មន្ត្រីជាន់ខ្ពស់ពាណិជ្ជកម្មចិនម្នាក់កាលពីថ្ងៃពុធ បាននិយាយថា ចិននិងសហរដ្ឋអាមេរិក មានមូលបទរួមគ្នាជុំវិញបញ្ហានៃការប្រែប្រួលអាកាសធាតុ និងការកាត់បន្ថយឧស្ម័នកខ្វក់កាបោន ក៏ប៉ុន្តែកិច្ចសហប្រតិបត្តិការនេះ មិនអាចកាត់ផ្តាច់ចេញពីបញ្ហាពាណិជ្ជកម្មដែលរីកកាន់តែធំឡើងរវាងប្រទេសទាំង២នេះទេ។ នេះបើតាមការចេញផ្សាយរបស់ទីភ្នាក់ងារព័ត៌មាន Reuters។
អនុរដ្ឋមន្ត្រីក្រសួងពាណិជ្ជម្មចិនលោក Wang Shouwen បានថ្លែងនៅក្នុងពីធីពាណិជ្ជកម្មមួយរវាងសហរដ្ឋអាមេរិកនិងចិន ក្នុងទីក្រុង Xiamenថា ការពង្រឹងកិច្ចសហប្រតិបត្តិការពណ៌បៃតងនិងកាបោនកម្រិតតិច នឹងមិនត្រឹមតែជួយភាគីទាំង២ឲ្យសម្រេចការកាត់បន្ថយការបញ្ចេញឧស្ម័នកខ្វក់ប៉ុណ្ណោះទេ ប៉ុន្តែក៏នឹងជួយធ្វើឲ្យប្រសើឡើងនូវកិច្ចសហប្រតិបត្តិការសេដ្ឋកិច្ចនិងពាណិជ្ជកម្មផងដែរ។
នៅពេលមានភាពតានតឹងខាងពាណិជ្ជកម្មនិងនយោបាយជាមួយរដ្ឋាភិបាលក្រុងប៉េកាំង រដ្ឋាភិបាលក្រុងវ៉ាស៊ីនតោន បានស្វះស្វែងចាត់វិធានការរួមគ្នាដើម្បីប្រយុទ្ធប្រឆាំងការប្រែប្រួលអាកាសធាតុថាជាបញ្ហាដាច់ដោយឡែកពីគ្នា។
ទោះជាយ៉ាងណាក៏ដោយ ក្នុងអំឡុងនៃជំនួបជាមួយលោក John Kerry បេសកជនអាកាសធាតុរបស់សហរដ្ឋអាមេរិកដែលបានធ្វើទស្សនកិច្ចទៅកាន់ប្រទេសចិនកាលពីសប្តាហ៍មុន អ្នកការទូតជាន់ខ្ពស់ចិនលោក Wang Yi បាននិយាយថា «កិច្ចសហប្រតិបត្តិការអាកាស ធាតុ»មិនអាចកាត់ផ្តាច់ចេញពីទំនាក់ទំនងទ្វេភាគីកាន់តែធំឡើងរវាងប្រទេសផលិតឧស្ម័នផ្ទះកញ្ចក់ដ៏ធំបង្អស់២របស់ពិភពលោកនោះទេ។
លោក Kerry បានទទួលស្គាល់កាលពីសប្តាហ៍មុនថា ជម្លោះភូមិសាស្ត្រនយោបាយកាន់តែធំឡើងរវាងចិននិងសហរដ្ឋអាមេរិក អាចមានផលប៉ះពាល់កាន់តែខ្លាំងឡើងលើកិច្ចសហប្រតិបត្តិការអាកាសធាតុ។
ថ្លែងទៅកាន់ពួកអ្នកកាសែតបន្ទាប់ពីការចរចារយៈពេល២ថ្ងៃជាមួយសមភាគីចិនរបស់លោកគឺលោក Xie Zhenhua លោក Kerry បានលើកយកការដាក់ទណ្ឌកម្មរបស់សហរដ្ឋអាមេរិកលើក្រុមហ៊ុនផលិតបន្ទះថាមពលព្រះអាទិត្យ (solar) ថាមានការជាប់ទាក់ទិននឹងតំបន់Xinjiang ដែលរដ្ឋាភិបាលក្រុងវ៉ាស៊ីនតោនចោទប្រកាន់ថា ចិនបានរំលោភសិទ្ធិមនុស្ស៕
