រដ្ឋាភិបាលចិនបានបញ្ជាក់ថា ខ្លួននឹងចាត់វិធានការសមរម្យមួយចំនួនដើម្បីប្រឆាំងតបតវិញ ប្រសិនបើសហរដ្ឋអាមេរិកបន្តយកពន្ធគយបន្ថែមទៀតលើទំនិញរបស់ចិន។
ប្រធានាធិបតីសហរដ្ឋអាមេរិកលោក Donald Trump បានប្រកាសកាលពីថ្ងៃចន្ទម្សិលមិញថា លោកបានស្នើឲ្យការិយាល័យអ្នកតំណាងផ្នែកពាណិជ្ជកម្មរបស់សហរដ្ឋអាមេរិកឲ្យធ្វើបញ្ជីចំនួនផលិតផលមួយចំនួនដែលត្រូវយកពន្ធគយចំនួន ១០ ភាគរយ ក្នុងចំណោមមុខទំនិញទាំងអស់របស់ចិនដែលមានតម្លៃ ២ រយពាន់លានដុល្លារអាមេរិក។
លោក Trump បានបញ្ជាក់ថា វិធានការនេះគឺជាការប្រឆាំងតបតទៅនឹងការសម្រេចរបស់រដ្ឋាភិបាលចិននៅក្នុងការដាក់កំហិតពន្ធគយលើទំនិញរបស់សហរដ្ឋអាមេរិកដែលមានទឹកប្រាក់ ៥០ ពាន់លានដុល្លារអាមេរិក ដែលចំនួននៃការយកពន្ធគយនេះគឺស៊ីសងគ្នាជាមួយនឹងការដាក់កំហិតបណ្ដុំពន្ធគយលើកដំបូងរបស់លោក Trump លើទំនិញរបស់ចិន។
នៅក្នុងសេចក្ដីប្រកាសមួយដែលបានចេញផ្សាយនៅថ្ងៃអង្គារនេះ ក្រសួងពាណិជ្ជកម្មចិនបានរិះគន់វិធានការថ្មីចុងក្រោយរបស់លោក Trump នេះថាគ្មានអ្វីក្រៅតែពី «ការដាក់សម្ពាធជ្រុល និងជាការគំរាមដើម្បីប្រយោជន៍» តែប៉ុណ្ណោះ ដែល «ងាកចេញពីការឯកភាពគ្នារវាងភាគីទាំងពីរ» នៅក្នុងអំឡុងពេលចរចាជាច្រើនលើកច្រើនសារកន្លងមក។
លោក Trump បាននិយាយថា លោកមាន «ទំនាក់ទំនងល្អប្រសើរបំផុត» ជាមួយនឹងប្រធានាធិបតីចិនលោក Xi Jinping «ប៉ុន្តែសហរដ្ឋអាមេរិកនឹងមិនឲ្យប្រទេសចិន និងប្រទេសផ្សេងទៀតនៅលើពិភពលោកកេងចំណេញពីលើក្នុងផ្នែកពាណិជ្ជកម្មតទៅទៀតនោះទេ»៕
