ក្រុមហ៊ុនមួយរបស់ប្រទេសចិន បានប្រកាសនៅថ្ងៃនេះថា ខ្លួនបានរកឃើញធនធានប្រេង និងឧស្ម័ននៅក្នុងដែនសមុទ្ររបស់ប្រទេសកម្ពុជា ដែលខ្លួនកំពុងស្រាវជ្រាវនិងរុករកនោះ។ ក្រុមហ៊ុនដដែលគ្រោងនឹងខួងយកឧស្ម័នទាំងនេះនៅក្នុងរយៈពេលពីរឆ្នាំទៀត។
លោក វីលាម ឆេន (William Chan) នាយកក្រុមហ៊ុនរុករកនិងអភិវឌ្ឈន៍ប្រេងកាត CPHL មកពីប្រទេសចិន បានឲ្យដឹងនៅថ្ងៃអង្គារនេះថា ក្រុមហ៊ុនរបស់លោកបានរកឃើញមានប្រេង និងឧស្ម័ននៅក្នុងប្លុក ឌី (D) របស់ដែនសមុទ្ររបស់ប្រទេសកម្ពុជា ដោយរំពឹងថា ប្រេងនិងឧស្ម័នទាំងនោះនឹងមានចំណុះយ៉ាងតិចចំនួន ២០០លានធុងដែរ។
«នៅក្នុងតំបន់របស់យើង យើងបានរកឃើញសក្ដានុពលប្រេងយ៉ាងខ្លាំង។ យើងច្បាស់ហើយថា មានប្រេង និងឧស្ម័ន»។
លោក ឆេន បានថ្លែងយ៉ាងដូច្នេះប្រាប់ក្រុមអ្នកយកព័ត៌មាន បន្ទាប់ពីការបង្ហាញអំពីការខួងប្រេងតាមបច្ចេកទេសទំនើប (Controlled Source Electro Magnetic Imaging ឬហៅកាត់ ថា CSEM) នៅក្នុងទីក្រុងភ្នំពេញ។
ក្រុមហ៊ុន CPHL បានទទួលសិទ្ធិស្រាវជ្រាវរុករក និងអភិវឌ្ឈប្រេងកាតនៅក្នុងសមុទ្រកម្ពុជា នៅក្នុងប្លុក D កាលពីឆ្នាំ២០០៦។ លោក ឆេន មានប្រសាសន៍ថា ក្រុមហ៊ុនរបស់លោក បានរៀបចំកម្មវិធីខួងយកប្រេងចាប់តាំងពីខែមិនាឆ្នាំ២០១០ មកម៉្លេះ ហើយលោករំពឹងថា ការខួងយកប្រេងនឹងអាចធ្វើឡើងនៅក្នុងឆ្នាំ២០១២។
«នៅក្នុងរយៈពេលពីរ ឬបីឆ្នាំទៀត យើងនឹងខួងយកប្រេងយ៉ាងហោចណាស់៣ទៅ៥អណ្ដូង។ ហើយយើងនឹងស្វែងរកមធ្យោបាយងាយៗ ដើម្បីចាប់ផ្ដើមផលិតប្រេង»។
មានក្រុមហ៊ុនជាងដប់ បានទទួលសិទ្ឋិរុករកនិងអភិវឌ្ឈប្រេងកាតនៅក្នុងប្រទេសកម្ពុជា។ នៅក្នុងនោះមានក្រុមហ៊ុន Chevron មកពីសហរដ្ឋអាមេរិក ក្រុមហ៊ុនតូតាល់ មកពីប្រទេសបារាំង ក្រុមហ៊ុនមកពីប្រទេសចិន ប្រទេសជប៉ុន និងថៃ ជាដើម។ ក្រុមហ៊ុន Chevron របស់សហរដ្ឋអាមេរិក ក៏បានប្រកាសថា ខ្លួននឹងចាប់ផ្តើមទាញយកប្រេងពីក្នុងប្លុក អេ (A) របស់ខ្លួនក្នុងអំឡុងឆ្នាំ២០១២ ឬឆ្នាំ ២០១៣ដែរ។ លោកនាយករដ្ឋមន្ដ្រីខ្មែរ ហ៊ុន សែន ធ្លាប់បានព្រមានដកអាជ្ញាប័ណ្ណពីក្រុមហ៊ុននេះ កាលពីខែមេសា ប្រសិនបើ ក្រុម អាមេរិកាំងនេះ មិនចាប់ផ្ដើមផលិតកម្មរបស់ខ្លួននៅឆ្នាំ២០១២នោះទេ។
លោក ហូ វិចិត្រ អនុប្រធានអាជ្ញាធរប្រេងកាតកម្ពុជា បដិសេធផ្តល់ការបំភ្លឺណាមួយនៅជុំវិញការវិនិយោគ និងរុករកប្រេងនៅក្នុងប្រទេសកម្ពុជា កាលពីព្រឹកមិញនេះ។
យោងតាមរបាយការណ៍របស់ធនាគារអភិវឌ្ឈន៍អាស៊ី ADB កាលពីឆ្នាំ២០០៦ បានបង្ហាញថាប្រទេសកម្ពុជា អាចផលិតប្រេងបានចំនួនពី៤០០ទៅ៧០០លានធុង ក្នុងមួយឆ្នាំ ហើយអាចនឹងទទួលបានប្រាក់ចំណូលពី៥០០លានទៅ១.០០០លានដុល្លាក្នុងមួយឆ្នាំ៕