៊ើបអង្កេតនេះអាចឆ្លុះបញ្ចាំងពីសមត្ថភាព ឬកង្វះសមត្ថភាពរបស់ក្រុមមន្ត្រីអាជ្ញាធរមានសមត្ថកិច្ច។
លោកស្រី ជា វណ្ណាត អ្នកឃ្លាំមើលនយោបាយមួយរូបក្នុងប្រទេសកម្ពុជា បានសាទរការបង្កើតគណៈកម្មការថ្មីនេះ ដើម្បីធានាឲ្យមានការសន្និដ្ឋានដ៏ត្រឹមត្រូវមួយ។ លោកស្រីយល់ថា ការរកឃើញការណ៍ពិត និងមូលហេតុនៅពីក្រោយព្រឹត្តិការណ៍ហិង្សាដ៏សាហាវនេះ នឹងផ្តល់ជាអត្ថប្រយោជន៍ ដល់គ្រប់ភាគីពាក់ព័ន្ធ ទាំងរាជរដ្ឋាភិបាល និងគណបក្សជំទាស់។ លើសពីនេះទៀត វាអាចបង្ហាញថា អាជ្ញាធរមានសមត្ថកិច្ចពិតជាបានបំពេញការងាររបស់ពួកគេ។ អំពើហិង្សាលើតំណាងរាស្ត្រនេះក៏អាចជាព្រឹត្តិការណ៍សំខាន់មួយឈានដល់ការសម្រេចចិត្តថ្មីមួយក្នុងការបោះឆ្នោតខាងមុខ ប្រសិនបើការណ៍ពិតមិនត្រូវបានលាតត្រដាងនោះ។
«ពីព្រោះការណ៍ពិត វាជាផលប្រយោជន៍ដល់គ្រប់គ្នាទាំងអស់។ បើមិនអញ្ចឹងទេ ទាំងរដ្ឋាភិបាលក្តី ទាំងគណបក្សប្រជាជនកម្ពុជាក្តី ទាំងគណបក្សសង្គ្រោះជាតិក្តី សាធារណជនក្តី កាន់តែមានការអស់សង្ឃឹមទៅលើអាជ្ញាធរដែលមានតួនាទីដោះស្រាយ»។
លោកអ៊ូ វីរៈ ជានាយកវេទិកាអនាគត និងជាអ្នកវិភាគឯករាជ្យមួយរូបទៀត ហាក់ដូចជាពុំមានការភ្ញាក់ផ្អើលចំពោះការបង្កើតគណៈកម្មការស៊ើបអង្កេតថ្មីនោះទេ ដោយហេតុថា ការស៊ើបអង្កេតចំពោះករណីខុសច្បាប់នេះ វាជាការទទួលខុសត្រូវរបស់អាជ្ញាធរមានសមត្ថកិច្ច ដែលមានស្រាប់រួចទៅហើយ។
«អញ្ចឹងការបង្កើតគណៈកម្មការនេះ ជារូបភាពជាជាងស្ថានភាពជាក់ស្តែង។ ខ្ញុំមិនចាប់អារម្មណ៍ទេ។ ខ្ញុំចាំមើលលទ្ធផល»។
លោកអ៊ូ វីរៈចង់មើលឃើញការអនុវត្តច្បាប់ដែលជាបន្ទាត់បំពេញតួនាទីនិងកាតព្វកិច្ចជាជាងគ្រាន់តែបង្កើតគណៈកម្មការដែលមានតែសំបកក្រៅ ហើយរង់ចាំតែការបញ្ជាពីក្រុមអ្នកនយោបាយ ដែលនេះវានាំឲ្យខាតពេលយូរ និងមិនសូវមានប្រសិទ្ធភាពការងារ។
«ចាំយើងបង្កើតគណៈកម្មការសិន បានយើងទៅចាប់អ្នកគប់ដុំថ្ម ឬមួយក៏ប៉ូលិសដឹងតួនាទីថា គប់អញ្ចឹងដឹងតែខុសច្បាប់ ដឹងតែត្រូវចាប់ ដឹងតែតួនាទីប៉ុណ្ណឹង»។
លោកអ៊ូ វីរៈ និងលោកស្រីជា វណ្ណាតយល់ថា ក្រុមជនដៃដល់ដែលធ្វើសកម្មភាពវាយប្រហារលើតំណាងរាស្រ្តនោះគ្រាន់តែជាមនុស្សមួយក្រុមតូចដែលទំនងជាត្រូវបានរៀបចំឡើង ខណៈដែលបាតុករមួយចំនួនធំផ្សេងទៀតមិនបានដឹងគម្រោងវាយប្រហារទៅលើតំណាងរាស្ត្រនោះទេ។ រីឯការពិតជាក់ស្តែងយ៉ាងណានោះ មានតែគណៈកម្មការថ្មីទេដែលនឹងមានសមត្ថភាពបំភ្លឺ។
នាថ្ងៃព្រហស្បតិ៍នេះ គណៈប្រតិភូគណបក្សសង្គ្រោះជាតិបានទៅសួរសុខទុក្ខលោកញ៉យ ចំរើន និងលោកគង់ សភា នៅឯមន្ទីរពេទ្យមួយក្នុងប្រទេសថៃ។ ការវាយប្រហារលើតំណាងរាស្ត្រនាមុខស្ថាប័នរបស់ខ្លួននេះរងការរិះគន់យ៉ាងខ្លាំងពីក្រុមអ្នកឃ្លាំមើលការវិវឌ្ឍនយោបាយនៅកម្ពុជា អង្គការសង្គមស៊ីវិល អង្គការសិទ្ធិមនុស្ស និងស្ថានទូតអន្តរជាតិនានាក្នុងប្រទេសដ៏ក្រីក្រនេះ៕
