បេក្ខជនប្រធានាធិបតីមកពីគណបក្សប្រជាធិបតេយ្យលោកស្រី Hillary Clinton បាននិយាយថា លោកស្រីនឹងមិនធ្វើទស្សនកិច្ចទៅកាន់ប្រទេសម៉ិកស៊ិកមុនពេលការបោះឆ្នោតមកដល់នាខែវិច្ឆិកាខាងមុខនេះទេ។
ដៃគូប្រជែងរបស់លោកស្រី គឺលោក Donald Trump បេក្ខជនប្រធានាធិបតីមកពីគណបក្សសាធារណរដ្ឋ បានធ្វើដំណើរទៅប្រទេសម៉ិកស៊ិកកាលពីសប្ដាហ៍មុន បន្ទាប់ពីលោកប្រធានាធិបតីម៉ិកស៊ិកលោក Enrique Pena Nieto បានអញ្ជើញទាំងលោក Donald Trump និងទាំងលោកស្រី Hillary Clinton ទៅកាន់ប្រទេសម៉ិកស៊ិកដើម្បីពិភាក្សាអំពីទំនាក់ទំនងរវាងសហរដ្ឋអាមេរិក និងប្រទេសម៉ិកស៊ិក។
លោកស្រី Clinton បានប្រាប់ទូរទស្សន៍ ABC កាលពីថ្ងៃចន្ទម្សិលមិញថា លោកស្រីនឹងផ្ដោតលើការបង្កើតការងារនៅក្នុងសហរដ្ឋអាមេរិកជាជាងទៅធ្វើទស្សនកិច្ចនៅក្នុងប្រទេសម៉ិកស៊ិក។ កាលពីព្រឹកថ្ងៃចន្ទម្សិលមិញ លោកស្រីបានហៅការពិភាក្សាគ្នារវាងលោក Trump និងប្រធានាធិបតីម៉ិកស៊ិកថាជា «ហេតុការណ៍លក្ខណៈអន្តរជាតិគួរឲ្យអៀនខ្មាស» មួយ ហើយលោកស្រីបន្ថែមថា លោក Trump មិនដឹងថាតើត្រូវនិយាយជាមួយប្រមុខរដ្ឋប្រទេសមួយយ៉ាងម៉េចនោះទេ។
លោកស្រី Clinton ក៏បានប្រាប់អ្នកគាំទ្រលោកស្រីនៅក្នុងទីក្រុង Cleveland រដ្ឋ Ohio ថា រដ្ឋបាលរបស់លោកស្រីនឹងធ្វើការតស៊ូដើម្បីសិទ្ធិ និងសេចក្ដីថ្លៃថ្នូររបស់អ្នកធ្វើការ ខណៈពេលដែលលោកស្រីវាយបកលើប្រវត្តិអាជីវកម្មរបស់លោក Trump ដែលធ្លាប់ក្ស័យធនជាច្រើនលើកច្រើនសារ និងការចោទប្រកាន់ថាអាជីវកម្មលោក Trump មិនសូវផ្ដល់តម្លៃដល់អ្នកធ្វើការនោះទេ។
លោក Trump កាលពីថ្ងៃចន្ទម្សិលមិញ ក៏ស្ថិតនៅក្នុងទីក្រុង Ohio ផងដែរ ដោយលោកបានជួបប្រជុំជាមួយនឹងសមាជិកសហជីពអ្នកធ្វើការ។ លោក Trump បានបន្ទោសលោកប្រធានាធិបតីសហរដ្ឋអាមេរិក Barack Obama ថាអនុញ្ញាតឲ្យក្រុមហ៊ុនសហរដ្ឋអាមេរិកបញ្ជូនការងារចេញទៅប្រទេសម៉ិកស៊ិក៕
