ភ្ជាប់​ទៅ​គេហទំព័រ​ទាក់ទង

ក្រុមហ៊ុន​ចិន​ឈ្មោះ Wanda Group ទិញ​សិទ្ធ​ក្រុមហ៊ុន​អាមេរិកាំង Dick Clark Productions


លោក Wang Jianlin ប្រធាន​ក្រុមហ៊ុន Wanda Group ថ្លែង​ក្នុង​ពិធី​ចុះ​ហត្ថលេខា​សម្រាប់​ភាព​ជា​ដៃ​គូ​យុទ្ធសាស្រ្ត​ ក្នុង​ក្រុង​ប៉េកាំង កាលពី​ថ្ងៃទី១៦ ខែមិថុនា ឆ្នាំ២០១៦។

ក្រុមហ៊ុន​ចម្រុះ​របស់​ចិន​ឈ្មោះ​ Wanda Group​ បាន​ប្រកាស​នៅ​ថ្ងៃ​សុក្រ​នេះ​ថា​ ក្រុមហ៊ុន​បាន​ទិញ​កម្មសិទ្ធិ​ក្រុមហ៊ុន​ផលិតកម្ម​ទូរទស្សន៍​របស់​អាមេរិក​ឈ្មោះ​ Dick Clark Productions ​តម្លៃ១​ពាន់​លាន​ដុល្លារ។​

ក្រុមហ៊ុន​ Dick Clark Productions ​ជា​ម្ចាស់​កម្មសិទ្ធិ​សម្រាប់​ការផ្សាយ​ទូរទស្សន៍​កម្មវិធី​ Golden Globe Awards កម្មវិធី American Music Awards កម្មវិធី​ បវកញ្ញា​អាមេរិក Miss America ​និង​កម្មវិធី​មុន​ពេល​ចូល​ឆ្នាំ​នៅ ​Times Square នៅ​ទីក្រុង​ញូវយ៉ក និង​កម្មវិធី​ជាច្រើន​ទៀត។ ​

ក្រុមហ៊ុន Wanda Group ​និយាយ​ថា ​ការ​ទិញ​សិទ្ធ​របស់​ Dick Clark Productions​ គឺជា​ការ​បោះ​ជំហាន​ដំបូង​របស់​ក្រុមហ៊ុន​ Wanda Group ​ចូល​ក្នុង​វិស័យ​ទូរទស្សន៍ ដោយ​មាន​សិទ្ធិ​កាន់កាប់​កម្មវិធី​ទូរទស្សន៍ពិភពលោក​កម្រិត​ខ្ពស់​បំផុត​តាំង​ពី​ដំណាក់កាល​ដំបូង។​

នៅ​ក្នុង​សេចក្តី​ថ្លែងការណ៍​ក្នុង​គេហទំព័រ​របស់​ខ្លួន ​ក្រុមហ៊ុន​ Wanda Group សរសេរ​ថា ​ក្រុមហ៊ុន Dick Clark Productions ​ត្រូវ​ការ​ចរន្ត​ប្រាក់​ដ៏​ច្រើន​សម្រាប់​រក្សា​ស្ថិរភាព​ប្រតិបត្តិការ​របស់ខ្លួន ​និង​កំណើន​ប្រាក់​ចំណេញ។​ បុគ្គលិក​ចាត់ចែង​ការងារ​របស់​ក្រុម​ហ៊ុន​ Dick Clark Productions ​នឹង​បន្ត​ការងារ​ទាំង​ស្រុង​ក្រោយ​ពី​ការ​ទិញ​កម្មសិទ្ធិ​នេះ។​

លោក Wang Jianlin ដែល​មហា​សេដ្ឋី​ជនជាតិ​ចិន​មាន​បំផុត​ ជា​អ្នក​ដឹកនាំ​ក្រុមហ៊ុន​ Wanda Group។​ ក្រុមហ៊ុន​ Dick Clark Productions ​គឺ​ជា​ក្រុមហ៊ុន​ចុង​ក្រោយ​ដែល​ក្រុមហ៊ុន​ Wanda Group ​បាន​ចូល​កាន់​កាប់​សិទ្ធិ​ផ្សាយ​កម្មវិធី​កម្សាន្ត​នៅ​ស.រ.អា.។​ ក្រុមហ៊ុន ​Wanda Group​ជា​ម្ចាស់​កម្មសិទ្ធិ​របស់​រោងភាពយន្ត​ធំៗ​ដូច​ជា ​AMC។

​ថ្មីៗ​នេះ ក្រុមហ៊ុន​ Wanda Group ​បាន​ទិញ​ក្រុមហ៊ុន ​Legendary Entertainment តម្លៃ៣,៥ពាន់​លាន​ដុល្លារ​ ដែល​ជា​ក្រុមហ៊ុន​ផលិត​ភាពយន្ត​រឿង​ Batman និង​រឿង​ Jurassic World។​ ក្រុមហ៊ុន​ Dick Clark Productions ​បង្កើត​ឡើង​ដោយ​លោក​ Dick Clark ​និង​បាន​ប្រតិបត្តិការ​ជាង​៣០ឆ្នាំ​មក​ហើយ៕

XS
SM
MD
LG