កាសែតរដ្ឋចិន កាលពីថ្ងៃចន្ទ បានរាយការណ៍ថា សហរដ្ឋអាមេរិក នឹងលូកដៃកិច្ចការផ្ទៃក្នុងរបស់ទីក្រុងហុងកុង ប្រសិនបើ សភាសហរដ្ឋអាមេរិក អនុម័តសេចក្តីព្រាងច្បាប់ដែលគាំទ្រដោយគណបក្សទាំង២ នៅក្នុងការគាំទ្របាតុកម្មគាំទ្រលទ្ធិប្រជាធិបតេយ្យ និងសិទ្ធិមនុស្សរបស់ក្រុងហុងកុង។
ពួកអ្នកវិភាគ និយាយថា រដ្ឋាភិបាលក្រុងប៉េកាំង បន្តបង្កើនការខំប្រឹងប្រែងដើម្បីបន្ថយមតិសាកលលោកស្តីពីវិបត្តិនយោបាយក្នុងក្រុងហុងកុង បន្ទាប់ពីការរង់ចាំប្រកបដោយការអត់ធ្មត់ដ៏ខ្លាំងរបស់ខ្លួន ហាក់ដូចជាមិនមានប្រសិទ្ធិភាព។
ការតវ៉ាប្រឆាំងរដ្ឋាភិបាលនៅទីក្រុង មានរយៈពេលជិត៣ខែហើយបានបង្ហាញពីសញ្ញាតិចតួចនៃការចុះថយ ជាពិសេសបន្ទាប់ពីច្រកចេញចូលរបស់ស្ថានីយរទេះភ្លើងក្រោមដី Central Metro បានត្រូវគេដុតកាលពីថ្ងៃអាទិត្យសប្តាហ៍មុន នៅពេលដែលមានការតានតឹងយ៉ាងខ្លាំងរវាងពួកសកម្មជនប្រជាធិបតេយ្យ និងប៉ូលិស។
ក្នុងបទវិចារណកថាមួយដែលមានចំណងជើងថា «រដ្ឋាភិបាលក្រុងវ៉ាស៊ីនតោន មិនមានសិទ្ធិកំណត់ស្វ័យភាពរបស់ទីក្រុងហុងកុង» កាសែត The Global Times បានឲ្យហេតុផលថា «ការអនុម័តសេចក្តីព្រាងច្បាប់នោះ នឹងចាត់ទុកជាការធ្វើអន្តរាគមន៍យ៉ាងខ្លាំងក្នុងកិច្ចការផ្ទៃក្នុងរបស់ក្រុងហុងកុង ហើយវាក៏មិនមែនជាកម្លាំងជះឥទ្ធិពលលើការសម្រេចរបស់រដ្ឋាភិបាលក្រុងប៉េកាំងលើកិច្ចការរបស់ក្រុងហុងកុងនោះទេ»។
សារព័ត៌មានរបស់រដ្ឋាភិបាលនោះ បាននិយាយបន្តទៀតថា រដ្ឋាភិបាលក្រុងវ៉ាស៊ីនតោន មានគោលបំណងដាក់ការគៀបសង្កត់លើរដ្ឋាភិបាលក្រុងប៉េកាំងដើម្បីផលប្រយោជន៍ខ្លួនឯង។ កាសែតនោះ បានទទូចថា ចិននឹងមិនចុះចាញ់តាមការគៀបសង្កត់នោះទេ ក៏ប៉ុន្តែ ប្រកាន់យ៉ាងខ្ជាប់ខ្ជួនការអនុវត្តរបស់ខ្លួននូវរូបមន្តប្រទេសចិនតែមួយ ប្រព័ន្ធ២ក្នុងក្រុងហុងកុង។
កាសែតនោះ បានសន្និដ្ឋានថា «អនាគតរបស់ទីក្រុងហុងកុង នឹងពឹងផ្អែកលើភាពខ្លាំងរបស់ចិន ហើយមិនមែនពឹងផ្អែកលើឥរិយាបទរបស់សហរដ្ឋអាមេរិកចំពោះទីក្រុងហុងកុងទេ»៕
