បេក្ខជនប្រធានាធិបតីសហរដ្ឋអាមេរិកមកពីគណបក្សសាធារណរដ្ឋលោកដូណាល់ ត្រាំ (Donald Trump) និងបេក្ខជនប្រធានាធិបតីសហរដ្ឋអាមេរិកមកពីគណបក្សប្រជាធិបតេយ្យលោកស្រីហ៊ីលឡារី គ្លីនតុន (Hillary Clinton) មានចំណុចខុសគ្នាពាក់ព័ន្ធនឹងសំណើគោលនយោបាយគណបក្ស ប៉ុន្តែខណៈពេលដែលការបោះឆ្នោតឈានកាន់តែខិតជិតមកដល់ គេឃើញមានគម្លាតខុសគ្នាចំពោះការចំណាយទៅលើយុទ្ធនាការឃោសនាបោះឆ្នោតរបស់អ្នកទាំងពីរ។
ឯកសារដែលបានបញ្ជូនកាលពីថ្ងៃអង្គារម្សិលមិញដល់គណៈកម្មការជាតិរៀបចំការបោះឆ្នោត បានបង្ហាញថា លោកស្រី Clinton អង្គាសបានថវិកាប្រហែល ៦០ លានដុល្លារអាមេរិកកាលពីខែសីហា បើប្រៀបជាមួយលោក Donald Trump ដែលអង្គាសបានតែ ៤២ លានដុល្លារអាមេរិកប៉ុណ្ណោះ។ យុទ្ធនាការឃោសនាបោះឆ្នោតរបស់លោកស្រី ក៏ចំណាយច្រើនជាងយុទ្ធនាការរបស់លោក Trump ផងដែរ ដោយបានចំណាយលើស ២០ លានដុល្លារអាមេរិក។
ដោយធ្វើការបូកបញ្ចូលគ្នានូវរបាយការណ៍រៀងរាល់ខែទាំងអស់ គិតចាប់តាំងពីពេលដែលលោកទាំងពីរបានក្លាយជាបេក្ខជនប្រធានាធិបតីតែងតាំងដោយគណបក្សរបស់ខ្លួន រហូតមកដល់ចុងខែសីហាកន្លងមកនេះ លោកស្រី Clinton បានចំណាយច្រើនជាងលោក Trump ក្នុងទឹកប្រាក់ចំនួន ២ រយលានដុល្លារអាមេរិក។
ចំពោះគម្លាតរវាងថវិកាដែលអ្នកទាំងពីរបានរៃអង្គាសវិញ ក៏មានគម្លាតធំដែរ ដោយលោកស្រី Clinton អង្គាសថវិកាសរុបបានចំនួន ៣៨៦ លានដុល្លារអាមេរិក រីឯលោក Trump វិញ អង្គាសបានតែចំនួន ១៧០ លានដុល្លារអាមេរិកប៉ុណ្ណោះ។
ការប្រកួតប្រជែងរើសប្រធានាធិបតីនៅក្នុងសហរដ្ឋអាមេរិកគឺត្រូវចំណាយច្រើនណាស់ ដោយយុទ្ធនាការបោះឆ្នោតរបស់គណបក្សនីមួយៗ ត្រូវទិញពេលវេលាផ្សាយពាណិជ្ជកម្មរបស់ខ្លួនតាមទូរទស្សន៍ និងទិញការិយាល័យសម្រាប់បុគ្គលិកគណបក្សរបស់ខ្លួននៅទូទាំងប្រទេស។ កាលជំនាន់លោក Barack Obama ត្រូវបានជ្រើសរើសឲ្យធ្វើជាប្រធានាធិបតីនៅអាណត្តិទីពីរក្នុងឆ្នាំ ២០១២ គណៈកម្មការយុទ្ធនាការរបស់លោកបានចំណាយអស់ថវិកាចំនួន ៧៧៥ លានដុល្លារអាមេរិក៕
