ភ្ជាប់​ទៅ​គេហទំព័រ​ទាក់ទង

ជំនួប​រវាង​លោក​ស្រី​ Clinton និង​លោក​ស្រី ​Warren​ ធ្វើ​ឲ្យ​មាន​ការ​ទស្សន៍​ទាយ​អំពី​តំណែង​អនុប្រធានាធិបតី


លោក​ស្រី Elizabeth Warren កំពុង​ចាក​ចេញ​ពី​កេហដ្ឋាន​របស់​លោក​ស្រី Clinton កាល​ពី​ថ្ងៃ​ទី១០ ខែ​មិថុនា ឆ្នាំ២០១៦។

កាល​ពី​ថ្ងៃ​សុក្រ​ លោក​ស្រី Hillary Clinton ​បេក្ខជន​ប្រធានាធិបតី​ស.រ.អា.​ខាង​គណបក្ស​ប្រជាធិបតេយ្យ​បាន​ជួប​ជា​មួយ​លោក​ស្រី ​Elizabeth Warren សមាជិកា​ព្រឹទ្ធសភា​ស.រ.អា.​ដែល​មាន​និន្នាការ​នយោបាយ​ឆ្វេង​និយម​ នៅ​ឯ​គេហដ្ឋាន​របស់​គ្រួសារ​លោក​ Clinton​ ក្នុង​រដ្ឋធានី​វ៉ាស៊ីនតោន។​

លោកស្រី​ Warren​ បាន​ល្បី​ឈ្មោះ​នៅ​ពេល​លោក​ស្រី​ជាអ្នក​ការពារ​ការិយាល័យ​គាំពារ​ផ្នែក​ហិរញ្ញវត្ថុ​របស់​ក្រុម​អ្នក​ប្រើប្រាស់​គ្រឿង​ឧបភោគ​បរិភោគ​ដែល​ភាសា​អង់គ្លេស​ហៅថា​ Consumer Financial Protection Bureau​ ដែល​បាន​ត្រូវ​បង្កើត​នៅ​ក្រោយ​វិបត្តិ​ហិរញ្ញវត្ថុ​កាល​ពី​ឆ្នាំ​២០០៨​ ដើម្បី​ការពារ​ពួក​អ្នក​បណ្តាក់​ទុន​តូចតាច។ ចាប់​តាំង​ពី​ពេល​នោះ​មក​លោក​ស្រី​ជា​អ្នក​ទាម​ទារ​ឱ្យ​មាន​កំណែ​ទម្រង់​នៅ ​Wall Street​ និង​វិធានការ​សម្រប​សម្រួល​ភាពមិន​ស្មើ​គ្នា​ខាង​ប្រាក់​ចំណូល​ ហើយ​ការណ៍​នេះ​បាន​នាំ​ឱ្យ​លោកស្រី​ជា​អ្នកនិយម​នយោបាយ​ឆ្វេង​និយម ​ហើយ​លោកស្រី​ Clinton ​ជា​អ្នកនិយម​នយោបាយ​កណ្តាល។

ជំនួប​រវាង​លោកស្រី ​Warren ​និង​លោកស្រី​ Clinton ​បាន​បង្កើន​ការ​និយាយ​ស្មានៗ​ថា​ លោកស្រី​ Clinton ​ប្រហែល​ជា​នឹង​យក​លោកស្រី​សមាជិកា​ព្រឹទ្ធសភា​ស.រ.អា. រូប​នេះ​ជា​បេក្ខជន​អនុប្រធានាធិបតី​របស់​លោកស្រី។

លោកស្រី Warren ​ទំនង​ជា​នឹង​បង្កើន​ការ​គាំទ្រ​ដល់​លោកស្រី​ Clinton ក្នុង​ចំណោម​ពួក​អ្នក​ទ្រទ្រង់​លោក​ Bernie Sanders ​ដែល​អ្នក​គាំទ្រ​លោក Sanders​ ខ្លះ​បាន​បង្ហាញ​ការ​រារែក​មិន​ចង់​គាំទ្រ​លោកស្រី​ Clinton។ លោក​ស្រី ​Warrenបាន​ចាត់​ទុក​ថា​លោក​ស្រី​ Clinton​ ថា​ជា​អ្នក​មាន​ទស្សនៈ​ជឿន​លឿន​ ដូច​លោក​ Sanders ដែរ។

លោកស្រី​ Warren ​បាន​មាន​ប្រសាសន៍​ប្រាប់​ទូរទស្សន៍​អាមេរិកាំង​ MSNBC កាលពី​ថ្ងៃ​ព្រហស្បតិ៍​ថា​ លោក​ស្រី​មិនត្រូវ​បាន​សុំឱ្យ​ធ្វើជា​បេក្ខជន​ប្រធានាធិបតី​ទេ​ ហើយលោកស្រី​ក៏​មិន​បានត្រូវ​ពិនិត្យ​ពិច័យ​សម្រាប់​តំណែង​នេះ​ក៏​ទេដែរ។

លោកស្រី Clinton ​មាន​ប្រតិភូ​គ្រប់​គ្រាន់​តាម​សេចក្តី​ត្រូវ​ការ​ចាំ​បាច់​ដើម្បី​ទទួល​ការ​តែង​តាំង​ជាបេក្ខជន​ប្រធានាធិបតី​របស់​គណបក្ស​លោកស្រី​កាលពី​ដើម​សប្តាហ៍​នេះ។ លោក​ Sanders​ បាន​ប្តេជ្ញា​ថា​នឹង​ឈរ​ឈ្មោះ​រហូត​ដល់ការ​បោះឆ្នោត​បឋម​នៅ​សប្តាហ៍​ក្រោយ ​ក៏​ប៉ុន្តែ​ពួក​មេ​ដឹក​នាំ​គណបក្ស​សង្ឃឹម​ថា​លោក​នឹង​បញ្ឈប់​ការ​ខិតខំប្រឹង​ប្រែង​របស់​លោក​ក្នុង​ការ​ទទួល​បាន​តំណែង​ប្រធានាធិបតី​នៅ​ក្រោយ​ពេល​នោះ៕

XS
SM
MD
LG