ភ្ជាប់​ទៅ​គេហទំព័រ​ទាក់ទង

អតីត​នាយក​សន្តិសុខ​ចិន​ត្រូវ​បាន​កាត់ទោស​ឲ្យ​ជាប់​ពន្ធនាគារ​មួយ​ជីវិត


​លោក​ Zhou Yonkang អតីត​នាយក​សន្តិសុខ​ចិន​​ត្រូវ​បានតុលាការ​កាត់​ទោស​ឲ្យ​ជាប់​ពន្ធនាគារ​អស់​មួយជីវិត​ក្នុង​បទ​ចោទ​ប្រកាន់​ប្រព្រឹត្ត​អំពើ​ពុក​រលួយ។

បណ្តាញ​ផ្សាយ​ព័ត៌មាន​រដ្ឋ​នៃ​ប្រទេស​ចិន​បាន​រាយការណ៍​ថា អតីត​នាយក​សន្តិសុខ​ដ៏​មាន​អំណាច​លោក​ Zhou Yonkang ត្រូវ​បានតុលាការ​កាត់​ទោស​ឲ្យ​ជាប់​ពន្ធនាគារ​អស់​មួយជីវិត ក្នុង​បទ​ចោទ​ប្រកាន់​ប្រព្រឹត្ត​អំពើ​ពុក​រលួយ។

​ទី​ភ្នាក់​ងារ​ព័ត៌មាន​ផ្លូវការ​របស់​រដ្ឋ Xinhua ​បាន​រាយការណ៍​កាល​ពី​ថ្ងៃ​ព្រហស្បតិ៍​ថា លោក Zhou បាន​ទទួល​កំហុស ហើយ​នឹង​មិន​ឡើង​ឧទ្ទរណ៍​ទេ​នៅ​ក្នុង​ការ​កាត់​ទោស​សម្ងាត់​មួយ។

បុរស​ដែល​មាន​អាយុ​៧២​ឆ្នាំ​រូប​នេះ បាន​ជាប់​ចោទ​កាល​ពី​ខែមុន ក្នុង​បទ​ប្រព្រឹត្ត​អំពើ​ពុករលួយ រំលោភ​អំណាច និង​បញ្ចេញ​រឿង​សម្ងាត់​របស់​រដ្ឋ ដែល​ជា​ការណ៍​នាំ​ឲ្យ​លោក​ក្លាយ​ជា​មន្ត្រី​ជាន់​ខ្ពស់​បំផុត ដែល​ត្រូវ​បាន​កាត់​ទោស​ក្នុង​រយៈពេល​ជា​ច្រើន​ទសវត្សរ៍។

លោក Zhou ពីមុន​ជា​នាយក​នៃ​សាជីវកម្មប្រេងឥន្ទនៈជាតិ​របស់​ប្រទេស​ចិន ហើយ​បាន​ប្រមូល​ទ្រព្យសម្បត្តិ​ និង​អំណាច ខណៈ​ដែល​លោក​ឡើង​បុណ្យសក្តិ​រហូត​ដល់​ក្លាយ​ជា​សមាជិក​ម្នាក់​នៃ​គណកម្មាធិការនយោបាយ​ជាន់​ខ្ពស់​នៃ​បក្ស​កុម្មុយនិស្ត​ចិន ដែល​ជា​អង្គភាព​ដែល​មាន​អំណាច​ជាង​គេ​ក្នុង​ប្រទេស​ចិន។

លោក​ត្រូវ​បាន​ចាប់​ខ្លួន​កាល​ពី​ចុង​ឆ្នាំ​មុន ហើយ​ត្រូវ​បាន​ដក​ហូត​តំណែង​បក្ស​ ដែល​ជា​ផ្នែក​មួយ​នៃ​យុទ្ធនាការ​ដ៏​ក្លាំង​ក្លា​មួយដើម្បី​ប្រឆាំង​នឹង​អំពើ​ពុក​រលួយ​របស់​លោក​ប្រធានាធិបតី Xi Jinping។ មន្ត្រី​ជាន់​ខ្ពស់​ផ្សេងទៀត​យ៉ាង​ហោច​ណាស់ ៥០​នាក់ និង​មន្ត្រី​ជាន់​ទាប​ជា​ច្រើន​ទៀត​ត្រូវ​បាន​ទម្លាក់​ចេញ​ពី​តំណែង ដោយ​សារ​យុទ្ធនាការប្រឆាំង​នឹង​អំពើ​ពុក​រលួយ​នេះ៕

XS
SM
MD
LG