ប្រទេសចិននិយាយថា សកម្មភាពរោងចក្រផលិតកម្មរបស់ខ្លួនបានថយចុះនៅក្នុងខែមេសានេះ ខណៈដែលការរាតត្បាតជាសាកលនៃវីរុសកូរ៉ូណាប្រភេទថ្មីបានចេញជារូបរាងនៅក្រៅប្រទេសចិនហើយបានបញ្ឈប់ស្ទើររាល់សកម្មភាពសេដ្ឋកិច្ចទាំងអស់នៅទូទាំងពិភពលោក។
ការិយាល័យជាតិស្ថិតិរបស់ចិនបានចេញរបាយការណ៍មួយនៅក្នុងថ្ងៃព្រហស្បតិ៍នេះ ដោយនិយាយថា សន្ទស្សន៍នៃអ្នកបញ្ជាទិញបានធ្លាក់ចុះដល់ពិន្ទុ ៥០,៨ ក្នុងខែមេសា បើប្រៀបធៀបពិន្ទុ ៥២ កាលពីខែមីនា។ ពិន្ទុណាដែលក្រោយ៥០នៅក្នុងសន្ទស្សន៍នេះមានន័យថាជាការថយសកម្មភាព។
រដ្ឋាភិបាលទីក្រុងប៉េកាំងបានបិទផ្អាកសកម្មភាពសេដ្ឋកិច្ចនិងសកម្មភាពបុគ្គលទាំងអស់កាលពីខែកុម្ភៈ ក្នុងកិច្ចប្រឹងប្រែងដើម្បីបញ្ឈប់ការឆ្លងរាលដាលនូវវីរុសកូរ៉ូណា ដែលបង្កជំងឺកូវីដ១៩ ហើយដែលត្រូវបានគេរកឃើញដំបូងនៅទីក្រុងវូហានភាគកណ្តាលប្រទេសចិនកាលពីខែធ្នូ។ អាជ្ញាធរចិនបានដកបម្រាមទាំងនេះបន្តិចម្តងៗខណៈដែលចំនួនការឆ្លងថ្មីបានថយចុះ ប៉ុន្តែសេដ្ឋកិច្ចចិននៅតែជួបបញ្ហាដោយសារកង្វះខាតតម្រូវការនៅសហរដ្ឋអាមេរិកនិងអឺរ៉ុប ដែលនៅទីនោះ ពលរដ្ឋរាប់លាននាក់ត្រូវស្ថិតក្រោមបញ្ជាឲ្យនៅផ្ទះនិងការបិទសកម្មភាពសេដ្ឋកិច្ចភាគច្រើន។
ការិយាល័យជាតិស្ថិតិរបស់ចិនក៏រាយការណ៍ថា ចំពោះសន្ទស្សន៍នៃអ្នកបញ្ជាទិញក្នុងវិស័យមិនមែនរោងចក្រផលិតកម្មវិញ ដូចជាសេវាកម្មសណ្ឋាគារ កីឡា និងការកម្សាន្ត ពិន្ទុ៥៣,២ ក្នុងខែមេសា ដែលជាការកើន១ពិន្ទុពីខែមីនា៕
