ជាលើកដំបូងចាប់តាំងពីឆ្នាំ២០១៩ និងបន្ទាប់ពីមានការសន្យាមិនឲ្យមានកំណើនការបញ្ចេញឧស្ម័នផ្ទះកញ្ចក់ពីប្រទេសធំៗនៅលើពិភពលោក ការចរចារបស់អ.ស.ប.អំពីអាកាសធាតុចាប់ផ្តើមឡើងវិញកាលពីថ្ងៃច័ន្ទតាមអនឡាញ គឺក្នុងរយៈពេល៦ខែមុនពេលកិច្ចប្រជុំកំពូល COP លើកទី២៦។ នេះបើតាមទីភ្នាក់ងារព័ត៌មាន AFP។
កិច្ចពិភាក្សាដែលជាធម្មតារៀបចំដោយកម្មវិធីការប្រែប្រួលអាកាសធាតុរបស់អ.ស.ប.នៅទីក្រុង Bonn ប្រទេសអាល្លឺម៉ង់ នឹងមិនមែនជាកិច្ចពិភាក្សាផ្លូវការទេ មានន័យថា នឹងគ្មានការសម្រេចចិត្តណាមួយទេក្នុងកិច្ចពិភាក្សារយៈពេល៣សប្តាហ៍នេះទេ។
ក៏ប៉ុន្តែមានការព្រមានកាន់តែធ្ងន់ធ្ងរឡើងពីអ្នកវិទ្យាសាស្ត្រថា ល្បឿននៃកំណើនកំដៅពិភពលោកកំពុងកើនឡើងលឿនជាងផែនការក្នុងការកាត់បន្ថយឧស្ម័នផ្ទះកញ្ចក់ទៅទៀត ដែលនាំឲ្យមានសម្ពាធកាន់តែខ្លាំងក្នុងការចាត់វិធានការចាំបាច់នានា។
នៅឆ្នាំ២០១៨ បណ្តាប្រទេសនានាបានព្រមព្រៀងគ្នាលើកិច្ចព្រមព្រៀងទីក្រុងប៉ារីសដែលកំណត់របៀបដែលប្រទេសនីមួយៗអនុវត្តគោលដៅរបស់ខ្លួន។ ប៉ុន្តែបញ្ហាមួយចំនួននៅតែមិនត្រូវបានដោះស្រាយនោះទេ រួមទាំងច្បាប់ស្តីពីតម្លាភាព ឥណទានកាបូន និងពេលកំណត់រួមសម្រាប់ប្រទេសទាំងអស់កាត់បន្ថយការបំភាយឧស្ម័នផ្ទះកញ្ចក់របស់ខ្លួន។
នៅក្នុងកិច្ចប្រជុំកំពូលចុងក្រោយបង្អស់របស់អង្គការសហប្រជាជាតិស្ដីអំពីអាកាសធាតុកាលពីខែធ្នូ ឆ្នាំ២០១៩ បណ្តាប្រទេសនានាក៏មិនបានឯកភាពអំពីប្រព័ន្ធសកលក្នុងការរាយការណ៍អំពីហិរញ្ញវត្ថុសម្រាប់បញ្ហាអាកាសធាតុនោះដែរ។
លោក Nathan Cogswell ជាអ្នកស្រាវជ្រាវនៅឯវិទ្យាស្ថានធនធានពិភពលោក ឬ World Resources បាននិយាយថា កិច្ចព្រមព្រៀងមានតម្លាភាពកាន់តែខ្លាំងឡើងជា«សមាសភាពដ៏សំខាន់មួយនៃការអនុវត្តកិច្ចព្រមព្រៀងក្រុងប៉ារីសប្រកបដោយប្រសិទ្ធភាព»៕
